HƐ MI MUNYU | KE NƆ KO GBO Ɔ, ANƐ E YA HII HE KO LO?
Ke Nɔ Ko Gbo ɔ, Mɛni Si Fɔfɔɛ Mi E Ya Jee?
“Jinɛ i susu kaa nihi nɛ a gbo ɔ yaa hiɔwe, loo hɛl, loo he ko nɛ ngɛ hiɔwe kɛ hɛl a kpɛti nɛ a kɛ la tsukɔɔ nɔ he ngɛ lejɛ ɔ. I le kaa i sɛ kɛ ha hiɔwe yami, se hɛl lɛɛ i he we yi kaa ma ya lejɛ ɔ. He nɛ a tsukɔɔ nɔ he ngɛ ɔ hu, i li bɔ nɛ lejɛ ɔ ngɛ ha tutuutu. I kane we nɔ́ ko kaa jã ngɛ Baiblo ɔ mi hyɛ. Nihi nɛ a hii dee.”
—Lionel.
“A de mi kaa ke nɔ ko gbo ɔ, e yaa hiɔwe, se i he we yi. I susu kaa ke nɔ ko gbo ɔ, kɛkɛ e nɔ́ fɛɛ nɔ́ ba nyagbe. Hɛ nɔ kami ko be kɛ ha lɛ.”
—Fernando.
Ke nɔ ko gbo ɔ, mɛni si fɔfɔɛ mi e ya jee? Anɛ wa suɔli nɛ a gbo ɔ ngɛ nɔ́ nae ngɛ he ko lo? Anɛ wa maa na mɛ ekohu lo? Kɛ wa ma plɛ kɛ le kɛɛ? Eko ɔ, o bi o he sane nɛ ɔmɛ hyɛ. Se ha nɛ waa hyɛ nɔ́ nɛ Baiblo ɔ de. Kekleekle ɔ, wa ma susu nɔ́ nɛ Baiblo ɔ de ngɛ gbenɔ he ɔ he. Lɔ ɔ se ɔ, wa maa hyɛ Mawu Munyu ɔ mi kaa hɛ nɔ kami ko ngɛ kɛ ha ni gbogboe ɔmɛ lo.
Ke nɔ ko gbo ɔ, mɛni si fɔfɔɛ mi e ya jee?
HETO NƐ BAIBLO Ɔ HA: “Niinɛ, nihi nɛ a hɛ ngɛ ɔ le kaa a ma ba gbo; ni gbogboe ɔmɛ lɛɛ a li nɔ́ ko nɔ́ ko. Hiɔwo kpa ko hu a be; ejakaa nihi a hɛ je a nɔ pɛsɛpɛsɛ. Nɔ́ tsuaa nɔ́ nɛ o ngɛ tsue ɔ, tsu kɛ o he wami tsuo. Ejakaa gbeje, he nɛ o maa ya hwɔɔ se ɔ, ní tsumi, loo yi mi susumi, loo nile, loo ga be lejɛ ɔ.” *
Gbeje ji he nɛ ni gbogboehi yaa. E ji okadi peemi he ko loo si fɔfɔɛ ko nɛ ke nɔ ko ya je mi ɔ, e li nɔ́ ko hu. Kɛ Mawu sɔmɔlɔ Hiob na gbeje kɛɛ? Hiob weto níhi tsuo je e dɛ, nɛ e bimɛ tsuo gbo ngɛ ligbi kake mi, nɛ tslɔ fu e he womi nɔ tsuo. E kpa Mawu pɛɛ ke: “I ná nɛ o ngɔ mi ya laa ngɛ gbeje [“ngɛ hɛl,” Catholic Douay Version].” (Hiob 1:13-19; 2:7; 14:13) E ngɛ heii kaa pi nɛ Hiob ngɛ tsɔɔe kaa Mawu nɛ ngɔ lɛ kɛ ya hɛl la mi konɛ e ya na nɔ́ ngɛ lejɛ ɔ pe bɔ nɛ e ngɛ nɔ́ nae ɔ. Mohu ɔ, e na kaa ke e ya lejɛ ɔ, e he mi maa jɔ lɛ.
Blɔ kpa ko hu ngɛ nɛ wa ma nyɛ maa gu nɔ kɛ le si fɔfɔɛ nɛ ni gbogboe ɔmɛ ngɛ mi. Wa ma nyɛ maa na nihi kpaanyɔ komɛ nɛ a tle mɛ si kɛ je gbeje nɛ Mawu ha nɛ a ngma a he munyu ɔ ngɛ Baiblo ɔ mi.
Nihi kpaanyɔ nɛ ɔmɛ a ti nɔ ko nɔ ko de we ke e ya ná bua jɔmi, aloo e ya na nɔ́ ngɛ gbeje. Ke nimli nɛ ɔmɛ kɛ nɔ́ ko kaa jã ya kpe ɔ, jinɛ a ko ba de we lo? Nɛ jinɛ a ko ngmɛ́ ngɛ Baiblo ɔ mi konɛ nɔ fɛɛ nɔ nɛ kane lo? Se a ngmɛ́ nɔ́ ko kaa jã ngɛ Baiblo ɔ mi. E ngɛ heii kaa nimli kpaanyɔ nɛ ɔmɛ be nɔ́ ko nɛ a ma de ngɛ sane nɛ ɔ he. Mɛni he je? Ejakaa benɛ a gbo nɛ a tle we mɛ si lolo ɔ, a be hɛngmengmle, nɛ e ngɛ kaa nɔ́ nɛ a hwɔ mahe vii. Ngɛ anɔkuale mi ɔ, be komɛ ɔ, Baiblo ɔ ngɔɔ gbenɔ kɛ toɔ mahe he. Kaa nɔ hyɛmi nɔ́ ɔ, benɛ Lazaro gbo ɔ, Yesu de ke: “Wa huɛ Lazaro hwɔ mahe, se i yaa nɛ ma ya tsɛ̃ɛ̃ lɛ.”
Mɛni hɛ nɔ kami lɛ ngɛ kɛ ha nihi nɛ a gbo ɔ? Anɛ a hɛ maa tsɛ̃ ligbi ko lo?
^ kk. 7 A tsɔɔ Hebri munyungu nɛ ji “Sheol” kɛ Hela munyungu nɛ ji “Hades” ɔ sisi ke “Gbeje.” Baiblo ɔ tsɔɔ we kaa a piiɔ ni gbogboehi ngɛ gbeje, nɛ e tsɔɔ we hu kaa nihi ya tsaa si himi nɔ ngɛ lejɛ ɔ.
