1. Jije wa ma nyɛ maa kase níhi nɛ maa ba hwɔɔ se ɔ he ní kɛ je?

ANƐ o nu tiivi aloo hleedio nɔ adafi fiami ko nɛ o bi hyɛ ke, ‘Jije je nɛ ɔ yaa’ lo? Bɔ nɛ oslaahi nɛ ngɛ gbeye baa tlukaa ha he je ɔ, adesa ko be nyɛe maa tsɔɔ nɔ́ nɛ maa ba hwɔɔ se. (Yakobo 4:14) Se Yehowa lɛɛ, e le nɔ́ nɛ maa ba hwɔɔ se. (Yesaya 46:10) Pi ní yayamihi nɛ ngɛ nɔ yae ngɛ wa be nɛ ɔ mi pɛ nɛ e Munyu nɛ ji Baiblo ɔ gba kɛ fɔ si, se kɛ je blema lokoo ɔ, e gba ní kpakpahi nɛ maa ba hwɔɔ se haa nɛ ɔ hu kɛ fɔ si.

2, 3. Mɛni sane Yesu kaseli ɔmɛ bi lɛ, nɛ mɛni heto e ha mɛ?

² Yesu Kristo tu Mawu Matsɛ Yemi nɛ ma ba po yayami peemi se konɛ e pee zugba a paradeiso ɔ he munyu. (Luka 4:43) Nihi suɔ kaa á le be nɛ Matsɛ Yemi ɔ maa ba. Ngɛ anɔkuale mi ɔ, Yesu kaseli ɔmɛ bi lɛ ke: ‘Mɛni okadi maa tsɔɔ kaa o ba, kɛ je nɛ ɔ nyagbe be?’ (Mateo 24:3) Yesu de mɛ ke, Yehowa Mawu pɛ lɛ le be tutuutu nɛ je nɛ ɔ nyagbe maa ba. (Mateo 24:36) Se Yesu tsɔɔ okadi komɛ nɛ maa ba je ɔ mi loko Matsɛ Yemi ɔ maa ngɔ tue mi jɔmi kɛ he  piɛ pomi nitsɛ kɛ ba ha adesahi. Nɔ́ nɛ e de to ɔ ngɛ mi bae mwɔnɛ ɔ!

³ Loko wa ma susu okadi nɛ tsɔɔ kaa wa ngɛ “je nɛ ɔ nyagbe be” ɔ mi he ɔ, ha nɛ wa susu ta ko nɛ a hwu se adesa ko nɛ́ ɔ he nɛ waa hyɛ. A hwu ta nɛ ɔ ngɛ hiɔwe, nɛ nɔ́ nɛ je mi kɛ ba a kɔ wa he.

4, 5. (a) Benɛ a wo Yesu matsɛ pɛ ɔ, mɛni ba ngɛ hiɔwe? (b) Kaa bɔ nɛ Kpojemi 12:12 ɔ tsɔɔ ɔ, mɛni ji nɔ́ nɛ maa je ta nɛ ba ngɛ hiɔwe ɔ mi kɛ ba?

⁴ A tsɔɔ nya ngɛ yi nɛ sɛ yi nɛ ɔ hlami ɔ mi kaa Yesu Kristo bɔni matsɛ yemi ngɛ hiɔwe ngɛ jeha 1914 ɔ mi. (Kane Daniel 7:13, 14.) Benɛ a wo Yesu matsɛ ɔ nɔuu nɛ e pee nɔ́ ko. Baiblo ɔ de ke: “Ta ba te si ngɛ hiɔwe. Bɔfo nguaa a nɛ a tsɛɛ lɛ Mikael ɔ [Yesu biɛ kpa], kɛ e bɔfo ɔmɛ ya tua sinɔ nguaa a [Satan Abosiami], nɛ sinɔ nguaa a, kɛ lɛ hu e bɔfo ɔmɛ kɛ mɛ hwu.” * A ye Satan kɛ e bɔfo yayami ɔmɛ nɛ ji daimonio ɔmɛ a nɔ kunimi, nɛ a fie mɛ kɛ je hiɔwe kɛ ba zugba a nɔ. Mawu bɔfo anɔkualetsɛmɛ ɔmɛ a bua jɔ kaa a fie Satan kɛ e daimonio ɔmɛ. Se adesahi lɛɛ a be bua jɔmi nɛ ɔ eko náe, ejakaa Baiblo ɔ gba kɛ fɔ si ke, “Se je ɔ, kɛ wo, nyɛɛ lɛɛ musu tloo nyɛ! Abosiami kple si kɛ ba nyɛ ngɔ. E mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.”—Kpojemi 12:7, 9, 12.

⁵ Wa kpa mo pɛɛ nɛ o kadi nɔ́ nɛ maa je ta nɛ a hwu ngɛ hiɔwe ɔ mi kɛ ba a. Akɛnɛ Satan mi mi fu he je ɔ, e maa ngɔ haomi kɛ ba nimli nɛ ngɛ zugba a nɔ ɔ a nɔ. Kaa bɔ nɛ o maa na a, wa ngɛ jamɛ a haomi be ɔ mi amlɔ nɛ ɔ. Se e maa pee be kpiti ko pɛ—“be bɔɔ kɛkɛ.” Satan nitsɛ po le jã. Baiblo ɔ tsɛɛ be nɛ ɔ ke “nyagbe ligbi ɔmɛ.”  (2 Timoteo 3:1) E sa nɛ wa ná bua jɔmi kaa, e be kɛe kulaa nɛ Mawu ma je Abosiami ní tsutsui ɔmɛ kɛ je zugba a nɔ! Ha nɛ wa susu ní komɛ nɛ Baiblo ɔ gba kɛ fɔ si nɛ ngɛ mi bae mwɔnɛ ɔ he. Ní nɛ ɔmɛ tsɔɔ kaa wa ngɛ nyagbe ligbi ɔmɛ a mi, nɛ e be kɛe kulaa nɛ Mawu Matsɛ Yemi ɔ maa ngɔ neneene jɔɔmihi kɛ ba ha nihi nɛ suɔ Yehowa a. Kekleekle ɔ, ha nɛ wa susu okadi nɛ Yesu tsɔɔ kaa wa maa na ngɛ wa be nɛ ɔ mi ɔ mi níhi eywiɛ a he.

6, 7. Mɛni blɔ nɔ munyu nɛ Yesu tu kɛ kɔ ta kɛ hwɔ he ɔ ngɛ mi bae mwɔnɛ ɔ?

⁶ “Ma maa te si ngɔ wo ma, nɛ matsɛ yemi maa te si ngɔ wo matsɛ yemi.” (Mateo 24:7) A gbe nimli ayɔhi abɔ ngɛ ta mi ngɛ jeha lafa nɛ be ɔ mi. Britania yi nɔ sane ngmalɔ ko ngma ke: “Ngɛ yi nɔ sanehi tsuo nɛ a ngma fɔ si ɔ mi ɔ, a pue muɔ si ngɛ jeha 1901 kɛ ya si jeha 2000 ɔ mi pe kulaa. . . . E ji jeha lafa nɛ a hwu ta nɔtonɔto ngɛ mi, ejakaa be tsuaa be ɔ, ta ngɛ je ɔ mi he ko, nɛ ke e mi po po ɔ, be kpiti pɛ.” Ní tsumi he ko nɛ hyɛɛ níhi nɛ ngɛ nɔ yae ngɛ je ɔ mi, nɛ ji Worldwatch Institute ɔ hu bɔ amaniɛ ke: “Nihi nɛ ta gbe kɛ je kaseli ɔmɛ a be ɔ mi kɛ ba si jeha 1899 ɔ  mi ɔ bɔ he si etɛ ngɛ jeha 1901 kɛ ya si jeha 2000 ɔ mi.” Kɛ je jeha 1914 kɛ ma nɛ ɔ, nihi nɛ hiɛ pe ayɔ 100 gbo ngɛ ta hwumi dɛ mi. Ke wa suɔlɔ kake gbo ngɛ ta mi nɛ wa le bɔ nɛ e woɔ nɔ aywilɛho ha po ɔ, lɛɛ mo susu dɔdɔɛ kɛ aywilɛho nɛ nihi maa ye ngɛ nimli ayɔhi abɔ nɛ a gboɔ ngɛ ta mi ɔ he nɛ o hyɛ.

⁷ “Hwɔ nɛ nya wa maa ba.” (Mateo 24:7) Níhi a mi hlali tsɔɔ kaa niye ní fuu ba ngɛ jeha 30 nɛ be ɔ mi. Se kɛ̃ ɔ, hwɔ ngɛ nihi yee, ejakaa nihi fuu be sika nɛ a kɛ ma he niye ní loo zugba nɛ a ma du ní ngɛ nɔ. Ngɛ mahi nɛ kpaako a ngɛ nɔ yae ɔ a mi ɔ, nihi nɛ a he hiɛ pe ayɔ akpe a ligbi kake hiɔwo sui nɔ́ ko. Nɛ a kpɛti nihi fuu hwɔɔ hwɔ daa ligbi. World Health Organization (Je ɔ He Wami Nami Blɔ Nya Tomi) tsɔɔ kaa jokuɛwi nɛ hiɛ pe ayɔ enuɔ nɛ a gboɔ daa jeha a je niye ní kpakpa nɛ a yi.

8, 9. Mɛni tsɔɔ kaa Yesu gbami nɛ kɔɔ zugba mimiɛmi kɛ gbenɔ hiɔhi a he ɔ ba mi niinɛ?

⁸ “Zugba ma mimiɛ.” (Luka 21:11) Zugba He Ní Kasemi Kuu ko nɛ ngɛ Amɛrika a tsɔɔ mi kaa daa jeha a, a hyɛɔ blɔ kaa zugba mimiɛmi nguanguahi 19 maa ba. Zugba mimiɛmi nɛ ɔmɛ nya maa wa, nɛ a ma nyɛ maa hule tsuhi nɛ́ a gba zugba hulɔ. Akɔtaa bumi tsɔɔ kaa kɛ je 1900 ɔ  mi ɔ, zugba mimiɛmi gbe nihi ayɔ enyɔ kɛ se. Womi ko de ke: “E ngɛ mi kaa klamahi a he nile ya hɛ mi mohu lɛɛ, se kɛ̃ ɔ, nihi nɛ gboɔ ɔ ba si bɔɔ pɛ.”

⁹ “Gbenɔ hiɔ maa ba.” (Luka 21:11) E ngɛ mi kaa tsopa peemi ya hɛ mi mohu lɛɛ, se hiɔ momohi kɛ hiɔ ehehi ngɛ nihi haoe. Amaniɛ bɔmi ko tsɔɔ kaa, hiɔhi 20 nɛ a le saminya, kaa hwlɔmi yaya, aslã, kɛ mi mi plɛmi hiɔ ba pɔ he lingmi nɛ ɔ, nɛ hiɔ nɛ ɔmɛ ekomɛ a tsami yee. Ngɛ anɔkuale mi ɔ, ke e hi kulaa a, hiɔ ehehi 30 ba. Ekomɛ a nya tsopa be, nɛ a gbee nɔ.

10. Mɛni subai a gba kɛ fɔ si ngɛ 2 Timoteo 3:1-5 nɛ o naa ngɛ nihi a he mwɔnɛ ɔ?

¹⁰ Ngɛ okadi nguanguahi nɛ maa ba je ɔ mi se ɔ, Baiblo ɔ gba kɛ fɔ si kaa nimli a subai ma tsake ngɛ nyagbe ligbi ɔmɛ a mi. Bɔfo Paulo tsɔɔ bɔ nɛ nimli a subai ma ji ha. E de ke: “Nyagbe ligbi ɔmɛ a mi ɔ, je mi maa wa.” (Kane 2 Timoteo 3:1-5.) Paulo tsɔɔ kaa nimli ma plɛ a he

• nihi nɛ foɔ mɛ nitsɛmɛ pɛ a nɔ mi

• sika suɔli

• nihi nɛ bui a fɔli

•   nihi nɛ yi anɔkuale

• nihi nɛ mɔbɔ nami ko be a mi

• nihi nɛ a nyɛ we a we akɔnɔ nɔ yemi

• nihi nɛ a hɛ mi jɔɛ

• nihi nɛ a suɔ je mi akɔnɔ pe bɔ nɛ a suɔ Mawu

• nihi nɛ tsɛɔ a he Mawu jali, se a kua e mi he wami ɔ

11. Mɛni ji nɔ́ nɛ La 92:7 tsɔɔ kaa e maa ba yayami peeli a nɔ?

¹¹ Anɛ nihi nɛ ngɛ o kpɔ ɔ mi ɔ jeɔ subai kaa kikɛ nɛ ɔmɛ kpo lo? Atsinyɛ jemi ko be he kaa a jeɔ subai nɛ ɔmɛ kpo. Nimli yayamihi ngɛ he tsuaa he. Enɛ ɔ tsɔɔ kaa e be kɛe nɛ Mawu maa pee he nɔ́ ko, ejakaa Baiblo ɔ de ke: “Yiwutsotsɛmɛ maa bɔ flɔflɔɔflɔ kaa nga; yayami peeli ma plɔke, nɛ a ma ná a he, se nyagbe ɔ, a hɛ mi ma kpata kɛ̃.”—La 92:7.

12, 13. Mɛni blɔ nɔ “anɔkuale ní lemi” ba hiɛ ngɛ “nyagbe be” nɛ ɔ mi?

¹² E ji anɔkuale kaa nyagbe ligbi ɔmɛ a mi hyi tɔ kɛ haomihi, kaa bɔ nɛ Baiblo ɔ de to ɔ. Se kɛ̃ ɔ, ní kpakpahi ngɛ nɔ yae ngɛ Yehowa jali a kpɛti ngɛ haomi je nɛ ɔ mi.

¹³ A gba kɛ fɔ si ngɛ Daniel womi nɛ ngɛ Baiblo ɔ mi ɔ mi kaa, “anɔkuale ní lemi maa hiɛ.” Mɛni be enɛ ɔ  maa ba? Ngɛ “nyagbe be ɔ” mi. (Daniel 12:4, NW) Yehowa ye bua nihi nɛ a suɔ kaa a sɔmɔ lɛ ɔ nɛ a nu Baiblo ɔ sisi saminya, titli ɔ, kɛ je 1914 kɛ ma nɛ ɔ. A ba ná sisi numi nɛ mi kuɔ ngɛ anɔkuale nɛ se be nɛ kɔɔ Mawu biɛ kɛ e yi mi tomi, Yesu Kristo kpɔmi afɔle sami ɔ, si fɔfɔɛ mi nɛ gbogboehi ngɛ, kɛ gbogboehi a si temi ɔ he. Ngɛ enɛ ɔ se ɔ, Yehowa jali kase bɔ nɛ a maa hi si ha nɛ a ná he se, konɛ e ngɔ yi jemi hu kɛ ba ha Mawu. Jehanɛ hu, a ba le nɔ́ nitsɛ nɛ Mawu Matsɛ Yemi ɔ maa pee, kɛ bɔ nɛ e ma dla níhi ngɛ zugba a nɔ ha. Mɛni ji nɔ́ nɛ a kɛ ní lemi nɛ ɔ tsuɔ? Sane bimi nɛ ɔ gblaa wa juɛmi kɛ baa gbami kpa ko nɛ ngɛ mi bae ngɛ nyagbe ligbi nɛ ɔmɛ a mi ɔ nɔ.

14. Mwɔnɛ ɔ, jije a fiɛɛ Matsɛ Yemi ɔ he sane kpakpa a kɛ ya su, nɛ mɛnɔmɛ ji fiɛɛli ɔmɛ?

¹⁴ Yesu Kristo gba ngɛ “je nɛ ɔ nyagbe be” ɔ he ke: ‘Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo.’ (Kane Mateo 24:3, 14.) A ngɛ sane kpakpa nɛ kɔɔ Matsɛ Yemi ɔ he, nɛ ji nɔ́ nɛ Matsɛ Yemi ɔ ji, nɔ́ nɛ e maa pee, kɛ bɔ nɛ wa maa pee ha konɛ wa ná e mi jɔɔmi ɔ eko ɔ fiɛɛe ngɛ gbihi lafahi abɔ mi ngɛ mahi nɛ hiɛ pe 230 a nɔ ngɛ je ɔ mi tsuo. Yehowa Odasefohi ayɔhi abɔ ngɛ Matsɛ Yemi he sane kpakpa a fiɛɛe kɛ kã. A je ‘je ma amɛ tsuo, wɛtso munomuno, nimli munomuno, kɛ gbi slɔɔtohi a mi.’ (Kpojemi 7:9) Odasefo ɔmɛ kɛ nihi ayɔhi abɔ nɛ suɔ kaa a le nɔ́ tutuutu nɛ Baiblo ɔ tsɔɔ ɔ peeɔ Baiblo mi ní kasemi nɛ a he we nɔ́ ko ngɛ he. Hyɛ bɔ nɛ gbami nɛ ɔ mi bami ngɛ nyakpɛ ha, titli ɔ, akɛnɛ Yesu gba kaa anɔkuale Kristofohi maa pee nimli nɛ ‘nihi tsuo maa nyɛ mɛ’ ɔ he je!—Luka 21:17.

15. (a) Anɛ o he ye kaa wa ngɛ nyagbe ligbi ɔmɛ a mi lo, nɛ mɛni he je? (b) Mɛni “nyagbe ɔ” ma ji kɛ ha nimli nɛ teɔ si kɛ woɔ Yehowa, nɛ mɛni e ma ji kɛ ha ni nɛmɛ nɛ maa kplɛɛ Mawu Matsɛ Yemi ɔ nɔ?

¹⁵ Akɛnɛ Baiblo gbamihi fuu ngɛ mi bae mwɔnɛ ɔ he  je ɔ, anɛ o kplɛɛ we nɔ kaa wa ngɛ nyagbe ligbi ɔmɛ a mi lo? Ke a fiɛɛ sane kpakpa a kɛ ya su he nɛ Yehowa na kaa e hi ɔ, “nyagbe ɔ” maa ba kokooko. (Mateo 24:14) “Nyagbe ɔ” ji be nɛ Mawu ma je ní yayamihi kɛ je zugba a nɔ. Yehowa maa gu Yesu kɛ bɔfohi kãtsɛmɛ a nɔ kɛ kpata nihi tsuo nɛ a jeɔ blɔ teɔ si kɛ woɔ lɛ ɔ a hɛ mi. (2 Tesalonika Bi 1:6-9) Satan kɛ e daimonio ɔmɛ be je ma amɛ sisie hu. Lɔ ɔ se ɔ, Mawu Matsɛ Yemi ɔ maa ngɔ jɔɔmihi kɛ ba ha nihi nɛ maa kplɛɛ e nɔ yemi nɛ da a nɔ ɔ.—Kpojemi 20:1-3; 21:3-5.

16. Mɛni e sa kaa o pee?

¹⁶ Akɛnɛ Satan je nɛ ɔ nyagbe su ta he je ɔ, e he hia nɛ wa bi wa he ke, ‘Mɛni e sa kaa ma hi pee amlɔ nɛ ɔ?’ Nile ngɛ mi kaa o ma tsa nɔ nɛ o kase Yehowa kɛ níhi nɛ e ngɛ hlae ngɛ wa dɛ ɔ he ní babauu. (Yohane 17:3) Moo kase Baiblo ɔ kɛ hɛdɔ. Ha nɛ e pee o su kaa o kɛ nihi nɛ suɔ kaa a maa pee Yehowa suɔmi nya ní ɔ maa bɔ daa. (Kane Hebri Bi 10:24, 25.) Moo bɔ mɔde nɛ o le Yehowa Mawu kɛ gu e Munyu ɔ nɛ o maa kase ɔ nɔ, konɛ o pee tsakemihi nɛ sa ngɛ o si himi mi, bɔ nɛ pee nɛ o ná Mawu dloomi.—Yakobo 4:8.

17. Mɛni he je nɛ yayami peeli a hɛ mi kpatami ɔ ma ba ti nihi fuu si tlukaa a?

¹⁷ Yesu gba kaa nihi babauu ma ma a hɛ ngɔ to okadi nɛ tsɔɔ kaa wa ngɛ nyagbe ligbi ɔmɛ a mi ɔ nɔ. Yayami peeli a hɛ mi kpatami ɔ maa ba tlukaa, benɛ a hɛ be a he nɔ. E ma ba ti nihi babauu si kaa bɔ nɛ julɔ ba tiɔ nihi si tlukaa nyɔ mi ɔ. (Kane 1 Tesalonika Bi 5:2.) Yesu bɔ kɔkɔ ke: ‘Nɔmlɔ Bi ɔ maa ba tlukaa, kaa nɔ́ nɛ ba ngɛ Noa be ɔ mi ɔ. Be mi nɛ nyu kpekpemi ɔ ma ba ha zugba a hɛ mi ɔ, nihi ngɛ ngma yee, nɛ a ngɛ ní nue; nyumuhi ngɛ yihi ngɔe, nɛ yihi hu ngɛ gbae kɛ ya su ligbi ɔ nɛ Noa ya sɛ daka a mi. Jamɛ a be ɔ mi tsuo ɔ, a li nɔ́ nɛ ngɛ nɔ yae  kɛ ya si nyu kpekpemi ɔ ba muɔ mɛ tsuo kɛ ho. Ligbi ɔ nɛ Nɔmlɔ Bi ɔ maa ba a, kikɛ nɛ ɔ nɔuu níhi maa ya nɔ.’—Mateo 24:37-39.

18. Mɛni Yesu kɔkɔ bɔmi e sa kaa waa bu tue saminya?

¹⁸ Enɛ ɔ he ɔ, Yesu de e tue buli ɔmɛ ke: “Nyɛɛ hyɛ nɛ hi nɛ nyɛ ko ya di ní yemi, kɛ ní numi, kɛ je nɛ ɔ mi níhi nɛ ngɔɔ nɔ nya a se tsɔ. Ke pi jã a, jamɛ a ligbi ɔ ma ba ti nyɛ si tlukaa kaa klama; ejakaa e maa ba nihi tsuo a nɔ ngɛ je nɛ ɔ mi he tsuaa he. Nyɛɛ hyɛ nyɛ he nɔ saminya, nɛ nyɛɛ sɔle daa, konɛ Mawu nɛ ha nyɛ he wami nɛ nyɛ kɛ gblee ní nɛ ɔmɛ tsuo nɛ maa ba a mi slɔkee, nɛ nyɛ nyɛ nɛ nyɛɛ da Nɔmlɔ Bi ɔ hɛ mi.” (Luka 21:34-36) Nile ngɛ mi kaa wa maa bu Yesu munyu ɔ tue saminya. Mɛni he je? Ejakaa nihi nɛ Yehowa Mawu kɛ Yesu Kristo, nɛ ji “Nɔmlɔ Bi ɔ” kplɛɛ a nɔ ɔ, a blɔ hyɛmi ji kaa a ma ná yi baami ngɛ Satan je nɛ ɔ nyagbe ɔ mi, nɛ a maa hi si daa ngɛ je ehe nɛ bua jɔmi ngɛ mi nɛ e su si ta a mi!—Yohane 3:16; 2 Petro 3:13.