በዘፍጥረት 22:6 ላይ የሚገኘው የመጽሐፍ ቅዱስ ዘገባ፣ አብርሃም መሥዋዕት ለማቅረብ ራቅ ወዳለ ቦታ ስላደረገው ጉዞ ሲናገር እንዲህ ይላል፦ “ለሚቃጠል መባ የሚሆነውን እንጨት ወስዶ ልጁን ይስሐቅን አሸከመው። እሱ ደግሞ እሳቱንና ቢላውን ያዘ፤ ሁለቱም አብረው ሄዱ።”

በጥንት ዘመን ሰዎች እሳት ለማያያዝ ይጠቀሙበት ስለነበረው ዘዴ የሚናገር ዘገባ በቅዱሳን መጻሕፍት ውስጥ አናገኝም። ከላይ ከተጠቀሰው ዘገባ ጋር በተያያዘ አንድ ተንታኝ፣ አብርሃምና ይስሐቅ “ባደረጉት ረጅም ጉዞ ላይ እየነደደ ያለ እሳት ይዘው ተጉዘዋል ብሎ ማሰብ የማይመስል ነገር” እንደሆነ ተናግረዋል። ስለዚህ ይህ ዘገባ እየተናገረ ያለው እሳትን ለማቀጣጠል ስለሚያስፈልጉ ነገሮች ሊሆን ይችላል።

በሌላ በኩል ደግሞ፣ በጥንት ጊዜ እሳት ማያያዝ ቀላል ነገር እንዳልነበረ የሚናገሩም አሉ። በወቅቱ የነበሩት ሰዎች ራሳቸው እሳት ለማቀጣጠል ከመሞከር ይልቅ የሚቻል ከሆነ ከጎረቤቶቻቸው ፍም መውሰድ ይቀላቸዋል። በመሆኑም በርካታ ምሁራን፣ አብርሃም የያዘው ቀደም ባለው ምሽት ካነደዱት እሳት ላይ የወሰደውን የከሰል ፍም የያዘ ዕቃ እንደሆነ ያምናሉ፤ ፍሙን ለመያዝ ደግሞ በሰንሰለት የተንጠለጠለ ማሰሮ ተጠቅሞ ሊሆን ይችላል። (ኢሳ. 30:14) በፍሙ ላይ በቀላሉ የሚቀጣጠል እንጨት በማድረግ በማንኛውም ጊዜ እሳት ማቀጣጠል ይቻላል።