Benɛ Yesu gbo se ɔ, nyumu ko nɛ a tsɛɛ lɛ ke Yosɛf ɔ ya de Pilato kaa e ngmɛ lɛ blɔ konɛ e ya je Yesu gbogboe ɔ ngɛ tso ɔ nɔ. Yosɛf ngɛ sika wawɛɛ. Yosɛf wo gbogboe ɔ tsopa, nɛ e ngɔ bo kpakpa kɛ blaa lɛ, nɛ e kɛ lɛ ya fɔ yɔkɔ ehe ko mi. E ha nɛ a tsitsɛɛ tɛ agbo ko nɛ e jiɔ kɛ tsi yɔkɔ ɔ nya. Osɔfo nikɔtɔma amɛ de Pilato ke: ‘Wa ngɛ gbeye yee kaa Yesu kaseli ɔmɛ ekomɛ ma ya je e gbogboe ɔ, nɛ a ma ya de nihi ke e kpale ba wami mi.’ Lɔ ɔ he ɔ, Pilato de mɛ ke: ‘Nyɛɛ sɔu yɔkɔ ɔ nya, nɛ nyɛ ha nɛ a bu he.’

Ligbi etɛ se ɔ, yi komɛ ya yɔkɔ ɔ he mɔtu mla. A na kaa a tsitsɛɛ tɛ ɔ kɛ je yɔkɔ ɔ nya. Benɛ a sɛ yɔkɔ ɔ mi ɔ, bɔfo ko de yi ɔmɛ ke: ‘Nyɛ ko ye gbeye. A tle Yesu si. Nyɛ ya de e kaseli ɔmɛ ke a kɛ lɛ nɛ ya kpe ngɛ Galilea.’

Maria Magdalena pee esɔesɔ nɛ e ya hla Petro kɛ Yohane. E de mɛ ke: ‘Yesu gbogboe ɔ be yɔkɔ ɔ mi!’ Petro kɛ Yohane ma fo kɛ ho yɔkɔ ɔ he ya. Benɛ a ya na kaa Yesu gbogboe ɔ be yɔkɔ ɔ mi ɔ, a kpale kɛ ho a wehi a mi ya.

Benɛ Maria kpale kɛ ho yɔkɔ ɔ he ya a, e na Mawu bɔfohi enyɔ ngɛ yɔkɔ ɔ mi. E de mɛ ke: ‘I li he nɛ a ngɔ ye Nyɔmtsɛ ɔ kɛ ho.’ Kɛkɛ nɛ e na nyumu ko. E susu kaa nyumu ɔ nɛ e hyɛɛ abɔɔ ɔ nɔ nɛ e na a nɛ. Lɔ ɔ he ɔ, e de lɛ ke: ‘Etsɛ, i kpa mo pɛɛ nɛ o tsɔɔ mi he nɛ o ngɔ lɛ kɛ ya to.’ Se benɛ nyumu ɔ de ke: “Maria!” a, e na kaa mamoo Yesu lɛ e na a nɛ. E kpa ngmlaa ke: “Tsɔɔlɔ!” nɛ e pɛtɛ Yesu he wawɛɛ. Yesu de lɛ ke: ‘Yaa nɛ o ya de ye nyɛmimɛ ɔmɛ kaa o na mi.’ Amlɔ nɔuu nɛ Maria tu fo kɛ ho kaseli ɔmɛ a ngɔ ya, nɛ e ya de mɛ ke e na Yesu.

Pee se ngɛ ligbi ɔ mi ɔ, kaseli enyɔ komɛ ngɛ blɔ hiae kɛ je Yerusalɛm kɛ yaa Emao. Nyumu ko ba piɛɛ a he ngɛ blɔ ɔ nɔ, nɛ e bi mɛ nɔ́ nɛ a ngɛ sɛɛe. A de lɛ ke: ‘O nui nɔ́ nɛ ba lo? Ligbi etɛ jinɛ ɔ nɛ osɔfo nikɔtɔma amɛ ha nɛ a gbe Yesu. Se yi komɛ ngɛ dee ke e ngɛ wami mi!’ Nyumu ɔ bi mɛ ke: ‘Nyɛ he we  gbali ɔmɛ yi lo? A gba kɛ fɔ si kaa Kristo ɔ ma gbo, nɛ a ma tle lɛ si ekohu.’ E ya nɔ nɛ e tsɔɔ mɛ Ngmami ɔ sisi saminya. Benɛ a su Emao ɔ, kaseli ɔmɛ de nyumu ɔ ke e ba to a ngɔ. Benɛ a yaa ye ní jamɛ a gbɔkuɛ ɔ, nyumu ɔ sɔle, kɛkɛ nɛ a na kaa Yesu ji nyumu ɔ nɛ. Amlɔ nɔuu nɛ e laa ngɛ a kpɛti.

Bɔfo ɔmɛ bua a he nya ngɛ we ko mi ngɛ Yerusalɛm. Kaseli enyɔ ɔmɛ pee esɔ kɛ ho lejɛ ɔ ya, nɛ a ya de mɛ nɔ́ nɛ ba. Benɛ a ngɛ we ɔ mi ɔ, Yesu je e he kpo kɛ tsɔɔ mɛ tsuo. Sisije ɔ, bɔfo ɔmɛ he we yi kaa Yesu lɛ ba lejɛ ɔ nɛ. Enɛ ɔ he ɔ, Yesu de mɛ ke: ‘Nyɛɛ hyɛ ye dɛ mi ha; nyɛɛ ta ye he. A ngma kɛ fɔ si kaa a ma tle Kristo ɔ si kɛ je gbeje.’