Op 9 Junie 2024 het broer Jeffrey Winder, ’n lid van die Bestuursliggaam, die Bybelboeke Matteus en Markus in Guadeloupse Kreools vrygestel. Die Bybelboeke is gedurende die slottoespraak by die ‘Maak die goeie nuus bekend!’-spesiale streekbyeenkoms vir 2024 in Baie-Mahault, Guadeloupe, vrygestel. Altesaam 8 602 het die byeenkoms bygewoon. Nog 5 588 het deur middel van videoverbinding na die program gekyk. Dié wat dit bygewoon het, het ’n gedrukte kopie van Die Bybel – Die goeie nuus volgens Matteus gekry. Albei Bybelboeke was onmiddellik beskikbaar om van jw.org en die JW Library-app afgelaai te word.

Meer as 300 000 mense in Guadeloupe en 200 000 mense in Frankryk praat Guadeloupse Kreools. Omtrent 3 300 broers en susters wat Guadeloupse Kreools praat, dien nou in 42 gemeentes in Guadeloupe, en nog 80 dien in 2 groepe in Frankryk.

Op 28 Junie 2024 het broer Geoffrey Jackson, ’n lid van die Bestuursliggaam, die hersiene uitgawe van die Nuwe Wêreld-vertaling van die Bybel in Armeens vrygestel. a Die aankondiging is gemaak op die eerste dag van die ‘Maak die goeie nuus bekend!’-streekbyeenkoms vir 2024 naby Jerewan, Armenië. Altesaam 6 155 mense het die program bygewoon. Die hersiene uitgawe van die Nuwe Wêreld-vertaling in Armeens was onmiddellik beskikbaar om in digitale formaat van jw.org en die JW Library-app afgelaai te word. Die gedrukte uitgawe sal later in 2024 beskikbaar wees.

Die eerste Bybelvertaling in Armeens is in die vyfde eeu HJ uitgegee. Die volledige Nuwe Wêreld-vertaling van die Bybel is vir die eerste keer in 2010 vrygestel. Omtrent driemiljoen mense wat Armeens praat, woon in Armenië, insluitende ongeveer 10 550 broers en susters wat in 117 gemeentes dien. Nog 5 200 broers en susters dien in Armeense gemeentes en groepe in Europa en die Verenigde State.

Op 28 Junie 2024 het broer Freeman Abbey, ’n lid van die Takkomitee in Ghana, die Bybelboek Matteus in Fante vrygestel. Dit is gedurende die ‘Maak die goeie nuus bekend!’-streekbyeenkomsprogram vir 2024 vrygestel wat by die Takoradi-Byeenkomssaal in Sekondi-Takoradi, Ghana, gehou is. Altesaam 1 230 broers en susters het die program in persoon bygewoon. Nog 2 022 het deur middel van videoverbinding by die program ingeskakel. Dié wat dit bygewoon het, het ’n gedrukte kopie van Die Bybel – Die goeie nuus volgens Matteus gekry. Die vrystelling was onmiddellik beskikbaar om in digitale formaat van jw.org en die JW Library-app afgelaai te word.

Omtrent sesmiljoen mense praat Fante. In September 1935 is die eerste Fante-gemeente gevorm in wat nou as Sekondi-Takoradi, Ghana, bekend staan. Ongeveer 9 700 broers en susters wat Fante praat, dien op die oomblik in 158 gemeentes regoor Ghana.

Op 28 Junie 2024 het broer David Splane, ’n lid van die Bestuursliggaam, die volledige Nuwe Wêreld-vertaling van die Bybel in Yslands vrygestel. Die Bybel is op die eerste dag van die ‘Maak die goeie nuus bekend!’-spesiale streekbyeenkoms vir 2024 aan ’n gehoor van 1 312 in Reykjavik, Ysland, vrygestel. Dié wat dit bygewoon het, het ’n gedrukte kopie van die Nuwe Wêreld-vertaling gekry. Dit was onmiddellik beskikbaar om in digitale formaat van jw.org en die JW Library-app afgelaai te word.

In 2019 het ons broers en susters die Nuwe Wêreld-vertaling van die Christelike Griekse Geskrifte in Yslands gekry. Die 395 broers en susters wat Yslands praat en in vyf gemeentes dien, is bly om die volledige Nuwe Wêreld-vertaling in die bediening te gebruik op hierdie eiland waarop ongeveer 390 000 mense bly.

Op 28 Junie 2024 het broer Johannes De Jager, ’n lid van die Takkomitee in Angola, die Bybelboeke Matteus, Lukas en Handelinge in Ngangela vrygestel. Die vrystelling is aangekondig aan ’n gehoor van 450 by die ‘Maak die goeie nuus bekend!’-streekbyeenkoms vir 2024 in Menongue, Angola. Dié wat dit bygewoon het, het ’n gedrukte kopie van Die Bybel – Die goeie nuus volgens Matteus gekry. Al drie Bybelboeke was onmiddellik beskikbaar om in digitale formaat van jw.org en die JW Library-app afgelaai te word.

Ongeveer eenmiljoen mense wat Ngangela praat, bly in Angola. Die eerste Ngangela-gemeente is in 2011 gevorm. Daar dien op die oomblik 260 broers en susters in agt Ngangela-gemeentes en -groepe in Angola en Namibië.

Op 30 Junie 2024 het broer Carlos Martinez, ’n lid van die Takkomitee in Sentraal-Amerika, Die Bybel – Die goeie nuus volgens Matteus in Ngabere in ’n vooraf opgeneemde program vrygestel. Die program is na ’n hele paar Koninkryksale regoor Costa Rica en Panama gestroom. Die 2 032 mense wat dit by hierdie plekke bygewoon het, het ’n gedrukte kopie van die boek Matteus gekry net nadat die aankondiging gemaak is. ’n Digitale uitgawe was onmiddellik beskikbaar om van jw.org en die JW Library-app afgelaai te word.

Die ongeveer 216 000 mense wat Ngabere praat, bly vandag hoofsaaklik in Costa Rica en Panama. Ons 877 broers en susters wat Ngabere praat, dien op die oomblik in 26 gemeentes en 2 groepe regoor hierdie lande.