Mawu bɔ wa nɔmlɔ tso ɔ konɛ ke e he ko plaa a, e nyɛ nɛ e tsa ngɛ e dɛ he. Ke nɔmlɔ tso ɔ he ko plaa a, “ní komɛ yaa nɔ ngɛ nɔmlɔ tso ɔ mi, ní nɛ ɔmɛ yeɔ bua nɛ ke pa a kle jio, e kle we jio, e nyɛɔ nɛ e tsaa.” (Johns Hopkins Medicine) Ke e ba jã a, nɔmlɔ tso ɔ haa nɛ muɔ nɛ ngɛ bee ɔ se poɔ, e haa nɛ panihi nɛ muɔ beɔ ngɛ mi ɔmɛ a mi bli ɔ, e jeɔ sisi nɛ e tsaa pa a, nɛ e haa nɛ he lo nɛ ngɛ lejɛ ɔ peeɔ gbugbuugbu.

SUSU HE NƐ O HYƐ: Ke Bɔlɔ ɔ pee wa nɔmlɔ tso ɔ konɛ e nyɛ nɛ e tsa pahi ngɛ e dɛ he ɔ, anɛ wa be nyɛe ma he si nɛ e wo wɔ kaa e maa jɔɔ wa tsui he ngɛ nɔ́ yeyee kɛ haomihi nɛ waa kɛ kpe ɔmɛ a he nɛ waa ye lo? La polɔ ɔ ngma ke: “Ni nɛmɛ nɛ a tsui ku ɔ, e ngɛ mɛ tsae, nɛ e ngɛ a pa amɛ a nɔ fie.” (La 147:3) Se ke o kɛ nyagba ko kpe hyɛ aloo o kɛ eko ngɛ kpee amlɔ nɛ ɔ po ɔ, kɛ o ma plɛ kɛ ná nɔ mi mami kaa Yehowa maa fĩ o pa amɛ a nɔ ha mo amlɔ nɛ ɔ kɛ hwɔɔ se ha kɛɛ?

Mawu wo si ke: “Koo ye gbeye. I kɛ mo ngɛ! Ko ha nɛ nɔ́ ko nɛ wo o he gbeye. Imi ji o Mawu ɔ nɛ! Ma wo mo he wami; ma piɛ o he.” (Yesaya 41:10) Nɔ nɛ le kaa Yehowa susuɔ e he ɔ ngɛ tue mi jɔmi kɛ he wami, nɛ lɔ ɔ haa nɛ e daa ka slɔɔtohi a nya. Bɔfo Paulo tsɛ tue jɔmi nɛ ɔ ke “Mawu tue mi jɔmi ɔ nɛ pã níhi a sisi numi tsuo.” E tsa nɔ ke: “Ejakaa i nyɛɔ peeɔ níhi tsuo kɛ gu nɔ nɛ e woɔ mi he wami ɔ nɔ.”​—Filipi Bi 4:4-7, 9, 13.

Ngmami ɔmɛ yeɔ bua wɔ nɛ wa náa hemi kɛ yemi ngɛ si nɛ Yehowa wo wɔ kaa e ma ha nɛ wa ná si himi kpakpa hwɔɔ se ɔ mi. Kaa nɔ hyɛmi nɔ́ ɔ, Kpo Jemi 21:4, 5 tsɔɔ wɔ nɔ́ nɛ e maa pee kɛ nɔ́ he je nɛ wa ma nyɛ ma he ye kaa e maa pee jã a:

• “E ma tsu vo nyu fɛɛ vo nyu” ngɛ wa hɛ mi. Ke ni kpahi naa wa haomi ɔmɛ kɛ wa yeyeeye peemi ɔmɛ kaa pi nɔ́ ko po ɔ, Yehowa ma je mɛ tsuo kɛ je.

• Matsɛ Ope nɛ “e hii si ngɛ matsɛ sɛ ɔ nɔ” ɔ ji níhi tsuo a bɔlɔ, nɛ e kɛ he wami kɛ he blɔ nɛ e ngɛ ɔ ma je nɔ́ nami, nɛ e ma ha wɔ yemi kɛ buami nɛ wa hia.

• Yehowa ma nɔ mi kaa e si womi ɔmɛ “ngɛ mi niinɛ nɛ a ji anɔkuale.” Enɛ ɔ tsɔɔ kaa Yehowa ngɔ e biɛ ɔ kɛ anɔkuale Mawu nɛ e ji ɔ kɛ ma nɔ mi kaa e maa ye e si womi ɔmɛ a nɔ.

“‘Nɛ e ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu. Blema ní ɔmɛ be kɛ ho.’ Nɛ Nɔ nɛ e hii si ngɛ matsɛ sɛ ɔ nɔ ɔ de ke: ‘Hyɛ! i ngɛ níhi tsuo pee ehe.’ E de hu ke: ‘Ngmaa, ejakaa munyu nɛ ɔmɛ ngɛ mi niinɛ nɛ a ji anɔkuale.’”—Kpo Jemi 21:4, 5.

Adebɔ níhi kɛ Baiblo ɔ tsuo tsɔɔ bɔ nɛ wa hiɔwe Tsɛ ɔ suhi ngɛ ha kɛ bɔ nɛ e peeɔ e ní ha. Adebɔ níhi haa nɛ wa leɔ Mawu, nɛ wa hɛɛ kɛ suu e he, enɛ ɔ haa nɛ e ba peeɔ wa Huɛ nitsɛnitsɛ. Baiblo ɔ hu de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yakobo 4:8) Ní Tsumi 17:27 ɔ hu tsɔɔ kaa: “E kɛ wa ti nɔ fɛɛ nɔ he kɛ we.”

Ke o ngɔ be kɛ kase Mawu he ní nɛ o ba le lɛ ɔ, o ma ba ná nɔ mi mami wawɛɛ kaa ‘e susuɔ o he.’ (1 Petro 5:7) Ke o ba ná nɔ mi mami kaa Yehowa susuɔ o he ɔ, kɛ o ma ná he se ha kɛɛ?

Mo susu Toru nɛ je Japan ɔ sane ɔ he nɛ o hyɛ. E yayo nɛ e ji Kristofo no ɔ nɛ tsɔse lɛ, se e kɛ e he ya wo basabasa peemi kuu ko nɛ a le mɛ kaa yakuza, nɛ ji Japanese Mafia a mi. E de ke: “I he ye kaa Mawu sume mi, nɛ i nu he kaa nihi nɛ i le mɛ nɛ a gbo, titli ɔ nihi nɛ i suɔ a sane wawɛɛ ɔ ji tue gblami kɛ ha mi.” Toru tsɔɔ kaa benɛ e kɛ e he ya bɔ kuu nɛ ɔ kɛ susumi nɛ dɛ nɛ e hɛɛ ɔ ha nɛ e ba pee nɔ ko nɛ “e yi kpɛti wa nɛ e nui nɔ́ he hi nɔ hulɔ.” E tu oti nɛ e kɛ ma e hɛ mi ɔ he munyu ke: “I suɔ nɛ ma gbo kaa niheyo, se i suɔ kaa ma gbe nɔ ko nɛ e he biɛ pe mi loko ma gbo, kɛkɛ ɔ, imi hu ma he biɛ.”

 Se kɛ̃ ɔ, Toru kɛ e yo Hannah kase Baiblo ɔ. Toru pee tsakemihi nɛ sa kadimi ngɛ e si himi kɛ e jemi bami mi. Hannah de ke: “I na nɛ ye huno ɔ ngɛ tsakemi nɛ ɔmɛ tsuo pee.” Amlɔ nɛ ɔ, Toru de kɛ nɔ mi mami ke: “Mawu ko ngɛ nɛ e susuɔ wa ti nɔ tsuaa nɔ he. E sume nɛ nɔ ko nɔ ko nɛ gbo, nɛ e pee klaalo kaa e maa ngɔ nihi tsuo nɛ a tsake a tsui ɔ a tɔmihi kɛ pa mɛ. Wa ma nyɛ ma de lɛ níhi nɛ wa be nyɛe maa sɛɛ ha nɔ ko. E buɔ wɔ tue, nɛ e nuɔ níhi nɛ nɔ ko be nyɛe maa nu sisi ha wɔ ɔmɛ hu a sisi. E be kɛe nɛ Yehowa ma je haomi, nɔ́ nami, kɛ piimi tsuo kɛ je. Amlɔ nɛ ɔ po ɔ, e peeɔ níhi nɛ wa hyɛ we blɔ ɔ kɛ yeɔ bua wɔ. E susuɔ wa he nɛ e yeɔ bua wɔ ngɛ haomi behi a mi.”​—La 136:23.

Toru níhi a si kpami ɔ tsɔɔ wɔ nɔ́ ko. Lemi nɛ wa maa le kaa Mawu ma nyɛ ma je oslaahi tsuo kɛ je, nɛ e ma tsu vo nyu tsuo ngɛ wa hɛ mi, nɛ e be kɛe nɛ e maa pee jã a maa ye bua wɔ konɛ wa ná si himi kpakpa amlɔ nɛ ɔ, kɛ hɛ nɔ kami nitsɛ. E ngɛ mi kaa nɔ́ nami hyi je ɔ mi tɔ mohu lɛɛ, se o ma nyɛ ma ná suɔmi nɛ Mawu jeɔ kpo kɛ tsɔɔ wɔ ɔ he se.