INU NKWEEN̄ 9
Ike Owa Ke Ototun̄ Ukan̄ Kwun̄ Ebosa Ikaan̄ ubeleji?
1. Ire keke orọ mbat olom okisa ubelejit ijet ototun̄ ukan̄?
Ata etip inan̄a me ubọk Jioba, Awaji okibele ejit, ogwu oweek ibe ototun̄ ukan̄ ekaan̄ ubelejit. (Timọti Eyi Adasi 1:11) Ọmọ otọbọ ọdọ mbat olom. Mbat olom oje igọọk ikan ikup ufiak me ikakaan̄ ubelejit me ototun̄ ukan̄ mije ikisan̄a ata irek ebesa ikpukpo nsabọn isibi. Ebi Eyi Karais mejeen̄ ulibi me lek ikan okikpulu itatap irek mbat olom me ikpa.—Fuk Luk 2:1, 4, 5.
Awaji ikikpọkpọ mbat olom? Iweek ibe mgbaan̄ mbọp olom mè nwa ibia. Jioba iweek si ibe ebi ire olom mè nwa ekegbe utoon̄-ejit enyi ge ge. (Ebi Iburu 13:4) Ọmọ icha igwagwak olom. (Malakai 2:16) Ire, ikekinan̄a lek Ebi Eyi Karais egwak olom, mè ekpọk ebat olom miya ire ekaan̄ nwa me mgbọ ogwu me lek kiban̄ ebatbe isi igan.—Fuk Matiyu 19:3-6, 9.
2. Kpa ubọk ke ebi olom mè nwa ebekirọ eru me lek ge ge?
Jioba irom ebirieen̄ mè ebibaan̄ isasa irọ inyi irek mbat olom iso. (Ibebene 2:18) Kubọk ogwu ibot me ototun̄ ukan̄, olom okaan̄ akpan mè ire ogwu obokije me isi me isasan̄a isibi inu okup me ufiak inyi ebi ototun̄ ukan̄ kan̄ mè ikijeen̄ ema inu ofolek Awaji. Ima ikaan̄be me lek ogwu nwa morọ ibe ikisa akpalek kan̄ igwa ngwugwa. Olom mè nwa mema mè ikaan̄ ulibi me lek ge ge. Eyi irere ibe ke ebi olom mè nwa kpeso ikup, ikwekween̄ ubọk ekitele nrọ-nlọ mokinyi irek mbat olom ubelejit.—Fuk Ebi Efesọs 4:31, 32; 5:22-25, 33; Pita Eyi Adasi 3:7.
3. Ire igbe ibe otele irek mbat olom kwun̄, ire okayaka ikaan̄ ubelejit me emen ni?
Ire enyi ikimun̄ ufialek me mbat olom kinyi, enyi ene iba metap efuuk onyenye mè ikijeen̄ ima me lek ge ge. (Ebi Kọrint Eyi Adasi 13:4, 5) Usem Awaji ikabieen̄ icheche lek kubọk ire oniin̄ ebesa isan̄a ufialek okukup me emen mbat olom.—Fuk Ebi Kọrint Eyi Adasi 7:10-13.
4. Nsabọn, keke ke Awaji okaan̄ me nkeek inyi enyi?
Jioba iweek ibe enyi ekebele ejit. Ikinyi enyi nteme onwọnwọn ichit ofolek ubọk enyi ebesa inwọọn̄ ugwem me mgbọ ijija kinyi. Iweek ibe enyi ekaan̄ iriọọn̄-inu enan̄a me ubọk nga kinyi mè nte kinyi. (Ebi Kọlọsi 3:20) Jioba iweek ibe enyi ekekaan̄ unwọọn̄ sa me ikekirọ inu Ogwu Ororom enyi mè Gwun̄ kan̄ eweekbe.—Fuk Ogwu Etip 11:9–12:1; Matiyu 19:13-15; 21:15, 16.
5. Uga mè ute, kpa ubọk ke enyi ebekọt irọ me nsabọn kinyi ekekaan̄ ubelejit?
Omotap efuuk onyenye ikisi ikwaan̄ mè ikisan̄a inorie, ofọnti mè uwu ebeluk isibi inyi nsabọn kwun̄. (Timọti Eyi Adasi 5:8) Ire, inyi nsabọn kwun̄ ekọt ekaan̄ ubelejit, omokijeen̄ ema si ibe emun̄ Awaji mechieen̄ mè ekekween̄ inu enan̄a me ubọk kan̄. (Ebi Efesọs 6:4) Ata akpat ukot kwun̄ me ijejeen̄ ima me lek Awaji mokọt ikaan̄ ata mgbaan̄ me ejit gwun̄ kwun̄. Ire okiyaka nteme kwun̄ ibieen̄ me lek usem Awaji, nteme kwun̄ mokọt inama nkeek gwun̄ kwun̄ itap me oniin̄ onwọnwọn.—Fuk Ikan Òso Mgbọ Iba 6:4-7; Urọk 22:6.
Nsabọn ekikaan̄ oruru me mgbọ ositap ema efuuk me owot mè ikitọn̄ ema. Ema si miweek nkan̄-inu. Mbet kpokpo keya ikibem ema isan̄a me lek eru echi obokirọ ifuna ema ekakikaan̄ ubelejit. (Urọk 22:15) Ire, nkan̄-inu ikare me unye unye mè nnaan̄.—Fuk Ebi Kọlọsi 3:21.
Ebi Ata-Ikọ Jioba misan̄a owuwa ikpa isibi echi okup okpọkpọ inyi uga mè ute me lek nsabọn, isasa itap ubọk inyi ema. Ege ikpa chi igọọk me lek Baibul.—Fuk Okwa Itọn̄ 19:7, 11.
