NÍ KASEMI 5
Mɛni Ji Mawu Yi Mi Tomi Ngɛ Zugba a He?
1. Mɛni he je nɛ Mawu bɔ zugba a?
Yehowa ngɔ zugba a kɛ ha adesahi. E ji wa we. Enɛ ɔ he ɔ, Mawu bɔɛ kekleekle nyumu kɛ yo nɛ ji Adam kɛ Hawa kaa a hi hiɔwe—Mawu sɛ hlami nɛ e bɔ bɔfohi nɛ a hi hiɔwe. (Hiob 38:4, 7) Mohu ɔ, Mawu ngɔ kekleekle nɔmlɔ ɔ kɛ wo paradeiso nɛ ngɛ fɛu nɛ biɛ ji Eden abɔɔ ɔ mi. (1 Mose 2:15-17) Yehowa ha lɛ kɛ e bimɛ nɛ e ma fɔ ɔ he blɔ kaa a hi zugba a nɔ kɛ ya neneene.—Kane La 37:29; 115:16.
Sisije ɔ, Eden abɔɔ ɔ pɛ ji paradeiso. E sa nɛ kekleekle nyumu kɛ yo ɔ nɛ a fɔ bimɛ nɛ a he nɛ hiɛ nɛ a hyi zugba a nɔ. Bɔɔbɔɔbɔɔ ɔ, a maa pee je ɔ mi tsuo paradeiso. (1 Mose 1:28) A be zugba a hɛ mi kpatae gblegbleegble. E maa pee adesahi a we daa.—Kane La 104:5.
Hyɛ video nɛ ji Mɛni He Je Nɛ Mawu Bɔ Zugba a?
2. Mɛni he je nɛ zugba a pi paradeiso hu mwɔnɛ ɔ?
Adam kɛ Hawa gbo Mawu nɔ tue, lɔ ɔ he ɔ, Yehowa fie mɛ kɛ je abɔɔ ɔ mi. Paradeiso ɔ je a dɛ, nɛ adesa ko nyɛ we nɛ e ngɔ kɛ ba ekohu. Baiblo ɔ de ke: ‘A ngɔ je ɔ kɛ wo nɔ yayami ɔ dɛ mi.’—Hiob 9:24.—Kane 1 Mose 3:23, 24.
Anɛ Yehowa hɛ je e yi mi tomi kɛ ha adesahi ɔ nɔ lo? Dɛbi! E ji Mawu ope. E nine be si nyɛe. (Yesaya 45:18) E ma ha adesahi maa hi si ngɛ zugba a nɔ kaa bɔ nɛ e to kaa a hi si ɔ ekohu.—Kane La 37:11, 34.
3. Kɛ Paradeiso ɔ maa plɛ kɛ ba ekohu kɛɛ?
Zugba a ma plɛ Paradeiso ekohu be mi nɛ Yesu maa ye nɔ kaa Mawu Matsɛ ɔ. Yesu maa nyɛɛ Mawu bɔfo ɔmɛ a hɛ mi ngɛ ta nɛ a tsɛɛ ke Harmagedon ɔ mi, nɛ a ma kpata nihi tsuo nɛ a teɔ si kɛ woɔ Mawu ɔ a hɛ mi. Enɛ ɔ se ɔ, Yesu maa wo Satan tsu jeha 1,000. A maa baa Mawu we bi a yi ngɛ hɛ mi kpatami ɔ mi, ejakaa Yesu ma kudɔ mɛ nɛ e maa po a he piɛ. A ma ná neneene wami ngɛ Paradeiso zugba a nɔ.—Kane Kpojemi 20:1-3; 21:3, 4.
4. Mɛni be nɔ́ nami se maa po?
Mɛni be nɛ Mawu ma je yayami peemi kɛ je zugba a nɔ? Yesu ha “okadi” nɛ maa tsɔɔ kaa nyagbe ɔ su. Níhi gbeyegbeye nɛ a kɛ nɔ wami woɔ oslaa mi nɛ ngɛ nɔ yae ngɛ je ɔ mi amlɔ nɛ ɔ tsɔɔ kaa wa ngɛ “je nɛ ɔ nyagbe be” ɔ mi.—Kane Mateo 24:3, 7-14, 21, 22.
Yesu maa hi hiɔwe kɛ ye zugba a nɔ jeha 1,000 nɛ e ma ha nɔ́ nami tsuo se maa po. (Yesaya 9:6, 7; 11:9) Ngɛ Matsɛ nɛ Yesu maa ye ɔ se ɔ, e ma tsu ní kaa Osɔfo Nɔkɔtɔma nɛ e maa je nihi nɛ a suɔ Mawu ɔ a he yayami ɔmɛ kɛ je. Lɔ ɔ he ɔ, Mawu maa gu Yesu nɔ kɛ je hiɔ, bwɔmi, kɛ gbenɔ kɛ je.—Kane Yesaya 25:8; 33:24.
5. Mɛnɔmɛ maa hi Paradeiso nɛ maa ba hwɔɔ se ɔ mi?
O maa na nihi nɛ a ngɛ suɔmi kɛ ha Mawu nɛ́ a suɔ kaa a maa pee nɔ́ nɛ sa e hɛ mi ɔ ngɛ Matsɛ Yemi Asa a nɔ
Nihi nɛ a buɔ Mawu tue ɔ maa hi Paradeiso ɔ mi. (1 Yohane 2:17) Yesu tsɔ e kaseli ɔmɛ nɛ a ya hla he si bali konɛ a tsɔɔ mɛ nɔ́ nɛ a maa pee nɛ a maa sa Mawu hɛ mi. Mwɔnɛ ɔ, Yehowa ngɛ nihi ayɔhi abɔ tsɔsee kɛ ha si himi ngɛ Paradeiso nɛ maa ba zugba a nɔ hwɔɔ se ɔ mi. (Zefania 2:3) Nihi kaseɔ bɔ nɛ a maa pee ha kɛ pee hunomɛ kɛ tsɛmɛ kpakpahi, yigbayihi kɛ nyɛmɛ kpakpahi ɔ he ní ngɛ Yehowa Odasefohi a Matsɛ Yemi Asahi a nɔ. Jokuɛwi kɛ fɔli peeɔ kake kɛ jaa Mawu nɛ a kaseɔ bɔ nɛ a maa pee ha kɛ ná sane kpakpa a he se.—Kane Mika 4:1-4.
