Koning Saul se oudste seun, Jonatan, was ’n dapper soldaat. Dawid het gesê dat Jonatan vinniger as ’n arend en sterker as ’n leeu was. Eendag het Jonatan 20 Filistynse soldate op ’n heuwel gesien. Hy het vir die man wat sy wapens dra, gesê: ‘Ons sal hulle net aanval as Jehovah vir ons ’n teken gee. As die Filistyne vir ons sê om na hulle toe te kom, dan weet ons dat ons hulle moet aanval.’ Die Filistyne het geskree: ‘Kom hiernatoe en veg!’ Die twee mans het toe teen die heuwel opgeklim en die soldate oorwin.

Omdat Jonatan Saul se oudste seun was, sou hy die volgende koning word. Maar Jonatan het geweet dat Jehovah Dawid gekies het om die volgende koning van Israel te word, maar hy was nie jaloers nie. Jonatan en Dawid het baie goeie vriende geword. Hulle  het belowe om mekaar te beskerm en te help. Jonatan het sy eie kleed, sy swaard, sy boog en sy belt vir Dawid gegee om te wys dat hulle vriende is.

Toe Dawid vir Saul gevlug het, het Jonatan na hom toe gegaan en gesê: ‘Wees sterk en wees dapper. Jehovah het jou gekies om koning te wees. Selfs my pa weet dit.’ Sal jy daarvan hou om ’n goeie vriend soos Jonatan te hê?

Jonatan het meer as een keer sy lewe gewaag om sy vriend te help. Hy het geweet dat koning Saul Dawid wou doodmaak, en daarom het hy vir sy pa gesê: ‘Dit sal ’n sonde wees as pa vir Dawid doodmaak. Hy het niks verkeerds gedoen nie.’ Saul was baie kwaad vir Jonatan. ’n Paar jaar later het Jonatan en Saul saam in ’n geveg gesterf.

Ná Jonatan se dood het Dawid na Jonatan se seun Mefiboset gesoek. Toe Dawid vir Mefiboset kry, het hy vir hom gesê: ‘Omdat jou pa ’n goeie vriend vir my was, sal ek vir die res van jou lewe vir jou sorg. Jy sal in my paleis bly en aan my tafel eet.’ Dawid het nooit sy vriend Jonatan vergeet nie.