A fɔ mi ngɛ Paddington ngɛ London nɛ ngɛ England. Nihi a he hiɛ wawɛɛ ngɛ lejɛ ɔ. I kɛ ye yayo kɛ ye nyɛmimɛ yihi etɛ nɛ a wa pe mi lɛ hi si. Wa papaa deɔ dã wawɛɛ, enɛ ɔ he ɔ, e nyɛ we nɛ e hyɛ wa nɔ.

Benɛ i wɛ ɔ, ye yayo tsɔɔ mi kaa daa gbɔkuɛ ke i yaa hwɔ si ɔ ma sɔle. I ngɛ Baiblo wayo ko nɛ La womi ɔ pɛ lɛ ngɛ mi. I ngɔ munyuhi nɛ ngɛ mi ɔ kɛ pee la nɛ i hii lae. I kai kaa i kane munyu nɛ ji: “Be maa su nɛ adesahi tsuo ma gbo” ngɛ womi ko mi. Ye hɛ ji munyu nɛ ɔ nɔ kɔkɔɔkɔ. Benɛ i kane munyu nɛ ɔ, i nyɛ we mahe hwɔ mi. I susuɔ bɔ nɛ adesa si himi ma ji ha hwɔɔ se ɔ he. I ba yɔse kaa, ‘Ngɛ anɔkuale mi ɔ, yi mi tomihi fuu ngɛ wami he. I bi ye he ke, ‘Mɛni he je nɛ a bɔ mi?’ I sume nɛ ma gbo!

Ye bua ba jɔ mumi a tsɛmi ní peepeehi a he. I bɔɔ mɔde kaa i kɛ gbogboehi maa tu munyu. Be komɛ ɔ, i kɛ ye huɛmɛ nɛ i kɛ mɛ yaa sukuu ɔ ya kpaa si ngɛ gɔ mi. Wa hyɛɛ sini gbeyegbeyehi nɛ mumihi a tsɛmi ngɛ mi. Wa le kaa jamɛ a sini ɔmɛ ngɛ gbeye mohu lɛɛ, se wa bua jɔ a hyɛmi he.

Benɛ i ye jeha nyɔngma pɛ nɛ i bɔni ko bɔmi. I ngɔ ye he kɛ wo taba numi mi. E ba su be ko ɔ, ke i nui taba a, i nyɛ we si himi. Pee se ɔ, i bɔni wii hu numi. Benɛ i ye jeha 11 ɔ, i kɛ ye he wo dã numi mi. Pi dã a ngɔmi he je nɛ i nuɔ, se mohu, bɔ nɛ ke i de nɛ i peeɔ ye ní ha a lɛ ye bua jɔ he. Ye bua jɔ la kɛ domi hu he. Lɔ ɔ he ɔ, i yaa disko kɛ okplɔɔ ngmɛmihi a sisi be fɛɛ be nɛ i suɔ. I juɔ si kɛ jeɔ we mi gbɔkuɛ, nɛ i kpale ɔ kɛ baa loko je naa bɔ nɛ pee nɛ nɔ ko kó na mi. I pɔɔ sukuu mi pomi ejakaa ke i je kpo gbɔkuɛ nɛ i kpale kɛ ba we mi ɔ, pɔ tɔɔ ye he wawɛɛ. Ke i bɔ mɔde nɛ i ya sukuu po ɔ, i ya nuu dã ke wa ya he jɔɔmi.

Benɛ i gbe sukuu ɔ nya a, i bɔɛ mɔde kulaa ngɛ ka nɛ wa ngma a mi. Ye yayo li kulaa kaa i hii ní yayahi pee ngɛ laami mi. E dɔ lɛ wawɛɛ kaa i buɛ mɔde, nɛ e mi mi fu. Wa sã nya wawɛɛ, nɛ i hia kɛ je we mi. I ya hi ye plã Tony nɛ e ji Rasta no ɔ ngɔ bɔɔ. Tony juɔ, nɛ e juaa tsopa yaya hulɔ. A le lɛ kaa nɔ ko nɛ peeɔ yi wu tso ní. Benɛ i ye jeha 16 a, i ngɔ hɔ nɛ i fɔ bi nyumu.

Ma nikɔtɔma amɛ nɛ ngɛ wa kpɔ ɔ mi ɔ ha mi tsu ngɛ he ko nɛ a pee kɛ ha yihi nɛ a fɔ se a sɛ we gba si himi mi ɔ. Lejɛ ɔ ji he nɛ i kɛ Yehowa odasefohi kpe ngɛ kekle. Odasefohi yihi enyɔ pɔɔ binyɛ komɛ nɛ a wɛ tsɔ slaami ngɛ lejɛ ɔ. Ligbi ko nɛ Odasefo ɔmɛ ba a, i ya piɛɛ a he kɛ kase Baiblo ɔ. I to kaa ma bi mɛ sanehi kɛ tsɔɔ kaa nɔ́ nɛ a ngɛ de ɔ be mi. Se a to a tsui si nɛ a je Baiblo ɔ mi kɛ ha ye sane bimi ɔmɛ tsuo a heto. A mi mi jɔ nɛ a baa a he si hulɔ. Lɔ ɔ he ɔ, i kplɛɛ kaa a kɛ mi nɛ kase Baiblo ɔ.

Benɛ a kɛ mi je ní kasemi ɔ sisi ɔ, e kɛ we kulaa nɛ i ba kase nɔ́ ko ngɛ Baiblo ɔ mi, nɛ lɔ ɔ tsake ye si himi. Kɛ je ye jokuɛ mi tɔɔ nɛ i yeɔ gbenɔ gbeye. Se amlɔ nɛ ɔ, i ba kase gbogboehi a si temi nɛ Yesu tu he munyu ɔ he ni! (Yohane 5:28, 29) Jehanɛ hu, i kase kaa Mawu susuɔ ye he wawɛɛ. (1 Petro 5:7) Ye bua jɔ munyu nɛ ngɛ Yeremia 29:11 ɔ he saminya. Yehowa de ngɛ lejɛ ɔ ke: “‘Yi mi nɛ i to ngɛ nyɛ he ɔ, imi nɔ kake too pɛ lɛ i le; i to nɛ ma ha nɛ nyɛ he mi nɛ jɔ nyɛ, se pi kaa ma hao nyɛ. Ní kpakpahi nɛ nyɛ ngɛ blɔ hyɛe ɔ, i to nɛ ma ha nyɛ.’” Lɔ ɔ ha nɛ i ba ná hemi kɛ yemi kaa ma nyɛ ma hi Paradeiso mi ngɛ zugba a nɔ kɛ ya neneene.—La 37:29.

Yehowa Odasefo ɔmɛ je suɔmi nitsɛ kpo kɛ tsɔɔ mi. Kekleekle ligbi nɛ i ya asafo mi kpe ɔ, nɔ fɛɛ nɔ nya ye he kɛ bua jɔmi. (Yohane 13:34, 35) Bɔ nɛ a peeɔ a ní ha a je ekpa kulaa ngɛ jami kpahi nɛ i kɛ mɛ bɔ hyɛ ɔ a he. Si fɔfɔɛ nɛ i ngɛ mi tsuo se ɔ, Yehowa Odasefo ɔmɛ a bua jɔ ye he. A to a tsui si nɛ a ye bua mi ngɛ blɔhi fuu a nɔ kɛ tsɔɔ kaa a susuɔ ye he. Enɛ ɔ ha nɛ i na kaa i ba piɛɛ weku ko nɛ suɔmi ngɛ mi ɔ he.

Baiblo ɔ nɛ i kase ɔ ye bua mi nɛ i yɔse kaa, e sa nɛ maa pee tsakemihi ngɛ ye si himi mi nɛ ma ngɔ jemi bami he mlaahi nɛ Mawu wo ɔ kɛ tsu ní. E ye ha mi kaa ma kpa taba numi, se i bɔ mɔde nɛ i kpa. Jehanɛ hu ɔ, i kpa lahi nɛ woɔ tsopa yaya kɛ ní tsumi mi he wami ɔ tue bumi. I kpa disko kɛ okplɔɔ ngmɛmihi a sisi hu yami bɔ nɛ pee nɛ i kɛ ye he kó ya wo dã demi mi. I kɛ huɛmɛ nɛ a ngɛ su kpakpahi bɔ konɛ ma kase a su kpakpa amɛ.—Abɛ 13:20.

Jamɛ a be ɔ mi ɔ, Tony hu kɛ Yehowa Odasefo ɔmɛ ngɛ Baiblo ɔ kasee. Odasefo ɔmɛ je Baiblo ɔ mi kɛ ha e sane bimi ɔmɛ a heto. Enɛ ɔ ha nɛ e ná nɔ mi mami kaa nɔ́ nɛ e ngɛ kasee ɔ ji anɔkuale. E pee tsakemihi fuu ngɛ e si himi mi. E kɛ huɛ yayahi kpa bɔmi, e kpa wii numi, jumi, kɛ awi yemi ní peepeehi tsuo. I kɛ Tony pee tsakemihi ngɛ bɔ nɛ wa baa wa jemi ha a he bɔ nɛ pee nɛ wa nyɛ nɛ waa sa Yehowa hɛ mi. Jehanɛ hu, konɛ wa nyɛ nɛ waa hyɛ wa bi nyumuyo ɔ nɔ saminya. Wa sɛ gba si himi mi ngɛ jeha 1982 ɔ mi.

I kai kaa i kane nihi nɛ a nyɛ pee tsakemihi ngɛ a si himi mi ɔ a he sanehi ngɛ Hwɔɔmi Mɔ kɛ Awake! * womi tɛtlɛɛ ɔmɛ a mi. A nɔ hyɛmi ní ɔmɛ wo mi he wami wawɛɛ ejakaa imi hu i ngɛ hlae nɛ ma pee tsakemi nɛ ɔmɛ eko. I ba na kaa, tsakemi nɛ ɔmɛ a peemi be gbɔjɔɔ, ja i mia ye hɛ mi. I ya nɔ nɛ i sɔle kɛ bi Yehowa yemi kɛ buami. A baptisi i kɛ Tony kaa Yehowa Odasefohi ngɛ July 1982.

Huɛ bɔmi nɛ ngɛ i kɛ Yehowa Mawu wa kpɛti ɔ he ye yi wami. Yehowa ye bua i kɛ Tony wawɛɛ ngɛ si himi nɛ mi wa nɛ waa kɛ kpe ɔ mi. Wa kase kaa e sa nɛ waa ngɔ wa hɛ kɛ fɔ Yehowa nɔ ngɛ si fɔfɔɛhi tsuo nɛ a mi wa mi. Wa pee jã, nɛ wa yɔse kaa e ye bua wɔ nɛ e bu wa he kaa weku.—La 55:22.

Ye bua jɔ wawɛɛ kaa wa nyɛ nɛ wa ye bua wa bi nyumu ɔ kɛ wa biyo ɔ nɛ a le Yehowa he ní. Ye bua jɔ hu kaa amlɔ nɛ ɔ, mɛ hu a ngɛ a bimɛ Yehowa he ní tsɔɔe.

Jehanɛ ɔ, ke i hwɔ si ɔ, i hwɔɔ mahe fuaa. I ti si nyɔ mi nɛ ma hi níhi nɛ maa ba hwɔɔ se aloo gbenɔ he susue hu. I kɛ Tony ya slaa a Yehowa Odasefohi asafohi daa otsi nɛ wa woɔ mɛ he wami. Waa kɛ mɛ blaa kɛ yaa fiɛɛmi nɛ wa tsɔɔ ni kpahi kaa ke mɛ hu a ná hemi kɛ yemi ngɛ Yesu mi ɔ, a ma nyɛ ma ná neneene wami.