1, 2. (a) Ke a ke odase ji nɔ ko ɔ, mɛni e tsɔɔ? Kɛ wa naa amaniɛ bɔmihi nɛ yaa nɔ ngɛ adafi fiami womihi, redio, kɛ tiivi nɔ ɔ ha kɛɛ? (b) Mɛni he je nɛ Yehowa kɛ e hɛ fɔɛ oposide bi nɛ a ngɛ je ɔ mi ɔ a nɔ ɔ?

KE A ke odase ji nɔ ko ɔ, mɛni e tsɔɔ? Munyunguhi a sisi tsɔɔmi womi ko tsɔɔ odase sisi ke: “Nɔ ko nɛ nɔ́ ko ya nɔ ngɛ e hɛ mi nɛ e ngɛ he amaniɛ bɔe.” Kaa nɔ hyɛmi nɔ́ ɔ, a pee adafi fiami womi ko ngɛ South Africa ma nɛ ji Pietermaritzburg ɔ mi. A tsɛɛ adafi fiami womi nɛ ɔ ke The Witness. Kɛ je benɛ a bɔni jamɛ a adafi fiami womi ɔ peemi nɛ ɔ, jeha 160 be. Biɛ nɛ a kɛ ha jamɛ a adafi fiami womi ɔ sa saminya, ejakaa yi mi tomi he je nɛ a pee jamɛ a adafi fiami womi ɔ ji, konɛ a kɛ fia níhi nɛ yaa nɔ ngɛ je ɔ mi ɔ he adafi pɛpɛɛpɛ. Nɔ nɛ kɛ adafi fiami womi nɛ ji The Witness ɔ ba a, tsɔɔ kaa a “be lakpa munyu ko ngmae ngɛ womi ɔ mi gblegbleegble. Anɔkuale munyuhi pɛ nɛ a maa ngma ngɛ mi.”

² Se aywilɛho sane ji kaa a tui anɔkuale sisiisi ngɛ redio kɛ tiivi nɔ, kɛ adafi fiami womihi a mi. Enɛ ɔ he ɔ, Mawu ope ɔ tsɔɔ kaa e maa gu ni komɛ nɛ pi oposide bi ji mɛ ɔ a nɔ kɛ ha nɛ nihi nɛ a le lɛ. E de kɛ gu Ezekiel nɔ ke: ‘Je ma amɛ tsuo maa le kaa imi ji Yehowa.’ (Eze. 39:7) Je Mluku ɔ Matsɛ ɔ kɛ e hɛ fɔɛ oposide bi nɛ a ngɛ je nɛ ɔ mi ɔ a nɔ. E ngɛ Odasefohi maa pee kaa ayɔ kpaanyɔ nɛ a ngɛ nihi nɛ a ngɛ je ma amɛ tsuo a mi ɔ, e he ní tsɔɔe. A ngɛ mɛ níhi nɛ  Yehowa pee ha adesahi blema, kɛ níhi nɛ e ngɛ pee ha adesahi mwɔnɛ ɔ tsɔɔe. Jehanɛ se hu ɔ, Mawu we odase ɔmɛ ngɛ nihi tsɔɔe kaa Mawu wo si kaa hwɔɔ se ɔ, e maa pee ní kpakpahi ha adesahi. Ke waa kɛ kã yeɔ Mawu he odase ɔ, lɔ ɔ tsɔɔ kaa wa ngɛ biɛ nɛ e kɛ fɔ wa nɔ ɔ nya ní tsue kaa bɔ nɛ Yesaya 43:10 tsɔɔ ɔ. Yehowa de ngɛ lejɛ ɔ ke: ‘Mo ji ye we odase. Imi ji nɔ nɛ hla mo, konɛ o pee ye tsɔlɔ.’

3, 4. (a) Mɛni be Baiblo Kaseli ɔmɛ tsake a biɛ? Kɛ a pee a ní ngɛ biɛ ehe nɛ a kɛ tsɛɛ mɛ ɔ he ha kɛɛ? (Moo hyɛ foni nɛ ngɛ ni kasemi ɔ sisije ɔ.) (b) Mɛni sane bimihi a he nɛ wa ma susu?

³ E ji he blɔ ngua nɛ wa ná kaa a kɛ Yehowa biɛ ɔ tsɛɔ wɔ, ejakaa e ji “Neneene Matsɛ.” E de ke: “Biɛ nɛ ɔ ji ye biɛ kɛ yaa neneene, nɛ yi nɔhi nɛ maa ba a, mɛ hu a ma tsɛ mi jã.” (1 Tim. 1:17; 2 Mose 3:15; kɛ to Fiɛlɔ 2:16 he.) Ngɛ jeha 1931 ɔ mi ɔ, Baiblo Kaseli ɔmɛ ngɔ biɛ nɛ ji Yehowa Odasefohi ɔ kɛ fɔ a nɔ. Pee se ɔ, nihi fuu ngma sɛ womi kɛ tsɔɔ kaa a bua jɔ jamɛ a biɛ ɔ he. Asafo ko nɛ ngɛ Canada a ngma ke: “Wa bua jɔ wawɛɛ kaa wa ji Yehowa we odasefohi. Enɛ ɔ ha nɛ wa mwɔ wa yi mi kpɔ kaa wa ma tsu biɛ ɔ nya ní.”

⁴ Mɛni blɔ nɔ o maa gu kɛ tsɔɔ kaa o bua jɔ Mawu biɛ ɔ nɛ a kɛ tsɛɔ mo ɔ he? Jehanɛ se hu ɔ, anɛ o ma nyɛ maa tsɔɔ ngmami nɛ wa je biɛ Yehowa Odasefohi ɔ kɛ je mi ɔ nya lo?

5, 6. (a) Ngɛ mɛni blɔ nɔ fɔli nɛ a hi Israel ɔ ye Yehowa he odase? (b) Mɛni hu a fã fɔli nɛ a hi Israel ɔ kaa a pee, nɛ mɛni he je nɛ e he hia nɛ fɔli nɛ a ngɛ mwɔnɛ ɔ hu nɛ a pee jã?

⁵ Israel bi nɛ a hi si ngɛ Yesaya be ɔ mi ɔ ji Yehowa we ‘odasehi,’ nɛ Israel ma mluku ɔ ji Yehowa “tsɔlɔ.” (Yes. 43:10) Blɔ kake nɛ fɔli nɛ a hi Israel ɔ gu kɛ ye Mawu he odase ji kaa a tsɔɔ a bimɛ níhi nɛ Mawu pee ha a nɛmɛ ɔmɛ. Kaa nɔ hyɛmi nɔ́ ɔ, benɛ Yehowa ngɛ Israel  bi ɔmɛ tsɔɔe kaa a ye Hetsɔmi ɔ daa jeha a, e de mɛ ke: ‘Ke nyɛ bimɛ bi nyɛ ke, “Kusumi nɛ ɔ sisi nɛɛ?” ɔ, nyɛ de mɛ ke, “Yehowa Hetsɔmi ɔ bɔ sami ɔ ji nɛ ɔ nɛ; ejakaa e tsɔ Israel bi ɔmɛ a he ngɛ Egipt. E gbe Egipt bi ɔmɛ, se wɔ lɛɛ e ha wa yi na wami.” Kɛkɛ nɛ ni ɔmɛ ma a yi si nɛ a ja Mawu.’ (2 Mose 12:26, 27) Eko ɔ, fɔli ɔmɛ ma de a bimɛ ɔmɛ kaa Farao sume kaa e maa ngmɛɛ Israel bi ɔmɛ a he konɛ a ya ja Yehowa ngɛ nga a nɔ. Farao de ke: ‘Mɛnɔ ji jamɛ a Yehowa a? Mɛni he je nɛ e sa kaa ma bu e gbi tue nɛ ma ha Israel nɛ ho ɔ?’ (2 Mose 5:2) Eko ɔ, fɔli ɔmɛ ma de a bimɛ ɔmɛ bɔ nɛ Yehowa plɛ kɛ ha Farao sane bimi ɔ heto ha. Yehowa ngɔ haomihi kakaaka nyɔngma kɛ ba Egipt bi ɔmɛ a nɔ. Pee se ɔ, Yehowa kpata Egipt ta buli ɔmɛ a hɛ mi ngɛ Wo Tsu ɔ mi. Yehowa tsɔɔ kaa lɛ ji Ope ɔ nɛ. Jehanɛ se hu ɔ, Israel bi ɔmɛ na kaa Yehowa ji anɔkuale Mawu, nɛ be tsuaa be ɔ, e yeɔ e si womi nɔ.

⁶ Atsinyɛ jemi ko be he kaa Israel bi ɔmɛ tsɔɔ a bimɛ, kɛ ma se bi nɛ a ji a nyɔguɛhi ɔ nyakpɛ níhi nɛ Yehowa pee ha mɛ ɔ. A fã fɔli kaa a tsɔse a bimɛ konɛ a ye Mawu mlaahi a nɔ, nɛ a pee a he klɔuklɔu. Yehowa de ke: ‘Nyɛɛ pee nyɛ he klɔuklɔu, ejakaa imi Yehowa, nyɛ Mawu ɔ, i ngɛ klɔuklɔu.’ (3 Mose 19:2; 5 Mose 6:6, 7) E sa nɛ fɔli nɛ a ngɛ mwɔnɛ ɔ hu nɛ a pee jã. E sa nɛ a tsɔse a bimɛ konɛ a wo Mawu biɛ klɔuklɔu ɔ hɛ mi nyami!—Kane Abɛ 1:8; Efeso Bi 6:4.

7. (a) Benɛ Israel bi ɔmɛ ye Yehowa anɔkuale ɔ, kɛ mahi nɛ bɔle mɛ ɔ pee a ní ha kɛɛ? (b) Mɛni e sa kaa nihi nɛ Mawu biɛ ɔ fɔɔ si ngɛ a nɔ ɔ nɛ a pee?

⁷ Benɛ Israel bi ɔmɛ bu Mawu tue ɔ, a nyɛ nɛ a ye Mawu biɛ ɔ he odase kpakpa. A de mɛ ke: ‘Je ma amɛ tsuo maa na kaa Yehowa hla nyɛ nɛ nyɛɛ pee lɛ nitsɛ e ma, nɛ a maa ye nyɛ gbeye.’ (5 Mose 28:10) Se dɔmi sane ji kaa behi fuu ɔ, Israel bi ɔmɛ yi Mawu anɔkuale. A ja Kanaan bi a mawuhi kɛ a we amagahi. Jamɛ a mawu ɔmɛ a yi mi wa, enɛ ɔ he ɔ, mɛ hu a yi mi ba wa. A sã a bimɛ ngɛ la mi, nɛ a wa ohiatsɛmɛ yi mi. Enɛ ɔ ha nɛ wa na kaa e sa nɛ waa kase Yehowa, nɛ waa pee wa he klɔuklɔu, ejakaa Yehowa ji Nɔ Klɔuklɔu Pe Kulaa, nɛ e biɛ hu ngɛ wa nɔ!

8. Mɛni Yehowa fã Yesaya kaa e pee, nɛ kɛ Yesaya pee e ní ha kɛɛ?

⁸ Yehowa gba kɛ fɔ si kaa e ma kpɔ̃ Israel bi ɔmɛ kɛ je nyɔguɛ yemi mi nɛ a maa na kɛ a hɛngmɛ. (Yes. 43:19) Yesaya yi kake kɛ ya si yi ekpa a tsɔɔ haomi komɛ nɛ maa ba Yerusalem kɛ mahi nɛ bɔle Yerusalem ɔ a nɔ. Yehowa le níhi nɛ ngɛ adesa tsui mi. E de Yesaya kaa Israel bi ɔmɛ be e munyu ɔ tue bue mohu lɛɛ, se e ya nɔ nɛ e bɔ mɛ kɔkɔ. Enɛ ɔ pee Yesaya nyakpɛ, nɛ e suɔ kaa e maa le be nɛ Mawu we bi ɔmɛ ma tsake a tsui. Mawu de lɛ ke: “Kɛ yaa su be nɛ ma amɛ a hɛ mi ma kpata, nɛ a maa pee ma dokuhi nɛ a be nɔ ko nɔ ko nae ngɛ we ɔmɛ a mi, nɛ zugba a nitsɛ hu nɔ maa je gu.”—Kane Yesaya 6:8-11.

9. (a) Mɛni be gbami nɛ Yesaya gba kɛ kɔ Yerusalem he ɔ ba mi? (b) Mwɔnɛ ɔ, mɛni kɔkɔ bɔmi nɛ e he hia kaa nihi nɛ a bu tue?

⁹ Yehowa kɛ fami nɛ ɔ ha Yesaya ngɛ Matsɛ Uzia tsɛ yemi ɔ nyagbe maa pee jeha 778 loko a fɔ Kristo. Yesaya kɛ jeha 46 tsu gbami ní tsumi ɔ. E gba kɛ ya si Matsɛ Hezekia yi nɔ ngɛ jeha 732 loko a fɔ Kristo. A kpata Yerusalem ma a hɛ mi ngɛ jeha 607 loko a fɔ Kristo. Yesaya gba kɛ fɔ si maa pee jeha 125 loko a kpata ma a hɛ mi. Enɛ ɔ he ɔ,  Mawu sɛ hlami kulaa nɛ e bɔ e we bi kɔkɔ ngɛ nɔ́ nɛ maa ba a nɔ hwɔɔ se ɔ he. Mwɔnɛ ɔ hu ɔ, Yehowa ha nɛ e we bi ngɛ nihi kɔkɔ bɔe ngɛ níhi nɛ maa ba hwɔɔ se ɔ a he. Maa pee jeha 135 ji nɛ ɔ, Hwɔɔmi Mɔ ɔ ngɛ nihi kɔkɔ bɔe kaa e be kɛe kulaa nɛ Satan nɔ yemi ɔ maa ba nyagbe, nɛ Yesu Kristo Jeha Akpe Nɔ Yemi ɔ ma ba da nane mi.—Kpoj. 20:1-3, 6.

10, 11. Mɛni gbami Yesaya gba nɛ Israel bi ɔmɛ ye e mi bami he odase?

¹⁰ Yuda bi fuu tsɔ we Babilon bi ɔmɛ a hɛ mi atua. Enɛ ɔ he ɔ, Babilon bi ɔmɛ gbi mɛ, mohu ɔ, benɛ a kpata Yerusalem ma a hɛ mi ɔ, mɛɛ lɛɛ a nuu mɛ nyɔguɛ. (Yer. 27:11, 12) Mawu we bi ɔmɛ ya ye jeha 70 ngɛ nyɔguɛ tso mi. Pee se ɔ, a na kaa gbami nɛ nyɛɛ se nɛ ɔ ba mi: ‘Yehowa, yi wami helɔ, Israel Mawu Klɔuklɔu ɔ, bɔ nɛ e de ji nɛ ɔ nɛ: “Ma tsɔ nihi kɛ ya Babilon tɔɔ kɛ he o yi wami. Ma ku agbo ɔmɛ ngɔ pue si.”’—Yes. 43:14.

¹¹ Yehowa ha nɛ jamɛ a gbami ɔ ba mi ngɛ blɔ nɛ ngɛ nyakpɛ nɔ ngɛ October, jeha 539 loko a fɔ Kristo. Babilon matsɛ ɔ kɛ e ma nimeli ɔmɛ ngɛ ní nue ngɛ kpluhi nɛ a ya muɔɔ ngɛ Yerusalem sɔlemi we ɔ mi ɔ mi, nɛ a ngɛ a mawu ɔmɛ a yi jee. Jamɛ a nyɔ ɔ mi nɔuu ɔ, Media bi kɛ Persia bi a ta buli ba kpata Babilon hɛ mi. Ngɛ jeha 538 aloo jeha 537 loko a fɔ Kristo ɔ mi ɔ, Sirus nɛ kpata Babilon hɛ mi ɔ fã Yuda bi ɔmɛ kaa a ho Yerusalem ya konɛ a ya fia Mawu sɔlemi we ɔ kɛ ma si ekohu. Yesaya gba enɛ ɔ kɛ fɔ si momoomo. E tsɔɔ hu kaa Yehowa wo si kaa e maa bu e we bi nɛ a pia a he nɛ a kpale kɛ ho Yerusalem ya a, a he, nɛ e ma ha mɛ a hiami níhi. Mawu tsɛ mɛ ke “Ye ma nɛ imi nitsɛ i bɔ ha ye he, konɛ a la kɛ je ye yi!” (Yes. 43:21; 44:26-28) Benɛ Yuda bi ɔmɛ kpale a se kɛ ho nɛ a ya fia Yehowa sɔlemi we ɔ kɛ ma si ekohu ɔ, lɔ ɔ ha nɛ a na kaa Yehowa pɛ ji anɔkuale Mawu, nɛ yeɔ e munyu nɔ be tsuaa be.

12, 13. (a) Benɛ Israel bi ɔmɛ kpale ya ma sɔlemi we ɔ, mɛnɔmɛ piɛɛ a he? (b) Mɛni a hyɛɛ blɔ kaa “to kpa” amɛ nɛ a pee be mi nɛ a ngɛ ‘Mawu Israel’ ɔ ye buae ɔ, nɛ mɛni hɛ nɔ kami a ngɛ?

¹² Benɛ Israel bi ɔmɛ kpale ya ma sɔlemi we ɔ ekohu ɔ, ma se nihi ayɔhi abɔ ba piɛ a he kɛ ja Yehowa. (Ezra 2:58, 64, 65; Est. 8:17) Mwɔnɛ ɔ, “nimli asafo” nɛ ji Yesu “to kpa” amɛ hu fĩ nihi nɛ a pɔ mɛ nu nɛ ji ‘Mawu Israel’ ɔ se. (Kpoj. 7:9, 10; Yoh. 10:16; Gal. 6:16) A tsɛɛ nihi nɛ a pɔ mɛ nuɔ ɔ, kɛ nimli asafo ɔ tsuo ke, Yehowa Odasefohi.

¹³ Ngɛ Kristo Jeha Akpe Nɔ Yemi ɔ  mi ɔ, nimli asafo ɔ ma ná he blɔ ngua ko. A ma de nihi nɛ a ma tle mɛ si ɔ si himi nɛ a kɛ kpe ngɛ nyagbe ligbi ɔmɛ a mi ngɛ Yehowa he odase nɛ a ye ɔ he. Se ja wa he tsɔ kɛ pi si loko wa ma nyɛ ma ná he blɔ nɛ ɔ. Wa ngɛ mɔde bɔe kaa wa maa pee Yehowa suɔmi nya ní mohu lɛɛ, se kɛ̃ ɔ, wa tɔ̃ɔ daa ligbi. Enɛ ɔ he ɔ, daa nɛ ɔ, e sa nɛ wa kpa Yehowa pɛɛ nɛ e ngɔ wa he tɔmihi kɛ pa wɔ. Ke wa ya nɔ nɛ wa pee wa he klɔuklɔu ɔ, lɔ ɔ tsɔɔ kaa wa bua jɔ he blɔ ngua nɛ wa ná kaa Yehowa ngɔ e biɛ ɔ kɛ fɔ wa nɔ ɔ he.—Kane 1 Yohane 1:8, 9.

14. Mɛni ji Yehowa biɛ ɔ sisi?

¹⁴ Loko wa bua maa jɔ Mawu biɛ ɔ nɛ a kɛ tsɛɔ wɔ ɔ he saminya a, ja wa nu biɛ ɔ sisi. A je biɛ “Yehowa” a kɛ je Hebri peemimunyu ko nɛ a ma nyɛ maa tsɔɔ sisi ke, “e peeɔ” ɔ mi. Enɛ ɔ he ɔ, Yehowa biɛ ɔ sisi ma nyɛ maa tsɔɔ “O Deɔ O Peeɔ.” Yehowa lɛ e bɔ je mluku ɔ kɛ níhi tsuo nɛ ngɛ mi, nɛ e tsuɔ e yi mi tomihi a he ní. Enɛ ɔ he ɔ, e da blɔ kaa a tsɛɛ lɛ ke Yehowa. Ke Yehowa de ke e maa pee nɔ́ ko ɔ, nɔ ko be nyɛe maa tsi e nya. Satan po be nyɛe maa pee jã.

15. Kaa bɔ nɛ Yehowa de Mose ɔ, mɛni wa kaseɔ ngɛ Yehowa biɛ ɔ he? (Hyɛ daka nɛ ji, “ Biɛ Nɛ E Sisi Numi Mi Kuɔ.”)

¹⁵ Yehowa biɛ ɔ hɛɛ sisi numihi fuu. E ha nɛ Mose le kake. E pee enɛ ɔ benɛ e ngɛ Mose tsɔe konɛ e ya kpɔ̃ Israel bi ɔmɛ kɛ je Egipt ɔ. Baiblo ɔ de ke: “Mawu de Mose ke, ‘Imi Ji Nɔ Nɛ I Ji.’ E ya nɔ nɛ e de ke, ‘Bɔ nɛ o ma de Israel bi ɔmɛ ji, “Nɔ nɛ a tsɛɛ lɛ Imi Ji ɔ tsɔ mi nyɛ ngɔ.”’” (2 Mose 3:14) Enɛ ɔ tsɔɔ kaa Mawu maa pee nɔ́ tsuaa nɔ́ nɛ e he hia kaa e pee konɛ e ha nɛ e yi mi tomi nɛ ba mi. Ngɛ Israel bi ɔmɛ a blɔ fa mi ɔ, Yehowa kpɔ̃ mɛ kɛ je nyɔguɛ yemi mi, e bu a he, e tsɔɔ mɛ blɔ, nɛ e ha mɛ a hiami níhi kɛ níhi nɛ ma ha nɛ a hemi kɛ yemi mi maa wa.

16, 17. (a) Mɛni blɔ nɔ waa maa gu kɛ tsɔɔ kaa wa bua jɔ he blɔ nɛ wa ná kaa a kɛ Mawu biɛ ɔ tsɛɛ wɔ ɔ he? (b) Mɛni he wa ma susu ngɛ ní kasemi nɛ nyɛɛ se ɔ mi?

¹⁶ Mwɔnɛ ɔ hu ɔ, Yehowa ngɛ e biɛ ɔ nya ní tsue. E haa wɔ wa hiami níhi kɛ níhi nɛ maa ye bua wɔ konɛ wa hemi kɛ yemi ɔ mi nɛ wa. Se Mawu biɛ ɔ hɛɛ sisi numi kpa ko hulɔ. E biɛ ɔ tsɔɔ hu kaa e ma nyɛ maa gu nihi nɛ a yeɔ e he odase ɔ a nɔ kɛ tsu e yi mi tomi he ní. Ke enɛ ɔ ngɛ wa juɛmi mi ɔ, lɔ ɔ maa wo wɔ he wami konɛ wa tsu wa biɛ ɔ nya ní. Kaa nɔ hyɛmi nɔ́ ɔ, nyɛminyumu ko ngɛ Norway nɛ a tsɛɛ lɛ ke Kåre. E ye jeha 84. E kɛ kã fiɛɛ jeha 70 sɔuu ji nɛ ɔ. Kåre de ke: “E ji he blɔ ngua nɛ i ná kaa i ngɛ Yehowa nɛ ji, neneene Matsɛ ɔ sɔmɔe. Ye bua hu jɔ kaa i piɛɛ nihi nɛ a kɛ Mawu biɛ klɔuklɔu ɔ tsɛɛ mɛ ɔ a he. E ji he blɔ ngua nitsɛ nɛ i náa kaa ma tsɔɔ nihi Baiblo ɔ mi anɔkuale ɔ. Ke i tsɔɔ nɔ ko anɔkuale ɔ nɛ e nu sisi nɛ e tsui nɔ e mi ɔ, ye bua jɔɔ. Kaa nɔ hyɛmi nɔ́ ɔ, i tsɔɔ mɛ se nami nɛ ngɛ Kristo kpɔmi afɔle sãmi ɔ he. I tsɔɔ mɛ hu kaa kɛ gu Kristo kpɔmi afɔle sami ɔ nɔ ɔ, wa ma ná neneene wami ngɛ je ehe ko mi hwɔɔ se. Jã nɛ i peeɔ ɔ haa nɛ i bua jɔɔ.”

¹⁷ Ngɛ anɔkuale mi ɔ, e yee kaa o maa na nihi nɛ a suɔ kaa a maa kase Mawu he ní. Se kaa bɔ nɛ e ji ngɛ Kåre blɔ fa mi ɔ, ke wa na nɔ kake pɛ po nɛ e suɔ kaa e maa kase Yehowa he ní ɔ, wa bua jɔɔ wawɛɛ nitsɛ. Se mɛni blɔ nɔ wa maa gu kɛ ye Yehowa kɛ Yesu tsuo a he odase? Wa ma susu sane bimi nɛ ɔ he ngɛ ní kasemi nɛ nyɛɛ se ɔ mi.