ENUKPLAKPLA 7
Nyi yí Mawu Fyɔɖuxu nyiɔ?
1. Nyi yí Mawu Fyɔɖuxu nyiɔ?
Nyi yí na Yesu nyi Efyɔ nywiɔ?—MAKI 1:40-42.
Mawu Fyɔɖuxu nyi acɛkpakpa ci yí le jeŋkwimɛ. Mawu aɖe agbetɔwo cɛkpakpawo si keŋ asɔ yiŋtɔ tɔ ɖɔli wo. Ána edro Mawu tɔ anyi wawa le jeŋkwimɛ koɖo nyigban ji. Eŋɛnywi teŋ yí enyɔ cɛ nyi! Agbetɔwo ӡan acɛkpakpa nywi. Dajinjin o, Mawu Fyɔɖuxu akpɔ eӡan ŋtɔ́ gbɔ. Ána ɖekawawa anɔ agbetɔwo mɛ le nyigban ji.—Hlɛn Daniɛli 2:44; Matie 6:9, 10; 24:14.
Fyɔɖuxu ɖeshiaɖe ɖonɔ Efyɔ dandan. Yehowa sɔ Eviɛ, Yesu Kristo ɖo Efyɔ nɔ yi Fyɔɖuxu.—Hlɛn Enyɔdasɛ 11:15.
Kpɔ video ci yí nyi Nyi yí Mawu Fyɔɖuxu nyiɔ?
2. Nyi yí taɖo Yesu nyi Efyɔ ci yí nyɔ wuɔ?
Yesu nyi Efyɔ nywi, ɖo ényi xomɛvunɔ yí enujɔjɔɛwawa gbebianɔ ŋkuvi ni sugbɔ. (Matie 11:28-30) Ŋsɛn sugbɔ le shi yí akpedo agbetɔwo nu, ɖoɔ ákpacɛ so jeŋkwimɛ va nyigban ji. Ci éfɔn so kuɔ, éyi jeŋkwimɛ yí nɔ anyi le ɖushi mɛ nɔ Dalɔ yí le te kpɔɛ. (Ebretɔwo 10:12, 13) Le vɔvɔnuɔ, Mawu na ŋsɛn yi yí etɔ acɛkpakpa.—Hlɛn Daniɛli 7:13, 14.
3. Miwo yí aɖu Fyɔ koɖo Yesuɔ?
Amɛ kɔkɔɛwoha ci woyɔ mɔ “amɛ veviwo” aɖu Fyɔ koɖo Yesu le jeŋkwimɛ. (Daniɛli 7:27) Apostolo egbejinɔtɔ Yesu tɔwo yí nyi amɛ ŋkɔtɔ ciwo yí wosɔ. Yehowa kpɔtɔ le ŋsu koɖo nyɔnu egbejinɔtɔwo cankɔ nɔ woanyi amɛ kɔkɔɛwo. Shigbe mɔ Yesu hannɛɔ, wofɔn wo koɖo gbɔngbɔnŋcilan.—Hlɛn Ӡan 14:1-3; 1 Korɛntitɔwo 15:42-44.
Amɛ nɛni yí ayi jeŋkwimɛɔ? Yesu yɔ wo mɔ “lɛngbɔha hwɛhwɛ.” (Luiki 12:32) Le vɔvɔnuɔ, wowo hlɛnhlɛnmɛ pleŋ anyi amɛ 144 000. Woabɔ do Yesu nu akpacɛ do nyigban lɔ ji.—Hlɛn Enyɔdasɛ 14:1.
4. Nyiwo yí jɔ hwenu Yesu tɔ acɛ kpakpaɔ?
Mawu Fyɔɖuxu lɔ tɔ acɛ kpakpaɔ le exwe 1914 mɛ. * Ci Yesu tɔ acɛkpakpa trololoɔ, ésɔ Satana koɖo yi gbɔngbɔnvɔnwo dɔŋkpe ɖaɖa nyigban ji doŋkɔ. Eyi Satana do dɔmɛzi sugbɔ, yí blu xexe lɔ mɛ koɖo cukaɖawo. (Enyɔdasɛ 12:7-10, 12) So hwenɔnuɔ, agbetɔwo funkpekpewo gbeva sugbɔ doji. Ahwawawa, ejutotwi, edɔ̀lele, koɖo nyigban hunhunwo va sugbɔ. Enujɔjɔ cɛwo nyi “jeshidu” ciwo yí dasɛ mɔ dajinjin o, Mawu Fyɔɖuxu lɔ avakpɔ nyigban ji nyɔwo gbɔ keŋkeŋ.—Hlɛn Luiki 21:7, 10, 11, 31.
5. Nyiwo yí Mawu Fyɔɖuxu lɔ wakɔɔ?
Toto kunuɖeɖedɔ le xexeɛ pleŋ mɛ jiɔ, Mawu Fyɔɖuxu lɔ na yí amɛ nɛniɖe ciwo yí so eju ɖeshiaɖe mɛ vabɔkɔ doju. Amɛ fafa linlɔn nɛniɖe va nyikɔ Yesu nukplaviwo. Mawu Fyɔɖuxu ahwlɛn wo gan hwecinu yí agu xexe vwin cɛ. Amɛ ciwo yí ji mɔ Fyɔɖuxu lɔ nyɔnawo asun yewo shi, ɖo gbe akpla lé woawɛ anyi tonusetɔwo nɔ Yesu.—Hlɛn Enyɔdasɛ 7:9, 14, 16, 17.
Le exwe 1 000 lɔ mɛɔ, Mawu Fyɔɖuxu lɔ ana edro ci Yehowa ɖo do agbetɔwo nu le gɔnmɛjejeɛ mɛ avamɛ. Nyigban lɔ pleŋ atrɔ Paradiso. Le vɔvɔnuɔ, Yesu atrɔ Efyɔɖuxu lɔ jo nɔ Dalɔ. (1 Korɛntitɔwo 15:24-26) Èjeshi mɛɖe ci àji mɔ yeanu Mawu Fyɔɖuxu nyɔ lɔ nɔa?—Hlɛn 2 Piɛ 3:13.
^ par. 6 Nɔ èji mɔ yease Bibla mɛ nyɔnuɖɛ ci yí kudo exwe 1914 mɛ dojiɔ, kpɔ kpashi 215-218 nɔ wema ci yí nyi Nyi yí Bibla kpla mìɔ?
