INU NKWEEN̄ 5
Keke ore Nkeek Awaji isa inyi linyọn̄ yi?
1. Keke orọ Awaji orombe inyọn̄ ijọn̄ yi?
Jioba isa inyọn̄ ijọn̄ yi inyi ebilene. Ere yi ke eji ebeluk ibia. Omọrọ, adasi olom mè nwa, Adam mè Îfu, kperom ema ibe enemumana echit emen inyọn̄ —Awaji ira irorom ebi osat ibe eluk me emen inyọn̄. (Jobu 38:4, 7) Ire, eyi Awaji orombe Adam isan̄a, isasa ọmọ isitap me ere ge ojajaan̄ uja, ekigwen uko Iden. (Ibebene 2:15-17) Jioba inyi Adam mè ebi bọn irek eyi inwọnwọọn̄ ugwem ikakaan̄ge itata me inyọn̄ ijọn̄.—Fuk Okwa Itọn̄ 37:29; 115:16.
Mgbọ erombe Adam mè Îfu, gaalek uko Iden ore Paradais. Adasi olom mè nwa yi ire ebi ibemumana ichit linyọn̄ melek nsabọn kiban̄. Ike mgbọ okije si, ema ire ebi memumana ichit otutuuk ubọk linyọn̄ osabe ikup. (Ibebene 1:28) Kpunu mgbọ geege ebefiat inyọn̄ ijọn̄ keyi. Ire ere ebilene ebeluluk ibia.—Fuk Okwa Itọn̄ 104:5.
Ikpọ fidio Why Did God Create the Earth?
2. Keke orọ inyọn̄ ijọn̄ ikayaka ire paradais mgbọ keyi ni?
Adam mè Îfu kpesiki ibot inyi Awaji, eya orọ, Jioba ilap ema isibi me emen uko Iden ya. Ikeya ke Paradais osa ichep, karake ya, kpunu ogwu oyaka ikọt isa Paradais inu. Baibul ibe ke ebi ikpak mifiat linyọn̄ yi.—Jobu 9:24.—Fuk Ibebene 3:23, 24.
Ire Jioba iwuuk adasi nkeek ikaan̄be ibak bọn ebilene ni? In-in! Ọmọ okaan̄ unye ichit. Ikpolọ irọrọ nkeek kan̄. (Asaya 45:18) Ọmọ morọ inyi ebi ene ekpọk ekup ike ubọk ikaan̄be me nkeek me adasi mgbọ.—Fuk Okwa Itọn̄ 37:11, 34.
3. Kpa ubọk ke Paradais obosa ikpọk inu ni?
Inyọn̄ ijọn̄ mokana Paradais mgbọ Jisọs mobobene mkpulu kubọk ogwu Ubọọn̄ Awaji otobe. Me akọn̄ ekigwen Amagedọn, Jisọs mè ebi osat Awaji mefiat otutuuk ebi ikikeke ikeme Awaji. Jisọs motap Setan mkpọn me obop acha ge. Ebi eyi Awaji menwọnọ mfiat yi mije ibe ke Jioba moban mè ibem ema. Ema menwọọn̄ ugwem ikakaan̄ge itata me Paradais me inyọn̄ ijọn̄ yi.—Fuk Ichichili 20:1-3; 21:3, 4.
4. Kpa mgbọ ke ofara obota?
Kpa mgbọ ke Awaji obosan̄a inu ikpak me inyọn̄ ijọn̄ ni? Jisọs ikpa isibi “inu obobọkọ irek” echi obokijeen̄ ibe ke ota mgbọ ijuuk iriaak. Oke inu okibọkọ irek me linyọn̄ ikup kubọk eblilene kpebekọt inwọnọ, mè ikijeen̄ si ibe ke eji ekiluk me ota mgbọ ukot keyi.—Fuk Matiyu 24:3, 7-14, 21, 22.
Me emen obop acha ge eyi Jisọs obokpulu inyọn̄ ijọn̄, ọmọ mosan̄a otutuuk ofara isan̄a. (Asaya 9:6, 7; 11: 9) Igbaan̄ lek ikekikpulu kubọk ogwu Ubọọn̄, Jisọs more si Ogwu Ibot Ngwugwa mè itele ijo inyi ebi imama Awaji. Omọrọ, sa me lek kè Jisọs, Awaji mosan̄a orukan̄, ukan mè mkpa.—Fuk Asaya 25:8; 33:24.
5. Ire ebi owa ebeluk me inyọn̄ ijọn̄ yi me mgbọ ibokana Paradais?
Me emen Uwu Ntitiin̄ kiji, omomun̄ ebi imama Awaji mè iweek ikwekween̄ inu ema ebekirọ inyi Awaji ikibele ejit
Ebi ikisiki ibot inyi Awaji ebeluk me Paradais. (Jọn Eyi Adasi 2:17) Jisọs iria ebi udun̄ kan̄ ibe eseweek ebi esuuk mè ejeen̄ ema ubọk ebesa ikaan̄ unwọn isi melek Awaji. Chereyi, Jioba okititiin̄ efie efie ebi ene inyi ugwem eyi okup me isi me Paradais me inyọn̄ ijọn̄. (Jefanaya 2:3) Me Uwu Ntitiin̄ Ebi Ata-Ikọ Jioba, ebi ene mekikween̄ ubọk ebesa ire ata olom mè ata ute mè ike ebesa ire ata nwa mè ata uga. Uga mè ute mè nsabọn mekikween̄ ubọk ebesa ikaan̄ oruru inan̄a me lek ata etip Awaji.—Fuk Maika 4:1-4.
