Эр ле ӱй кижи алышканда, јаҥы биле тӧзӧлӧт. Слер ада-энегерди јаантайын сӱӱп ле тооп турган да болзогор, је эмди јердиҥ ӱстинде эҥ јуук кижигер — слердиҥ эш-нӧкӧригер болор. Тӧрӧӧндӧрӧӧрдиҥ кезигине мындый солунтага ӱренерге кӱч болордоҥ айабас. Је библиялык принциптер слерге бойыгардыҥ да биледеги колбулараарды тыҥыдарга, тӧрӧӧндӧрӧӧрлӧ дӧ амыр јадарга болужын јетирер.

АГАРУ БИЧИК НЕНИ АЙДАТ. «Адаҥды ла энеҥди тооп јӱр» (Ефестегилерге 6:2). Оныҥ учун канча да јашту болзогор, ада-энегерди тооп туругар. Слердиҥ эш-нӧкӧригер де кемниҥ де кызы эмезе уулы болот. Олор до бойыныҥ ада-энезине ајару эдер учурлу. «Сӱӱш кӱйӱнбейт [кӱнӱркебейт, ЈТ]», оныҥ учун эш-нӧкӧрди ада-энезине кӱнӱркеп турары ойгор эмес болот (1 Коринфтегилерге 13:4; Галаттарга 5:26).

ТУЗАЛУ ЈӦПТӦР

• «Сениҥ ада-энеҥ мени јаантайын ла ӱредип јат» эмезе «Сениҥ энеҥге нени де этсеҥ, јарабас» — деген сӧстӧрди айтпаска албаданыгар

• Эш-нӧкӧригердиҥ кӧрӱмин оҥдоп аларга албаданыгар

АГАРУ БИЧИК НЕНИ АЙДАТ. «Эр кижи ада-энезин артырып, ӱйиле јуртап, оныла бир эт-кан боло берет» (Башталганы 2:24). Слер билелӱ болуп калган да болзоор, ада-энегер бойын слер учун эмдигенче каруулу деп сананардаҥ айабас. Олор оныҥ да учун слердиҥ билегерге ӧйинеҥ ӧткӱре кирижип турган болор.

Ада-энегерге билегердиҥ кандый керектеринде туружарга јараарын шӱӱжип, олорго јартын айдып салар керек. Јартын айдып салары дегени кату ла кезем айдарын кӧргӱспей јат (Укаа сӧстӧр 15:1). Јобош ло чыдамкай болзогор, тӧрӧӧндӧрӧӧрлӧ колбуларыгар јуук болор. Анайда ок олорго чыдамкай болуп, олорды сӱӱп турарга јеҥил болор (Ефестегилерге 4:2).

ТУЗАЛУ ЈӦПТӦР

• Билегерге тӧрӧӧндӧрӧӧр ӧйинеҥ ӧткӱре кирижет деп сананып турган болзогор, бу суракты эш-нӧкӧригерле эптӱ ӧйдӧ шӱӱжип алыгар

• Нени эдеригерди ле бойыгарды канайып тудунарыгарды јӧптӧжип алыгар