1, 2. Ninahi nɛ kɔɔ Yehowa je mluku ɔ blɔ nya tomi ɔ he ɔ woɔ wɔ he wami nɛ waa pee mɛni?

E NGƐ nyakpɛ kaa wa piɛɛ blɔ nya tomi ko nɛ ngɛ je mluku ɔ mi ɔ he. Ninahi nɛ a ngma ngɛ Ezekiel yi 1 kɛ Daniel yi 7 ɔ tsɔɔ blɔ nya nɛ Yehowa ngɛ toe konɛ e ha nɛ e yi mi tomi nɛ ba mi ɔ mi fitsofitso. Yesu ngɛ Yehowa blɔ nya tomi ɔ fã nɛ ngɛ zugba a nɔ ɔ hɛ mi nyɛɛe. E ngɛ blɔ nya tomi ɔ kudɔe konɛ e tsu fiɛɛmi nítsumi ɔ, nɛ e tsɔɔ nihi nɛ a ngɛ fiɛɛe ɔ ní, nɛ́ e wo mɛ he wami, konɛ e ye bua nihi nɛ a ba sɔmɔ Yehowa. Enɛ ɔ ha nɛ wa náa hɛ kɛ nɔ fɔmi ngɛ Yehowa blɔ nya tomi ɔ mi!—Mat. 24:45.

² Anɛ wa ti nɔ tsuaa nɔ ngɛ bɔnɛ blɔ nya tomi kpakpa nɛ ɔ peeɔ e ní ha a kasee lo? Anɛ kã nɛ wa ngɛ kɛ ha anɔkuale ɔ ngɛ hɛ mi yae aloo e ngɛ si bae? Eko ɔ, o maa na kaa kã nɛ o ngɛ ɔ ngɛ si bae. E ma nyɛ maa ba jã. Ngɛ kaseli ɔmɛ a be ɔ mi ɔ, bɔfo Paulo kai e nyɛmimɛ Kristofoli konɛ a susu kã nɛ Yesu pee ɔ he. Paulo tsɔɔ kaa enɛ ɔ maa ye bua mɛ ‘konɛ pɔ kó tɔ a he nɛ a kɔni mi ba jɔ̃.’ (Heb. 12:3) Ngɛ munyu nɛ wa kase kɛ sɛ hlami ɔ mi ɔ, wa susu nítsumi kpakpa nɛ Yehowa blɔ nya tomi ɔ ngɛ tsue mwɔnɛ ɔ he. Kaa bɔnɛ Kristo nɔ hyɛmi nɔ́ ɔ wo blema Kristofoli ɔmɛ he wami ɔ, jã nɔuu kɛ̃ nɛ Yehowa blɔ nya tomi ɔ maa ye bua wɔ mwɔnɛ ɔ konɛ wa fi si ngɛ Mawu jami mi, nɛ waa ya nɔ nɛ waa pee kã.

3. Mɛni e sa nɛ waa pee konɛ wa kɔni mi nɛ ko jɔ, nɛ mɛni he wa ma susu ngɛ munyu nɛ ɔ mi?

³ Se Paulo tsɔɔ kaa ke wa sume nɛ wa kɔni mi nɛ jɔ ɔ, e sa nɛ waa pee babauu ngɛ Mawu sɔmɔmi ɔ mi. E de ke e he hia nɛ waa ya nɔ nɛ waa ‘pee nɔ́ kpakpa.’ (Gal. 6:9) Enɛ ɔ tsɔɔ kaa e sa nɛ waa pee nɔ́ ko. Nyɛ ha nɛ wa susu níhi enuɔ nɛ e sa kaa waa pee konɛ waa ya nɔ nɛ waa pee kã nɛ waa kɛ Yehowa blɔ nya tomi ɔ nɛ nyɛɛ ɔ he. Kɛkɛ ɔ, wa ti nɔ tsuaa nɔ maa hyɛ keji ní komɛ ngɛ nɛ e sa kaa wɔ aloo wa weku ɔ nɛ bɔ he mɔde wawɛɛ.

4. Mɛni heje wa ma nyɛ ma de kaa e he hia kaa nihi nɛ a jaa Mawu ngɛ anɔkuale mi ɔ nɛ a bua a he nya a?

⁴ Nɔ́ nɛ Yehowa webi peeɔ kɛ je blema ji kaa a buaa a he nya. Yehowa kɛ e bɔfo ɔmɛ kpeɔ ngɛ hiɔwe. (1 Ma. 22:19; Hiob 1:6; 2:1; Dan. 7:10) Mawu de blema Israelbi ɔmɛ ke a bua a he nya “konɛ nɔ tsuaa nɔ nɛ ba nu” Mawu munyu ɔ nɛ e kase. (5 Mose 31:10-12) Yudabi nɛ a hi si ngɛ kaseli ɔmɛ a be ɔ mi ɔ ya kpeɔ ngɛ kpe he ɔmɛ daa nɛ a kaneɔ Ngmami ɔ. (Luka 4:16; Níts. 15:21) Benɛ a to Kristofoli asafo ɔ sisi ɔ, a yaa nɔ nɛ a kpeɔ nɛ a jaa Mawu, nɛ jã kɛ̃ nɛ e ji mwɔnɛ ɔ. Anɔkuale Kristofoli ‘susuɔ a sibi a he, nɛ a suɔ a sibi, nɛ a woɔ a sibi he wami, nɛ a tsuɔ nítsumi kpakpa.’—Heb. 10:24, 25.

5. Mɛni wa maa pee kɛ wo wa sibi he wami ke wa ya kpehi?

⁵ Munyuhi a heto nɛ wa haa ngɛ kpehi a sisi ɔ ji blɔ kake nɛ he hia nɛ wa guu nɔ kɛ woɔ wa sibi he wami. Kaa nɔ hyɛmi nɔ́ ɔ, wa ma nyɛ ma ha sane nɛ a bi ngɛ kuku ɔ mi ɔ heto, aloo wa maa tu ngmami ko he munyu, aloo wa ma ha níhi a si kpami kpiti ko nɛ tsɔɔ bɔnɛ Baiblo sisi tomi mlaahi yeɔ bua wɔ ha. (La 22:22; 40:9) Wa ngɛ asafo ɔ mi kɛ jio, wa ji ni hehi jio, munyuhi a heto nɛ nikɔtɔmahi kɛ jokuɛwi tsuo haa ngɛ asafo mi kpehi a sisi ɔ woɔ wɔ he wami wawɛɛ.

6. Mɛni blɔhi a nɔ asafo mi kpehi nɛ wa yaa a yeɔ bua wɔ ngɛ?

⁶ Asafo mi kpehi, kɛ kpe wawi, kɛ kpe nguahi nɛ wa yaa a yeɔ bua wɔ ngɛ blɔhi fuu a nɔ. Kaa nɔ hyɛmi nɔ́ ɔ, e yeɔ bua wɔ nɛ waa kɛ kã fiɛɛɔ ke nihi nɛ a ngɛ wa zugba kpɔ ɔ mi ɔ te si kɛ wo wɔ aloo a bui wɔ tue po. (Níts. 4:23, 31) Ngmami ɔ he nɛ wa susuɔ ɔ haa nɛ wa hemi kɛ yemi ɔ mi waa. (Níts. 15:32; Rom. 1:11, 12) Wa he nya nɛ waa kɛ wa nyɛmimɛ nyumuhi kɛ yihi buaa a woɔ wa bua nɛ ‘haomi be mi tete po ɔ, wa bua jɔɔ.’ (La 94:12, 13) Ní Tsɔɔmi Ajla Toli nɛ a ngɛ Blɔ Tsɔɔmi Ajla Toli ɔmɛ a sisi ɔ toɔ kpehi a he blɔ nya kɛ haa Yehowa webi, konɛ a tsɔɔ mɛ ní. Wa bua jɔɔ ní kpakpahi nɛ a tsɔɔ wɔ ngɛ asafo mi kpehi nɛ wa yaa daa otsi ɔ he wawɛɛ nitsɛ!

7, 8. (a) Mɛni heje nɛ e he hia wawɛɛ kaa waa ya asafo mi kpehi ɔ? (b) Mɛni blɔ nɔ asafo mi kpehi ye bua mo ngɛ?

⁷ Pi se nami nɛ ɔmɛ pɛ a he je nɛ wa yaa asafo mi kpehi ngɛ. Nɔ́ titli heje nɛ wa yaa asafo mi kpehi ji, nɛ́ wa ja Yehowa. (Kane La 95:6.) E ji he blɔ ngua kaa wa ma la kɛ je wa Mawu ɔ yi! (Kol. 3:16) Jehanɛ se hu ɔ, wa jeɔ Yehowa yi kɛ guu asafo mi kpehi nɛ wa yaa daa kɛ munyuhi a heto nɛ wa haa a nɔ. Ngɛ anɔkuale mi ɔ, e sa nɛ wa ja Yehowa ngɛ blɔ nɛ ɔmɛ a nɔ. (Kpoj. 4:11) Enɛ ɔ heje nɛ a wo wɔ he wami kaa wa ko “jɔɔ wa he nya buami kaa bɔnɛ ni komɛ hlaa peemi ɔ” nɛ!—Heb. 10:25.

⁸ Anɛ wa naa asafo mi kpehi kaa nike ní nɛ Yehowa kɛ ha wɔ konɛ e ye bua wɔ nɛ wa nyɛ nɛ waa to wa tsui si kɛ ya si benɛ a ma kpata je yaya nɛ ɔ hɛ mi lo? Ke jã a, wa maa na asafo mi kpehi kaa a piɛɛ “níhi nɛ a he hia wawɛɛ” ngɛ wa si himi mi ɔ a he, nɛ wa be asafo mi kpehi a mi poe. (Filip. 1:10, NW) E sɛ nɛ waa po asafo mi kpehi a mi kɔkɔɔkɔ, ja wa ya je si himi ko mi nɛ e he nɔ́ ko be hie peemi.

9. Kɛ wa plɛ kɛ le kaa fiɛɛmi nítsumi ɔ he hia kɛɛ?

⁹ Ke waa kɛ kã tsuɔ fiɛɛmi nítsumi ɔ, lɔɔ hu yeɔ bua wɔ nɛ waa kɛ Yehowa blɔ nya tomi ɔ nyɛɛɔ. Yesu je fiɛɛmi nítsumi ɔ sisi benɛ e ba zugba a nɔ ɔ. (Mat.  28:19, 20) Kɛ je jamɛ a be ɔ mi ɔ, Matsɛ Yemi fiɛɛmi kɛ kaselɔ peemi nítsumi ɔ ji nɔ́ titli nɛ Yehowa blɔ nya tomi ɔ tsuɔ. Níhi a si kpamihi fuu tsɔɔ kaa hiɔwe bɔfohi fi wa nítsumi ɔ se, nɛ a tsɔɔ wɔ blɔ kɛ yaa ‘ni nɛmɛ nɛ a suɔ neneene wami ɔ’ a ngɔ. (Níts. 13:48; Kpoj. 14:6, 7) Mwɔnɛ ɔ, Yehowa blɔ nya tomi ɔ fã nɛ ngɛ zugba a nɔ ɔ ngɛ nítsumi nɛ he hia wawɛɛ nɛ ɔ tsue. Anɛ fiɛɛmi nítsumi ɔ ji nɔ́ nɛ he hia wɔ wawɛɛ ngɛ wa si himi mi lo?

10. (a) Mɛni nyɛminyumu ko pee nɛ lɔɔ ha nɛ suɔmi nɛ e ngɛ kɛ ha anɔkuale ɔ mi wa. (b) Mɛni blɔ nɔ sɔmɔmi nítsumi ɔ ye bua mo nɛ o kɔni mi wui nyu ngɛ?

¹⁰ Ke waa kɛ kã tsuɔ fiɛɛmi nítsumi ɔ, lɔɔ maa ye bua wɔ nɛ wa bua maa jɔ anɔkuale ɔ he daa. Mo susu nɔ́ nɛ nyɛminyumu ko nɛ a tsɛɛ lɛ ke Mitchel, nɛ e kɛ jeha babauu sɔmɔ kaa asafo mi nɔkɔtɔma kɛ daa blɔ gbalɔ ɔ de ɔ he nɛ o hyɛ. E de ke: “Ye bua jɔ anɔkuale ɔ nɛ i fiɛɛɔ kɛ haa nihi ɔ he. Ke Hwɔɔmi Mɔ aloo Awake! ɔ ehe ko ba nɛ i kane nɛ i na bɔnɛ munyu nɛ ngɛ mi ɔ mi tsɔ, nɛ sisi numi ngɛ he ha a, ye bua jɔɔ wawɛɛ. I suɔ nɛ ma ya fiɛɛmi konɛ ma na bɔnɛ nihi maa pee a ní ngɛ he ha, kɛ nɔ́ nɛ ma pee konɛ a bua nɛ jɔ. Fiɛɛmi nítsumi ɔ ha nɛ ye hɛ ngɛ ye he nɔ ngɛ mumi mi. I bɔɔ mɔde konɛ nɔ́ ko nɛ ko tsi fiɛɛmi nɛ ma ya a nya.” Jã nɔuu kɛ̃ nɛ ke wɔ hu wa hɛ dɔɔ ngɛ Mawu jami mi níhi a he ɔ, wa maa ya nɔ ma fi si ngɛ nyagbe ligbi nɛ ɔmɛ a mi.—Kane 1 Korintobi 15:58.

11. Mɛni heje nɛ e sa kaa waa kase Baiblo kasemi womihi tsuo nɛ wa nine suɔ nɔ kɛ jee Yehowa ngɔ ɔ?

¹¹ Yehowa ha nɛ a ngma Baiblo kasemi womihi fuu konɛ e kɛ wo wɔ he wami. Atsinyɛ jemi ko be he kaa eko ɔ, o kane womi nɛ ɔmɛ eko, nɛ nɔ́ nɛ o susu ji: ‘Enɛ ɔ lɛɛ ye he tutuutu nɛ a ngma ngɛ! E ngɛ kaa nɔ́ nɛ Yehowa lɛ ha nɛ a ngma ha mi!’ Sisi numi ngɛ he kaa o nu he jã. Yehowa guɔ blɔ nɛ ɔmɛ a nɔ kɛ tsɔɔ wɔ blɔ, nɛ e kudɔɔ wɔ. E de ke: “Ma tsɔɔ mo blɔ nɛ o nyɛɛ nɔ. Ma tsɔɔ mo ní, nɛ ma wo mo ga.” (La 32:8) Anɛ wa bɔɔ mɔde nɛ wa kaseɔ womi nɛ ɔmɛ tsuo nɛ wa susuɔ he lo? Ke wa peeɔ jã a, lɔɔ maa ye bua wɔ nɛ wa maa ya nɔ maa to wa tsui si, konɛ wa sɔmɔ Yehowa ngɛ nyagbe ligbi nɛ mi wa nɛ ɔmɛ a mi.—Kane La 1:1-3; 35:28; 119:97.

12. Mɛni maa ye bua wɔ konɛ waa na kaa Baiblo kasemi womihi nɛ a peeɔ kɛ haa wɔ ɔ he hia?

¹² Ke wa susu dengme nɛ nihi gboɔ loko wa nine suɔ womi ɔmɛ a nɔ ɔ, wa maa bu womi ɔmɛ kaa a he hia wawɛɛ. Womi Ngmami Ajla Toli nɛ a tsuɔ ní ngɛ Blɔ Tsɔɔmi Ajla Toli ɔmɛ a sisi ɔ nɛ a hyɛɛ womihi a ngmami nɔ. A hlaa níhi a mi, a ngmaa womi, a kaneɔ mi kɛ hyɛɛ kaa e ngɔ lo, a kɛ fonihi woɔ mi, a tsɔɔ sisi kɛ yaa gbi kpahi a mi, nɛ a kɛ fɔɔ Internet ɔ nɔ. Asafo ɔ nítsumi he kɔnihi nɛ fiaa womihi ɔ fiaa womihi kɛ mane ɔ asafohi ngɛ he tsuaa he. Mɛni heje nɛ a tsuɔ nítsumi nɛ ɔmɛ tsuo ɔ? A peeɔ jã konɛ a kɛ tsɔɔ Yehowa webi ní bɔnɛ pee nɛ a ya nɔ nɛ a ye anɔkuale. (Yes. 65:13) Nyɛ ha nɛ waa kane womihi tsuo nɛ wa nine suɔ nɔ kɛ guu Yehowa blɔ nya tomi ɔ nɔ ɔ.—La 119:27.

13, 14. Mɛnɔmɛ nɛ a ngɛ Yehowa blɔ nya tomi ɔ se fĩe ngɛ hiɔwe, nɛ mɛni wɔ hu wa maa pee kɛ fĩ se ngɛ zugba a nɔ?

¹³ Ngɛ nina nɛ Yehowa je kpo kɛ tsɔɔ Yohane ɔ mi ɔ, e na Yesu nɛ e hii si ngɛ okpɔngɔ futaa ko nɔ, nɛ e kɛ nihi nɛ a tsɔɔ Yehowa hɛ mi atua a yaa hwu ta. (Kpoj. 19:11-15) Jehanɛ se hu ɔ, e na anɔkualetsɛmɛ nɛ pɔ mɛ nu nɛ a tle mɛ si kɛ ho hiɔwe ya a, kɛ bɔfo anɔkualetsɛmɛ ɔmɛ nɛ a hii si ngɛ okpɔngɔhi a nɔ ngɛ Yesu se tutuutu. Enɛ ɔ tsɔɔ kaa a fĩ Yesu se kaa a Hɛ Mi Nyɛɛlɔ. (Kpoj. 2:26, 27) Nɔ hyɛmi nɔ́ kpakpa nɛ a pee ɔ tsɔɔ kaa e sa nɛ wa fĩ nihi nɛ a ngɛ Yehowa blɔ nya tomi ɔ hɛ mi nyɛɛe ɔ a se!

¹⁴ Jã nɔuu nɛ nimli asafo ɔ hu fĩ nítsumi nɛ Kristo nyɛmimɛ nɛ a pɔ mɛ nu nɛ a ngɛ zugba a nɔ loloolo ɔ ngɛ tsue ɔ se. Kristofoli nɛ a pɔ mɛ nu ɔ ji nihi nɛ a ngɛ blɔ nya tomi ɔ hɛ mi nyɛɛe mwɔnɛ ɔ. (Kane Zakaria 8:23.) Mɛni blɔ nɔ wa ti nɔ tsuaa nɔ maa gu kɛ fi Yehowa blɔ nya tomi ɔ se? Blɔ kake nɔ nɛ wa ma nyɛ maa gu kɛ pee jã ji nɛ wa maa ba wa he si kɛ ha nihi nɛ a nyɛɛ hɛ mi ngɛ asafo ɔ mi ɔ. (Heb. 13:7, 17) E sa nɛ waa ba wa he si kɛ ha asafo mi nikɔtɔmahi nɛ a ngɛ wa we asafo ɔ mi ɔ. Anɛ munyu nɛ wa tuɔ kɛ kɔɔ asafo mi nikɔtɔma amɛ a he ɔ tsɔɔ kaa wa ngɛ bumi kɛ ha mɛ kaa mɛ nɛ a hyɛɛ wa nɔ lo? Anɛ wa woɔ wa bimɛ he wami konɛ a bu asafo mi nikɔtɔma amɛ, konɛ a hla Ngmami ɔ mi ga womi kɛ je a dɛ lo? Jehanɛ se hu ɔ, anɛ waa kɛ wa weku mi bimɛ susuɔ bɔnɛ waa kɛ sika ma fĩ je kɛ wɛ fiɛɛmi nítsumi ɔ se ha a he lo? (Abɛ 3:9; 1 Kor. 16:2; 2 Kor. 8:12) Anɛ wa yeɔ bua kɛ dlaa Matsɛ Yemi Asa a nɔ lo? Ke wa jeɔ bumi kpo kɛ haa asafo mi nikɔtɔma amɛ, nɛ kake peemi ngɛ wa kpɛti ɔ, Yehowa mumi ɔ hiɔ asafo ɔ nɔ. Yehowa mumi ɔ yaa nɔ nɛ e yeɔ buaa wɔ nɛ pɔ tɔɛ wa he ngɛ nyagbe ligbi nɛ ɔmɛ a mi.—Yes. 40:29-31.

15. Mɛni heje nɛ e sa nɛ waa ya nɔ nɛ waa bɔ mɔde wawɛɛ konɛ wa nyɛ nɛ waa pee nɔ́ nɛ da a?

¹⁵ Ke wa suɔ nɛ waa to wa tsui si nɛ waa kɛ Yehowa blɔ nya tomi ɔ nɛ nyɛɛ ɔ, e sa nɛ waa pee Yehowa “suɔmi nya ní.” (Efe. 5:10, 11) Satan, kɛ e je yaya a, kɛ mluku nɛ wa yi ɔ ha nɛ e yee ha wɔ kaa wa maa pee nɔ́ nɛ da. Wa nyɛmimɛ nyumuhi kɛ yihi nɛ wa suɔ nyɛ sane, wa le kaa daa ligbi ɔ, nyɛ ti ni komɛ bɔɔ mɔde wawɛɛ konɛ huɛ bɔmi kpakpa nɛ ngɛ nyɛɛ kɛ Yehowa nyɛ kpɛti ɔ nɛ hi si daa. Enɛ ɔ ha nɛ Yehowa suɔ nyɛ sane wawɛɛ. Nyɛ kɔni nɛ ko gbo! Ke wa ba wa je mi ngɛ blɔ nɛ maa sa Yehowa hɛ mi nɔ ɔ, wa tsui maa nɔ wa mi ngɛ si himi mi wawɛɛ, nɛ e maa kplɛɛ jami nɛ waa kɛ haa lɛ ɔ nɔ.—1 Kor. 9:24-27.

16, 17. (a) Ke wa pee yayami nɛ hɛdɔ ngɛ he ɔ, mɛni e sa kaa waa pee? (b) Mɛni wa ma nyɛ maa kase ngɛ Anne he?

¹⁶ Ke wa pee yayami nɛ hɛdɔ ngɛ he ɔ, mɛni e sa kaa waa pee? E sa kaa wa ha nɛ a ye bua wɔ amlɔ nɔuu. Ke wa laa yayami nɛ wa pee ɔ nɔ ɔ, e maa ye wɔ awi. Mo kai kaa David de ke benɛ e pee kɔ̃ kɛ fɔ e yayami ɔmɛ a nɔ ɔ, ‘kɛmɛmi kɛkɛ nɛ e hii kɛmɛe, nɛ lɔɔ ha nɛ e nɔmlɔtso ɔ gbɔjɔ.’ (La 32:3) Niinɛ, ke nɔ ko pee yayami nɛ e laa nɔ ɔ, lɔɔ haa nɛ e yeɔ tsui, nɛ huɛ bɔmi nɛ ngɛ e kɛ Yehowa a kpɛti ɔ puɛɔ, se ‘ke e jaje e yayami ɔ nɛ e kpa yayami peemi ɔ, a maa na lɛ mɔbɔ.’—Abɛ 28:13.

¹⁷ Mo susu Anne * he nɛ o hyɛ. Benɛ e piɛɛ bɔɔ nɛ Anne maa ye jeha nyingmi enyɔ ɔ, e sɔmɔ kaa daa blɔ gbalɔ. Se pee se ɔ, e kɛ e he wo je mi bami yaya mi. Enɛ ɔ ha nɛ e he nile hao lɛ. E de ke: “Ye he nile fiaa mi kpa wawɛɛ. Be tsuaa be ɔ, ye bua jɔɛ, nɛ i hao ɔ.” Mɛni e pee? E tsɔɔ kaa ligbi ko nɛ e ya asafo mi kpe ɔ, a susu Yakobo 5:14, 15 ɔ he. Anne yɔse kaa e sa nɛ a ye bua lɛ, enɛ ɔ heje ɔ, e ya asafo mi nikɔtɔma amɛ a ngɔ konɛ a ye bua lɛ. E ye ha lɛ kaa e ma de asafo mi nikɔtɔma amɛ, se e tsɔɔ kaa e ngɛ kaa nɔ́ nɛ e be he wami nɛ Yehowa ha lɛ tsopa nɛ́ e sa kaa e nu. E de ke: “Tsopa a numi yee, se e tsaa nɔ.” Amlɔ nɛ ɔ, Anne kɛ he nile kpakpa ngɛ Yehowa sɔmɔe kɛ kã ekohu.

18. Mɛni e sa kaa waa mwɔ wa yi mi kpɔ kaa wa maa pee?

¹⁸ E ji he blɔ ngua nɛ wa ná kaa wa piɛɛ Yehowa blɔ nya tomi ɔ he ngɛ nyagbe ligbi nɛ ɔmɛ a mi! Nyɛ ha nɛ waa mwɔ wa yi mi kpɔ kaa wa be hae nɛ he blɔ nɛ ɔ nɛ je wa dɛ kɔkɔɔkɔ. Mohu ɔ, nyɛ ha nɛ waa kɛ wa weku ɔ nɛ bɔ mɔde nɛ waa ya asafo mi kpehi daa, nɛ waa kɛ kã nɛ hla nihi nɛ a hɛɛ tsui kpakpa nɛ a ngɛ wa zugba kpɔ ɔ mi ɔ, nɛ waa kane Baiblo kasemi womihi nɛ a peeɔ kɛ haa wɔ ɔ. Nyɛ ha nɛ wa fĩ nihi nɛ a nyɛɛ hɛ mi ɔ hu a se, nɛ waa ba wa je mi ngɛ blɔ nɛ maa sa Mawu hɛ mi nɔ. Ke wa pee jã a, waa kɛ Yehowa blɔ nya tomi ɔ maa nyɛɛ konɛ wa kɔni mi nɛ ko wo nyu!