Bɔnwʋnlɩ Kɛɛ Asafʋ Yɩ Dɔ Bɛ
YOMARA nɩɩ yɩ mmenlima mmenyia anwɩ̃, Marcelo nɩɩ Hiver bɛda suwa ɛgyɩkɩ̃ɩ̃ be zʋ wɔ Guatemala. Yomara wɔlɩ yɩ tʋ kɛɛ ɩ nɩɩ Dasɩvʋlɔmaa nɩ sumaa Bayɩbʋlʋ yɩ, na aɣinzi yi, yɩ mmenlima mmenyia yɩ ɣa hɩnlanlɩ nwʋmɔ. Naasʋ̃ nɩ ɔhawʋ be wɔ kɛ. Nɩ bɛzabɛ asã yɩ munwala bɛ anyɩ izũ na nɩ bɛáhʋla bɛkɩnga anyɩnlɩsunliɣamaa bo buuku mɔɔ bɔfʋlɔ yɩ braille yɩ sʋ̃. Meti nɩ bɛ Bayɩbʋlʋ kilehilevʋlɔ yɩ kɩnga buuku mɔɔ bosuma yɩ nɩɩ Ɛhɛlɛlɛ Ndwokɔ yɩ ikile bɛ.
Nɩ bɛzabɛ bɔlɔ́kʋla bɛkɛva miniti 40 bekediyia bɔkɔhɔ Kɩndɔm Hɔɔlʋ mɔɔ ibike bɛ nɩ, meti nɩ ɩyɛ sɩ ɩma bɛ kɛɛ bɔkɔhɔ asafʋ ayiyialɩyɛ. Naasʋ̃ mmeliyema nɩ yɛlɩ nhyɩhyɛlɩyɛ mɔɔ nɩ bɛba bɛfa bɛ bɔkɔ asafʋ ayiyialɩyɛ azʋlɔtʋ yɩ munwala. Na mmɩlɩ mɔ bɔwɔlɩ yɩ tʋ kɛɛ bɛyɛɛ egyimalilɛ wɔ dapɛnɩ avinli dɩyɛzumanlɛ yɩ tʋ nɩ, mmeliyema yɩ wʋwalɩ bɛ ma bohwili be egyimalilɛ yɩ munwala bogualɩ be ti nu.
Wɔ May 2019 nu nɩ, bɔwɔlɩ yɩ tʋ kɛɛ bɛyɛɛ asafʋ ayiyialɩyɛ wɔ bo suwa yɩ zʋ. Ɔzɔ mmɩlɩ yɩ, nɩ agyiahʋnlɩmaa be mɔɔ bɛdɩ ɔhʋanɩbukolɛmaa bodu bɛɣa bo suwa yɩ zʋ. Bɛva bɛyɛlɩ bɔ bʋtayɩ kɛɛ bekehile mmenlima asã eyimmɔ kezimɔ bɛkɛɣɩnga braille na bɛahʋla bɛahɛlɛ sʋ̃. Yɛtɩndɛɛ yɩ, nɩ agyiahʋnlɩmaa yɩ bézi kezimɔ bɛkɩnga braille na bɛkɛlɛ sʋ̃. Bɔhɔlɩ layɩbili (library) be bɔhɔ bozumanlɩ braille nwʋ dɩyɛ na ama bɛahʋla bɛahile mmenii mvʋlɔ kezimɔ bɛkɛva bekeli egyima.
Marcelo mɔɔ ɩmaa munwalɩyɛ wɔ asafʋ ayiyialɩyɛ tʋ
Aziyianɩ ɛgyɩkɩ̃ɩ̃ be mɛda nɩ, mmenlima asã eyimmɔ nwʋnlɩ kezimɔ bɛkɩnga braille mɔɔ nɩ bɛávɛlɩ nwʋmɔ kʋlaa, na eyi wʋwalɩ bɛ ma bɛ nɩɩ Gyehova ɔhɔnwʋvalɛ yɩ nu yɛlɩ ɛzɩzɩbɛ. a Sikalɛpɛyɩ Yomara, Marcelo nɩɩ Hiver bɔsʋ̃mɩ kɛɛ ɔhʋanɩbukolɛmaa. Na Marcelo dɩ asafʋ nu sʋ̃mɩvʋlɔ. Na bɛlɛ ɛhyɩmɛ bɔsʋ̃mɩɩ Gyehova. Kezimɔ bɔbɔ ɛhyɩmɛ nɩ kã mmenii mvʋlɔ ma bɔnlʋmmɔ sʋ̃ beminyia bɔ nwʋ wɔ Gyehova ɔzʋ̃mɩnlɛ nu.
Mmenlima asã yɩ bɛ anyɩ sɔ mmʋwalɩyɛ mɔɔ asafʋ yɩ fa ma bɛ nɩ. Yomara hanlɩ kɛɛ, “Ɔzʋmɩ eɣile mɔɔ ili bɔmʋnlɩ mɔɔ yeyiyialɩ Dasɩvʋlɔmaa nɩ yɛ bɛlalɩ Kilisinyiamaa ɔlɔlɛ kanyɩɩ ali behileli yɛ a.” Marcelo hanlɩ hɩnlanlɩ nwʋmɔ kɛɛ, “Yenyia ɔhɔnwʋmmɔba wɔ yɛ asafʋ yɩ nu, na yɛkɩnla mmeliyemayɛlɛ okuwu mɔɔ ɔlɔlɛ wɔ numɔ nɩ nwʋ.” Yomara nɩɩ yɩ mmenlima mmenyia anwɩ̃ yɩ bɛ anyɩ ɩla eɣile mɔɔ bɔkɔnwʋ kɛɛ azɩlɛ yɩ munwala lanɩ paladayɩsɩ nɩ.—Ndw. 37:10, 11; Ayɩ. 35:5.
a Bɛyɛ blohyʋɔ mɔɔ bɔfʋlɔ yɩ Learn to Read Braille (Sumá Kezimɔ Ɛkɛɣɩnga Braille) kɛɛ ɩwʋwa abiye mɔɔ yɩ anyɩ izũ ma izuma kezimɔ ɩkɛɣɩnga na ɩahɛlɛ braille.
