AKPA 5
Mi Yí Ðo ’To Hwenu Ci Yí Mawu Nu Mɔ Yeahɛn Eshiɖɔɖɔ Vɛɔ?
Amɛ akpa sugbɔtɔ wanɔ ’nuvwin le Nowe hwenu. Gɔnmɛjeje Wema 6:5
Adamu koɖo Ɛva ji ’viwo. Agbetɔwo va sugbɔ le nyigban lɔ ji. Eyi Mawudɔla buwo kplɔ Satana do le egufɔnfɔn lɔ mɛ.
Wova nyigban ji yí va trɔ agbetɔwo keŋ yí ɖe nyɔnuwo. Wowo viwo nyi ŋsu kakikaki ciwo yí nyi xomɛvetɔwo.
Xexe lɔ va ɖɔ koɖo enu baɖabaɖa watɔwo. Bibla nu mɔ nyigbanjitɔwo nyi amɛ sɛntamɛwo, yí nuvɔnwawa tamɛ yí wobunɔ kpɔ gashiagamɛ.
Nowe ɖo ’to Mawu. Ékpa tɔjihun gangan ɖeka ci woyɔ mɔ arki. Gɔnmɛjeje Wema 6:13, 14, 18, 19, 22
Nowe nyi amɛ nywi. Yehowa nu ni mɔ yeagu amɛ vwin lɔwo koɖo eshiɖɔɖɔ gangan ɖeka.
Mawu nu nɔ Nowe mɔ ’yɛ le kpa ’tɔjihun gangan ɖeka ci woyɔ mɔ arki. Yi goduɔ Nowe ana yi xomumɛtɔwo koɖo elan hamɛhamɛwo aɖo mɛ.
Nowe kanxle amɛwo mɔ eshiɖɔɖɔ lɔ gbɔkɔ. Vɔ wodeɖo ’to yi o. ’Mɛɖewo kwi ni, yí yi nu venɔ ’mɛbuwo nu.
Ci yí Nowe kpa tɔjihun lɔ ɖegbɔɔ, ékplɔ elanwo domɛ.
