Nyamɩnlɩ ɩpɛyɩ kɛɛ mmenii anyɩ ide wɔ ɛbɩlawɔlɛ nu wɔ azɩlɛ yɩ zʋ. Ɩwɔlɩ azɩlɛ yɩ nɩɩ nninyeni mɔɔ ɩwɔ ɔzʋlɔ munwatĩĩ iluwakɛɛ ɩdɔ desanii ti. Ɩlɛ́kyɛ, ɩbama mmenii mɔɔ bɔwɔ oyuwadɩ yɩ dɩka bela eɣile be baaba. Sa ɩyɩ nninyeni mɔɔ ɩma yɛnwʋ amanɩyɛ munwatĩĩ wɔ enii zʋ.​—Kɩnga 2 Pita 3:13.

Enii yɩ aɣanɩ bela íni ɛkɛnɩ mɔɔ ɩhʋla ɩyɩ bɛsabɛsayɛlɛ, adimakɛlɛ, anzɛnyɩɩ owulo wɔ ɛkɛnɩ. Naasʋ̃ odwokɔba be wɔ ɛkɛnɩ. Ɩlɛ́kyɛ bela, Nyamɩnlɩ ɩbɛava yɩ aɣanɩ dɩyɛ nɩ ɩkɛɣa ikeziye oyuwadɩ aɣanɩ yɩ munwatĩĩ bɛagyia nu. Mmenii mɔɔ bɔkɔwʋwa Nyamɩnlɩ yɩ aɣanɩ nu nɩ bekenyia azʋ̃nudwolɩyɛ nɩɩ pɔkɔdɩlɛ baaba.​—Kɩnga Yikile 11:15; 21:3, 4.

Amanɩyɛnwʋnlɛ ɩtʋ ikodua mmɩlɩ mɔɔ Nyamɩnlɩ ɩyɩ tanɩyɛlɛmaa munwatĩĩ wɔ azɩlɛ yɩ zʋ. (2 Tɛsalonikamaa 1:8) Eɣile sina yɛɛ eyi ikezi a? Nyamɩnlɩ Odwokɔ ɩhanlɩ nninyeni mɔɔ idide enii nwʋ odwokɔ idianlɩ ɛkɛnɩ daada. Nninyeni tanɩ mɔɔ isizi wɔ oyuwadɩ nu nnɛ nɩ ikile kɛɛ, Nyamɩnlɩ yɩ mmɩlɩ mɔɔ ɩlɛ ɩbayɛ yɩ egyima nɩ iɣike.​—Kɩnga 2 Timoti 3:1-5.

Ɩsɛ kɛɛ yesuma Nyamɩnlɩ ɩnwʋ dɩyɛ wɔ yɩ Odwokɔ, Bayɩbʋlʋ yɩ nu. Ɩdɩ kɛɛ kɛlɛta be mɔɔ ɛzɩlɛ mɔɔ ɩwɔ ɔlɔlɛ ɩva ɩma yɛ. Ɩkã kezimɔ yekenyia anyɩnlɩlelɛ wɔɔ ɛbɩlawɔlɛ nu nnɛ nɩɩ kezimɔ yekenyia nnwʋanlɩ mɔɔ íni awielɩyɛ wɔ azɩlɛ yɩ zʋ eɣile be. Nɔhʋanlɛ nu nɩ, ebiyemmɔ bɛanyɩ ilédeli ɔnwʋmɔ kɛɛ bɔbʋwa wʋ ma ɛkɛdɩ Bayɩbʋlʋ yɩ tʋ. Naasʋ̃, ɩkɛyɛ aɣɛlɛbɔ kɛɛ ɛkɛma ɔnwʋmɔ ɔhʋanɩ mɔ ɔwɔ kɛɛ ekenyia eɣile be baaba nɩ ɩkɔwɔ wʋ iluwa kɛɛ mmenii bokolɔ wʋ abɔkɔ nɩ ti.​—Kɩnga Matiyu 5:10-12; Yikile 14:6, 7.