Мындый учуралды сананып кӧр: Юлия кӱскӱнеҥ кӧрӱнип тура, бойын семис деп кӧрӧт. Оны ада-энези ле најылары сыргалјындый арык деп айдыжып турган да болзо, Юлия: «Арыктаар керек» — деп сананат.

Бу ла јуукта Юлия «тоолу килограмм» таштап ийерге, бойына кату некелтелер тургузар керек деп сананып турган болгон. Ого јаан ла болзо, бойын тоолу ла кӱн торолодор керек...

Сеге мындый санаалар келзе, нени эдер эдиҥ?

Бойыныҥ тыш бӱдӱжи керегинде сананарында јаман неме јок. Агару Бичикте Сарраныҥ, Рахилдиҥ, Авигеяныҥ, Иосифтиҥ ле Давидтиҥ јакшы јандарыныҥ тоозына јараш тыш кебери кирип турган деп бичилгени јилбилӱ. Анайда ок Агару Бичикте Ависага деген «сӱрекей јараш» кыс керегинде айдылат (Каандардыҥ 1-кы бичиги 1:4).

Је кӧп јииттер бойыныҥ тыш бӱдӱжине ајару эдеринде јӱӱлип бараткан ошкош. Мынайып кылынары јакшы немеге экелбей јат. Сананып кӧр:

• Бир шиҥжӱ аайынча, 58 процент кыстар бойлорын ӧткӱре семис деп сананып тургандар, је чынынча болзо, олордыҥ јӱк ле 17 проценти артык бескелӱ болгон.

• Ӧскӧ шиҥжӱле болзо, бескези јетпес 45 процент ӱй улус бойлорын семис деп сананып тургандар!

• Кезик јииттер арыктаарга албаданып, анорексия деген ооруга табартып јадылар. Јӱрӱмге јеткерлӱ бу оорунаҥ улам, кижи бойын ӧйинеҥ ӧткӱре арыктадып јат.

 Сенде анорексия эмезе ӧскӧ дӧ оору бар деп билдирип турза, болуш сура. Ада-энеҥге эмезе јуук улузыҥа баштан. Агару Бичикте: «Чын најы кандый ла ӧйдӧ сӱӱп јат, ол кыйын-шыраныҥ ӧйине чыккан акадый» — деп айдылат (Укаа сӧстӧр 17:17).

Кижиниҥ чын јаражы ич бойынаҥ кӧрӱнет. Тем эдип, Давид каанныҥ уулын, Авессаломды, кӧрӱп ийектер. Агару Бичикте мынайып айдылат:

«Авессаломдый јаражыла јарлу эр кижи болбогон. Ондо бир де једикпес јок болгон» (2 Самуил 14:25).

Је бу јиит уул бийиркек, улуркак ла куурмакчы кижи болгон! Оныҥ учун Агару Бичик Авессаломды јакшы јанынаҥ кӧргӱспей јат; ол садынчак ла казыр кижи деп бичилет.

Агару Бичикте мындый јӧптӧр тегиндӱ берилбей јат:

«Јаҥы кижини кийип алыгар» (Колоссыдагыларга 3:10, ЈТ).

«Кееркемјигер тыш јаны болбозын... Карын, кееркемјигер ич бойыгар болзын» (Петрдыҥ 1-кы самаразы 3:3, 4).

Тыш кебериле јараш болорго кӱӱнзегенинде јаман неме јок то болзо, је ич јанынаҥ кандый кижи болгоныҥ канча киреге артык болот. Учы-учында, улус сениҥ батырдый оборыҥа эмезе јараш сыныҥа эмес, карын јакшы кылык-јаҥыҥды баалап тартылар. Анна деген кыс: «Јараш тыш кебер улустыҥ кӧзине илинер аргалу, је кӧп сабада кижиниҥ санаазында сениҥ јакшы кылык-јаҥыҥ ла ичиҥде кандый кижи болгоныҥ артат» — деп айдат.

Сеге бойыҥныҥ тыш кебериҥ јаантайын јарабай јат па?

Сен тыш кебериҥниҥ кандый бир једикпестерин тӱзедерге, пластический операция эмезе диета керегинде санангаҥ ба?

Аргалу болгон болзоҥ, сен бойыҥда нени солыыр эдиҥ? (Темдектеп ал.)

• СЫНЫҤДЫ

• БЕСКЕҤДИ

• ЧАЧЫҤДЫ

• ТУМЧУГЫҤДЫ

• ЈӰЗӰҤДИ

• КӦСТӦРИҤДИ

Баштапкы эки суракка сен «эйе» деп, ӱчинчи суракта ӱч эмезе оноҥ кӧп сӧстӧрди темдектеген болзоҥ, бу сӧстӧр керегинде сананып кӧр: сени бойыҥнаҥ ӧскӧ кем де ширтебей јат. Тыш кебери керегинде ӧткӱре кӧп санааркап турза, ӧйи-кеминеҥ ажа берерге узак эмес (1 Самуил 16:7).