Akɛnɛ Yesu ye mluku he je ɔ, haomihi nɛ adesahi kɛ kpeɔ ɔ fuu bɛ e nɔ, nɛ níhi nɛ gbaa adesahi a nya a hu gba we e nya. Se kɛ̃ ɔ, e je mi mi sami kpo. Akɛnɛ e mi mi sãa lɛ ngɛ nihi a he he je ɔ, e je e tsui mi faa nɛ e ye bua nihi. O ma nyɛ maa kase bɔ nɛ Yesu je mi mi sami kpo ha a he ní ngɛ Yi 32, 37, 57, kɛ 99 mi.

E he wɛ kɛ ha jokuɛwi kɛ nikɔtɔmahi tsuo kaa a maa hɛ kɛ su Yesu he, ejakaa Yesu tsɔ e hɛ mi kɛ ha nihi, nɛ e pee we e he kaa nɔ ko nɛ e be nihi a he deka. Ke nihi ngɛ Yesu kasa nya a, a tsui nɔɔ a mi, ejakaa a naa kaa Yesu susuɔ a he. O ma nyɛ maa kase bɔ nɛ Yesu tsɔ e hɛ mi ha nihi ha a he ní fuu ngɛ Yi 25, 27, kɛ 95 mi.

Benɛ Yesu ngɛ zugba a nɔ ɔ, e sɔleɔ daa ligbi, nɛ e kɛ anɔkuale jali hu peeɔ kake kɛ sɔleɔ. Yesu sɔle ngɛ si fɔfɔɛ slɔɔtohi a mi, se pi be nɛ e yaa ye ní pɛ. E naa e Tsɛ ɔ si, nɛ e jeɔ E yi, nɛ e biɔ lɛ blɔ tsɔɔmi loko e mwɔɔ e yi mi kpɔ ngɛ sanehi a he. O maa na enɛ ɔ he nɔ hyɛmi níhi ngɛ Yi 24, 34, 91, 122, kɛ 123 mi.

Yesu ngɔɔ be nɛ e sa nɛ e kɛ jɔɔ e he ɔ po kɛ yeɔ bua nihi. E fo we lɛ pɛ e nɔ́ mi. E pee jã konɛ wɔ hu waa kase lɛ. O ma nyɛ maa kase bɔ nɛ e je su nɛ ɔ kpo ha a he ní ngɛ Yi 19, 41, kɛ 52 mi.

Pi nɛ Yesu ngɔ e nya kɛ de kɛkɛ kaa waa ngɔ nihi a tɔmi kɛ pa mɛ, mohu ɔ, e ngɔ e kaseli ɔmɛ, kɛ ni kpahi a tɔmihi kɛ pa mɛ. O ma nyɛ maa kase bɔ nɛ e je su nɛ ɔ kpo ha a he ní ngɛ Yi 26, 40, 64, 85, kɛ 131 mi.

A gba kɛ fɔ si kaa Yuda bi babauu ma kua Mesia a, nɛ e he nyɛli maa gbe lɛ. Lɔ ɔ he ɔ, jinɛ Yesu ko hɛwi e he ngɛ a he. Se e kɛ kã fiɛɛ ha nihi konɛ a ja anɔkuale Mawu ɔ. Yesu pee enɛ ɔ konɛ ke nihi bui sɛ gbi nɛ e kaseli ɔmɛ ngɛ fiɛɛe ɔ tue, aloo a te si kɛ wo mɛ ɔ, nɛ a kase lɛ. Moo hyɛ Yi 16, 72, kɛ 103.

Yesu nɔ kuɔ kulaa pe adesahi nɛ a yi mluku ɔ ngɛ blɔhi fuu a nɔ. Kaa nɔ hyɛmi nɔ́ ɔ, e juɛmi mi kuɔ, nɛ e le ní wawɛɛ. Mluku nɛ Yesu ye ɔ ha nɛ e nyɛ nɛ e pee níhi nɛ nɔ ko nɔ ko be nyɛe maa pee. Se ngɛ enɛ ɔ tsuo se ɔ, e ba e he si, nɛ e sɔmɔ ni kpahi. O ma nyɛ maa kase Yesu he si bami ɔ he ní fuu ngɛ Yi 10, 62, 66, 94, kɛ 116 mi.

Yesu to e tsui si kɛ ha e se nyɛɛli ɔmɛ kɛ ni kpahi. Ke e kaseli ɔmɛ nyɛ we nɛ a pee a ní kaa bɔ nɛ e tsɔɔ mɛ ɔ po ɔ, e toɔ e tsui si kɛ haa mɛ. E ya nɔ nɛ e tĩ níhi nɛ a he hia nɛ e sa kaa a kɛ tsu ní konɛ a hɛ mɛ kɛ su Yehowa he ɔ mi si abɔ. O ma nyɛ maa kase Yesu tsui si tomi ɔ he ní fuu ngɛ Yi 74, 98, 118, kɛ 135 mi.