AKƐNƐ wa ngɛ je nɛ haomi hyi lɛ tɔ mi he je ɔ, ja wa gbo dengme wawɛɛ loko wa ma nyɛ ma ná tue mi jɔmi. Se ke wa ná tue mi jɔmi bɔɔ ko po ɔ, behi fuu ɔ, e se kɛ we kulaa. Mɛni Mawu Munyu ɔ de nɛ maa ye bua wɔ konɛ wa ná tue mi jɔmi nitsɛnitsɛ? Kɛ wa ma plɛ kɛ ye bua ni kpahi konɛ mɛ hu a ná tue mi jɔmi nitsɛnitsɛ kɛɛ?

Loko wa maa na kaa wa ngɛ tue mi jɔmi nitsɛnitsɛ ɔ, ja wa nuɔ he kaa wa ngɛ slɔkee, nɛ nɔ́ ko hu hɛwi wɔ. Huɛ bɔmi kpakpa nɛ maa hi waa kɛ nihi wa kpɛti ɔ hu he hia wawɛɛ. Jehanɛ hu ɔ, e sa nɛ wa ha nɛ huɛ bɔmi kpakpa nɛ maa hi waa kɛ Mawu wa kpɛti ɔ he nɛ hia wɔ pe nɔ́ fɛɛ nɔ́. Mɛni wa maa pee konɛ huɛ bɔmi kpakpa nɛ hi waa kɛ Mawu wa kpɛti?

Ke waa kɛ Yehowa sisi tomi mlaa amɛ tsuɔ ní ɔ, Yehowa maa na kaa waa kɛ wa hɛ fɔ e nɔ, nɛ wa suɔ nɛ tue mi jɔmi nɛ hi waa kɛ lɛ wa kpɛti. (Yer. 17:7, 8; Yak. 2:22, 23) Ke wa pee jã a, lɛ hu e maa hɛ lɛ kɛ su wa he, nɛ e ma ha nɛ wa ná tue mi jɔmi nitsɛnitsɛ. Yesaya 32:17 ɔ de ke: “Dami sane nɛ ɔ kɛ tue mi jɔmi maa ba, nɛ a ma ná he jɔmi kɛ maa ya neneene.” Ke wa je wa tsui mi kɛ bu Yehowa tue ɔ, wa ma ná tue mi jɔmi nitsɛnitsɛ.​—La 119:165.

Jehanɛ hu ɔ, mumi klɔuklɔu ɔ nɛ ji nike ní nɛ wa hiɔwe Tsɛ ɔ haa wɔ ɔ hu yeɔ bua wɔ nɛ wa náa tue mi jɔmi nitsɛnitsɛ.​—Níts. 9:31.

Benɛ bɔfo Paulo ngɛ “mumi ɔ yiblii ɔ” fã slɔɔto ɔmɛ a ta woe ɔ, tue mi jɔmi ji su etɛne nɛ e wo ta. (Gal. 5:22, 23) Akɛnɛ Mawu mumi ɔ lɛ haa nɔ tue mi jɔmi nitsɛnitsɛ he je ɔ, ja wa pee níhi nɛ ma ha nɛ wa ná mumi klɔuklɔu ɔ loko wa ma ná tue mi jɔmi. Nyɛ ha nɛ wa susu níhi enyɔ nɛ ke wa pee ɔ, wa ma ná tue mi jɔmi nɛ Mawu mumi ɔ haa nɔ ɔ he nɛ waa hyɛ.

 Kekleekle ɔ, Mawu Munyu ɔ nɛ wa maa kane daa ligbi ɔ ma ha wɔ tue mi jɔmi. (La 1:2, 3) Ke wa kane Baiblo ɔ, nɛ wa pue wa yi mi tɛ ngɛ nɔ́ nɛ wa kane ɔ he ɔ, Mawu mumi ɔ maa ye bua wɔ nɛ wa maa le Yehowa juɛmi ngɛ níhi fuu a he. Kaa nɔ hyɛmi nɔ́ ɔ, e haa nɛ wa naa bɔ nɛ Mawu peeɔ nɛ e kɛ wɔ hiɔ si ngɛ tue mi jɔmi mi kɛ nɔ́ he je nɛ tue mi jɔmi he hia lɛ wawɛɛ ɔ. Ke waa kɛ níhi nɛ wa kase ngɛ Mawu Munyu ɔ mi ɔ tsu ní ɔ, wa tue mi maa jɔ wɔ wawɛɛ ngɛ si himi mi.​—Abɛ 3:1, 2.

Nɔ́ nɛ ji enyɔ ɔ, e sa nɛ waa sɔle konɛ Mawu nɛ ha wɔ e mumi klɔuklɔu ɔ. (Luka 11:13) Yehowa wo wɔ si kaa, ke wa bi e yemi kɛ buami ɔ, “Mawu tue mi jɔmi ɔ nɛ pã níhi a sisi numi tsuo ɔ maa bu [wa] tsui kɛ [wa] juɛmi he kɛ gu Kristo Yesu nɔ.” (Filip. 4:6, 7) Ke wa sɔle kɛ bi Mawu mumi ɔ, wa Mawu ɔ ma ha wɔ tue mi jɔmi. Nihi nɛ huɛ bɔmi kpakpa ngɛ e kɛ mɛ a kpɛti ɔ pɛ nɛ a náa tue jɔmi nɛ ɔ.​—Rom. 15:13.

Ni komɛ ngɔ ga womi nɛ ɔ kɛ tsu ní, nɛ amlɔ nɛ ɔ, a ngɛ tue mi jɔmi. Kɛ enɛ ɔ ha nɛ tue mi jɔmi ba a kɛ Yehowa kɛ ni kpahi a kpɛti ha kɛɛ?

Nyɛmimɛ komɛ ngɛ nɛ be ko nɛ be ɔ, níhi ‘woɔ a mi mi la’ mlamlaamla, se amlɔ nɛ ɔ, a nuɔ níhi a sisi, a mi mi jɔ, a toɔ a tsui si, nɛ a kɛ nihi hiɔ si ngɛ tue mi jɔmi mi. * (Abɛ 29:22) Jã lɛ e ba ngɛ nyɛminyumu ko kɛ nyɛmiyo ko a blɔ fa mi. Odasefohi ye bua mɛ nɛ amlɔ nɛ ɔ, a mi mi fu we mlamlaamla, nɛ a kɛ nihi hiɔ si ngɛ tue mi jɔmi mi.

Loko David maa jɔɔ e he nɔ ha Mawu ɔ, e ji nɔ ko nɛ e sane he wa, nɛ e kɛ e weku mi bimɛ ɔmɛ tuɔ munyu basabasa. Be ko ɔ, David ba yɔse kaa e sa nɛ e tsake e je mi bami, nɛ́ e kɛ nihi nɛ a hi si ngɛ tue mi jɔmi mi. Kɛ e pee kɛɛ kɛ ná su ehe nɛ ɔ? E de ke, “I kɛ Baiblo sisi tomi mlaahi bɔni ní tsumi ngɛ ye si himi mi, nɛ lɔ ɔ ha nɛ i ná bumi kɛ ha ye weku ɔ, nɛ mɛ hu a ná bumi kɛ ha mi.”

Weku mi nɛ a tsɔse Rachel ngɛ ɔ ha nɛ e mi mi fuɔ mlamlaamla. E de ke, “Weku mi nɛ a fɔ mi ngɛ ɔ, a pɛɛ wawɛɛ, enɛ ɔ he ɔ, amlɔ nɛ ɔ  po i ngɛ mɔde bɔe kaa ma ye ye he nɔ.” Mɛni nɛ ye bua lɛ nɛ amlɔ nɛ ɔ, e mi mi fu we mlamlaamla? E de ke, “I pɔɔ sɔlemi kaa Yehowa nɛ ye bua mi.”

Tsakemi nɛ David kɛ Rachel pee ɔ ji nɔ hyɛmi níhi enyɔ pɛ nɛ tsɔɔ kaa ke wa ngɔ Baiblo sisi tomi mlaahi kɛ tsu ní, nɛ wa bi Mawu konɛ e ye bua wɔ kɛ e mumi ɔ, wa ma ná tue mi jɔmi. E ngɛ heii kaa mwɔnɛ ɔ, tue mi jɔmi be je ɔ mi mohu lɛɛ, se wa ma nyɛ ma ná tue mi jɔmi nitsɛnitsɛ, nɛ lɔ ɔ ma ha nɛ kake peemi maa hi waa kɛ wa weku li kɛ wa nyɛmimɛ Kristofohi wa kpɛti. Yehowa woɔ wɔ he wami kaa waa kɛ “adesahi tsuo nɛ hi si ngɛ tue mi jɔmi mi.” (Rom. 12:18) Anɛ wa ma nyɛ maa pee jã niinɛ lo? Ke wa bɔ mɔde kaa wa ma ha nɛ tue mi jɔmi nɛ hi waa kɛ nihi wa kpɛti ɔ, mɛni se namihi lɛ maa je mi kɛ ba?

Wa fiɛɛmi ní tsumi ɔ yeɔ bua nihi konɛ a nu tue mi jɔmi sɛ gbi nɛ kɔɔ Mawu Matsɛ Yemi ɔ he ɔ. (Yes. 9:6, 7; Mat. 24:14) Bua jɔmi sane ji kaa, nihi fuu bu sɛ gbi ɔ tue, nɛ a tsake. Enɛ ɔ he ɔ, a mi mi fu we ngɛ níhi nɛ ngɛ nɔ yae ngɛ je ɔ mi ɔ he hu. Amlɔ nɛ ɔ, a ná hɛ nɔ kami kaa níhi ma tsake hwɔɔ se. Enɛ ɔ woɔ mɛ he wami nɛ a ‘hlaa tue mi jɔmi, nɛ a diɔ se.’​—La 34:14.

Ni komɛ kplɛɛ we sɛ gbi nɛ wa ngɛ fiɛɛe ɔ nɔ amlɔ nɔuu. Ni komɛ hu kplɛɛ we nɔ kulaa. (Yoh. 3:19) Se kɛ̃ ɔ, Mawu mumi ɔ yeɔ bua wɔ nɛ wa fiɛɛɔ sane kpakpa a kɛ haa mɛ ngɛ tue mi jɔmi kɛ bumi mi. Jã nɛ wa peeɔ ɔ tsɔɔ kaa waa kɛ fiɛɛmi ní tsumi ɔ he blɔ tsɔɔmi nɛ Yesu kɛ ha ngɛ Mateo 10:11-13 ɔ ngɛ ní tsue. Yesu de ke: “Ke nyɛ sɛ we ko mi ɔ, nyɛ fɔ nihi nɛ a ngɛ we ɔ mi ɔ. Ke we ɔ sa a, lɛɛ nyɛ ha nɛ tue mi jɔmi nɛ nyɛ ha lɛ ɔ nɛ hi e nɔ; se ke we ɔ sɛ ɔ, lɛɛ nyɛ ha nɛ tue mi jɔmi nɛ nyɛ ha lɛ ɔ nɛ kpale kɛ ba nyɛ nɔ.” Ke waa kɛ Yesu ga womi ɔ tsu ní ɔ, tue mi jɔmi maa hi waa kɛ nɔ ɔ wa kpɛti, nɛ eko ɔ, e maa bu wɔ tue be kpa.

Ke ma nikɔtɔmahi te si kɛ wo wa ní tsumi ɔ po ɔ, e sa nɛ waa kɛ mɛ nɛ tu munyu ngɛ he si bami mi konɛ tue mi jɔmi nɛ ba. Kaa nɔ hyɛmi nɔ́ ɔ, ngɛ Afrika ma ko mi ɔ, nihi a bua jɔɛ Yehowa Odasefohi a he. Enɛ ɔ ha nɛ amlaalo ɔ sume nɛ e ha wa nyɛmimɛ ɔmɛ he blɔ nɛ a ma Matsɛ Yemi Asahi. Nyɛmimɛ ɔmɛ tsɔ nyɛminyumu ko nɛ e sɔmɔ kaa ma se sane kpakpa fiɛɛlɔ ngɛ Afrika ma nɛ ɔ mi hyɛ ɔ kɛ ya ma a nane mi dalɔ nɛ e ngɛ London ngɛ England ɔ ngɔ ya konɛ e ye bua nɛ a tsu sane ɔ he ní ngɛ tue mi jɔmi mi. A tsɔ lɛ ma nɔkɔtɔma a ngɔ konɛ e ya de lɛ tue mi jɔmi ní tsumi nɛ Yehowa Odasefohi ngɛ tsue ngɛ e ma a mi ɔ. Kɛ níhi ya nɔ ha kɛɛ?

Nyɛminyumu ɔ de ke, “Benɛ i ya su ní tsumi he ɔ, bɔ nɛ nibwɔhi a kpeelɔ ɔ dla e he ha a ma nɔ mi ha mi kaa e nu gbi nɛ i kase ngɛ e ma a mi ɔ. Lɔ ɔ he ɔ, i nga lɛ ngɛ e je gbi ɔ mi. E pee lɛ nyakpɛ, kɛkɛ nɛ e bi mi ke, ‘Mɛni kɛ mo ba hiɛ ɔ?’ I de lɛ ke, ‘I kpa mo pɛɛ, ma nyɛ ma na ma a nane mi dalɔ ɔ lo?’ E fia ma a nane mi dalɔ ɔ ngɛ tɛlifoo nɔ. Benɛ e ba a, e nga mi ngɛ a gbi ɔ mi. Lɔ ɔ se benɛ i kɛ lɛ ngɛ tue mi jɔmi ní tsumi nɛ Odasefohi tsuɔ ɔ he ní sɛɛe ɔ, e bu mi tue saminya.”

Nyɛminyumu ɔ je bumi kpo, nɛ e tsɔɔ ma a nane mi dalɔ ɔ níhi a nya. Enɛ ɔ ha nɛ ma a nane mi dalɔ ɔ ná wa ní tsumi ɔ he juɛmi kpakpa. Pee se ɔ, amlaalo nɛ ngɛ Afrika ma nɛ ɔ mi ɔ ngmɛ nyɛmimɛ ɔmɛ blɔ kaa a ma Matsɛ Yemi Asahi. Nyɛmimɛ ɔmɛ a bua jɔ kaa a nyɛ nɛ a tsu sane ɔ he ní ngɛ tue mi jɔmi mi! E ji anɔkuale kaa ke wa je bumi kpo kɛ tsɔɔ nihi ɔ, e woɔ yiblii kpakpahi fuu, nɛ eko ji tue mi jɔmi.

Mwɔnɛ ɔ, Yehowa we bi ngɛ mumi mi paradeiso nɛ tue mi jɔmi hyi lɛ tɔ ɔ mi. Ke o bɔ mɔde nɛ o je mumi ɔ yiblii ɔ fã nɛ ɔ kpo ngɛ o si himi mi ɔ, o ma ha nɛ tue mi jɔmi nɛ ɔ maa hiɛ babauu. Nɔ́ nɛ pe kulaa a, Yehowa bua maa jɔ o he, nɛ o ma ná tue mi jɔmi nitsɛnitsɛ nɛ ngɛ kɛ yaa neneene ngɛ Mawu je ehe ɔ mi.​—2 Pet. 3:13, 14.