ሃሚንግበርድ በምላሷ የአበባ ማር የምትቀስመው ካፒለሪ አክሽን ተብሎ በሚጠራው ሂደት እንደሆነ ሳይንቲስቶች ያምኑ ነበር፤ ይህም ፈሳሽ ነገር በቀጭን ቧንቧ ውስጥ ወደ ላይ እየተሳሳበ እንዲሄድ የሚያደርግ ተፈጥሯዊ ሂደት ነው። ይሁንና ወፏ ከዚህም ይበልጥ ቀልጣፋና ኃይል ቆጣቢ ዘዴ እንደምትጠቀም የቅርብ ጊዜ የምርምር ውጤቶች አሳይተዋል።

 እስቲ የሚከተለውን አስብ፦ የሃሚንግበርድ ምላስ የአበባ ማር ውስጥ ሲገባ ለሁለት ይሰነጠቃል። እያንዳንዱ ስንጥቅ ጫፉ ላይ ክርክር አለው። ክርክሮቹ የተዘጉ ቀዳዶች አሏቸው። ምላሷ ወደ ፈሳሹ ሲገባ ቀዳዳዎቹ ይከፈታሉ፤ ተጠቅልሎ የነበረው የምላሷ ጫፍም ይዘረጋል። ይህም ፈሳሹን በአንዴ ላስ አድርጋ ለማውጣት ያስችላታል፤ ይህ ፈሳሹን ወደ ላይ ለመምጠጥ ከመሞከር የተሻለ ዘዴ ነው። ምላሷ ከፈሳሹ ሲወጣ ወዲያውኑ ወደ ቀድሞ ሁኔታው ይመለሳል፤ የምላሷ ጫፍ ላይ ያሉት ቀዳዳዎች የአበባ ማሩን እንዳቆሩ ይዘጋሉ።

 ተመራማሪዎቹ አሌሃንድሮ ሪኮ ጌቫራ፣ ታይ ሺ ፋን እና ማርጋሬት ሩቤጋ እንዳሉት ከሆነ ጠቅላላ ሂደቱ “የአንድ ሰከንድ አንድ አሥረኛ እንኳ አይወስድም።” በተጨማሪም እንዲህ ብለዋል፦ “ምላሷ አስገራሚ ቅልጥፍና እንዳለው ፈሳሽ መሳቢያ ማሽን ነው። . . . ፈሳሽ ውስጥ ሲገባና ሲወጣ በሚገርም ፍጥነት ቅርጹን የመቀየር ችሎታ አለው።”

 ከዚህም ሌላ ወፏ የአበባ ማር ስትቀስም ከራሷ ኃይል መጠቀም አያስፈልጋትም። የምላሷ ጫፍ እንዲዘረጋና እንዲዘጋ የሚያደርገው፣ ፈሳሽ ውስጥ ሲገባና ሲወጣ የሚኖረው ንክኪ ነው።

 ተመራማሪዎች፣ የሃሚንግበርድ ምላስ ባለው ፈሳሽን በፍጥነት የመውሰድ ችሎታ ላይ ምርምር እያደረጉ ነው፤ ይህ ንድፍ በሕክምና፣ በሮቦት ሥራና በሌሎች መስኮች ትልቅ አስተዋጽኦ ሊያበረክት እንደሚችል ይሰማቸዋል። ነዳጅ ወይም ሌሎች ፈሳሾችን ለማጽዳት በሚያገለግሉ መሣሪያዎች ንድፍ ላይም ለውጥ ያመጣል ተብሎ ይታሰባል።

 ታዲያ ምን ይመስልሃል? የተራቀቀው የሃሚንግበርድ ምላስ በዝግመተ ለውጥ የመጣ ነው ወይስ ንድፍ አውጪ አለው?