RIWIɄKWEYNA 03
Bibriaseʼ aʼnikwʉn nugari ta na ni meʼzanʉkwéy nanʉnno
Bibriáseʼri kunsamʉ kʉnariri tʉkin zanʉngwa neyka wásʉya ni. Ey ʉwameʼ, Bibria sí ʉnkʉriwía awʉn meʼɉunʉnno. Ey ʉweʼki, birin aʼkumana gwʉn nanʉndi, ayaʼba aʼnikwʉn nugari ta ki nanʉnno meʼzʉngwi auʼ nʉnno. Bibria ʉnkʉriwía awaki nugeykáseʼri ayaʼba aʼnikwʉyari ta na ni winaʼzʉna ni. Ey ʉwameʼ, ma ayeygwi Bibriaseʼ aʼnikwʉn nugari ta ni meʼzʉn awʉngwasi riwía awkwa.
1. Bibriaseʼ zʉnna wasʉyari zʉnnáy ki nanʉnno.
Bibriáseʼri gaʼkʉnamʉ ayaʼba aʼnikwʉn nugari ta wásʉya ni yeyka ni (Eclesiastés 12:10). Zʉnna neyka awiri ikʉ kwey nʉnna zakaʼchóʼsʉya ni (Lucas 1:3 awiri 3:1, 2seʼ aʼgwa ú). Bibriaseʼ zʉnna wasʉyeʼri, eméy zarín, eymaseʼ ey uyʉn, ey uye zarín, eymekʉ zarín zakaʼchoʼsi wásʉya ni. Ey awi kéywʉri, inʉ winʉkʉriwí winizatʉga ɉináseʼri Bibriaseʼ aʼnikwʉn nugeykari ta na ni chwizʉnhasa awaki nuga ni.
2. Bibria birin aʼkumana neki iari ta yeyka ni meʼzanʉkwéy nanʉnno.
Bibriáseʼri birin kingwi migʉnkuʼ nʉnkwa nʉnna neki, ey ʉnwásʉya nʉnna ni. Ema nariza nanʉndi, Bibriáseʼri kaʼgʉmʉ eméy nari bunna ni ey wásʉya nʉnna ni. Ey ʉweʼri, sientífiku ɉinaseʼ eméy ʉwa ki nanʉnno winaʼzari winizataka unari, Bibriaseʼ wásʉya neykari ta neyka ni chwizʉnhasa awaki nuga ni. Ey awi nʉ́nkʉri, iwa awiri áʼkwakin emaʼba aʼnikwʉn nugeykari ta kinki nʉnní meʼzanʉkweygwi neyka ni (Salmo 111:8).
3. Iari Bibriaseʼ tʉkin zanʉngwa neyka wasʉyari ayéy ʉnchonʉngwáy na ni meʼzanʉkwéy nanʉnno.
Bibriáseʼri «zanuʼgwi neyka neki» ey ʉnwásʉya ni (Isaías 46:10). Minsaʼgwi kingwi zʉn awʉngwa neyka zakaʼchoʼ una ni awiri iwa zari zwein nuga neyka wáseygwi una ni. Emáʼbari Bibriaseʼ zanʉngwa aʼnikwʉn nuʼna ayéy ʉnchona awaki nuga ni sékʉnʉn awkwa nʉngwa ni.
INGUMɄ́N RIWIɄKWASI
Inʉ kʉrigawí iazataka awaki nugeykari Bibriaseʼ wasʉyari nʉnáykʉchʉ neyka ni chwizʉnhasa awaki nuga sí awiri Bibriaseʼ zanʉngwa wásʉya sí bay sekʉnanʉn.
4. Inʉ kʉrigawí iazataka awaki nugari Bibriaseʼ wásʉya ta yeyka ni chwizʉnhasa awaki nuga ni
Bírindi Kaʼgʉ́mʉri ínʉseʼ kuʼmʉ isaki nuga ni kazʉna nʉnna ni. WIDEW chwa ú.
Job-seʼ 3.500 kʉgi aʼkumana bay sekʉnanʉn. Job 26:7seʼ aʼgwa unayu, ema sí rimasey awkwa:
-
Azi nameʼri Bibriaseʼ Kaʼgʉmʉ ínʉseʼ kuʼmʉ isaki nukuʼ ni wasʉyari arunhá meʼkusʉkwéy nanʉnno.
Ɉewʉ waʼna ʉweʼri, kaʼseʼ pari wamʉ wamʉ nisi mʉ́ñʉseʼ ʉnnisi eygwi ʉnwaʼna ʉwa ni kazʉn unari 200 kʉgi zʉʼn zʉnin. Ey ʉweʼki, Bibriáseʼri minsaʼgwi ʉnwaseyna kinki nʉnna ni. Job 36:27, 28seʼ aʼgwa unayu, ema sí rimasey awkwa:
-
Bibriaseʼ ɉe eméy nari kwʉya ni wásʉya neykari ma azi nʉwarunhakwe.
-
Emaʼba naʼgwa ʉwari, Bibriaseʼ ta yeyka ná meʼzanʉngwasi, mikaʼmʉkana awao.
5. Bibriáseʼri eméy zanʉngwa ni zakaʼchoʼ uyʉn
Isaías 44:27-45:2seʼkin aʼgwa unayu, ema sí rimasey awkwa:
-
Babilonia kʉchunhakumʉngwa 200 kʉgi eyki kawʉn nusi, Bibriáseʼri azi zakaʼchoʼ uye.
Kʉgi 539seʼ Jesukristu nakuʼgwi nʉnkwe, sakuku Persia zanʉn, Ciro zaʼkinuga, awiri sordadu ɉinasin powru Babilonia kʉchunha una wásʉya ni. Eméy awkwéy nanʉngwasi, chonʉkwéy zanuʼ nari ɉe imisá nameʼ, aʼdusa winʉnáʼɉuri oʼkʉtʉ kumisé chúkuma awaki nuʼnameʼ, zapanamʉ aʼzanuʼ nari winchona unayu, ima powru apáw winʉkʉnika uyʉn. Eméy ʉnzʉnnari, 2.500 kʉgi ʉnzanigʉn. Ey ʉweʼri, iwakin anakuʼ neyka ni. Íwari bay Bibriaseʼ zanʉngwa aʼnikwʉn nuʼna sekʉnanʉn.
Isaías 13:19, 20seʼ aʼgwa unayu, ema sí rimasey awkwa:
-
Azi nari Bibriaseʼ zanʉngwa aʼnikwʉn nuʼna ayéy ʉnchona uye.
Irák ayekʉ powru Babilonia zʉnnaʼba
6. Bibriáseʼri minsaʼgwi kingwi iwa zanʉn nuga neykari wasey una ni
Bibriáseʼri akowna ɉwía kwʉn núkʉkwa kawin wásʉya ni (2 Timoteo 3:1). Iwa zari zwein nuga sí waseyna bay sekʉnanʉn.
Mateo 24:6, 7seʼ aʼgwa unayu, ema sí rimasey awkwa:
-
Bibriáseʼri akowna ɉwía zanʉngeʼri, azi zanʉngwa ni wasey uye.
2 Timoteo 3:1-5seʼkin aʼgwa unayu, ema sí rimasey awkwa:
-
Bibriáseʼri iwa akowna ɉwía kwʉn núkʉkwa kawʉngeʼri, azi ananʉngwa ni wasey uye.
-
Emaʼba Bibriaseʼ wásʉya neykari bema ingumʉ́n chwizʉnhakumʉyáy meʼzʉna no.
IʼNGWINÉ YEYKARI: «Bibriaseʼ yeyka beʼ ta yʉnno».
-
Emi rigawín nukuwa aʼzarunhʉn nusiri, azi nameʼri Bibriaseʼ aʼnikwʉyari ta yeyka ni meʼzanʉkwéy nanʉnno.
RIGAWIɄWA NEYKA
Inʉ iazatana neyka, ey awi zʉnna neyka awiri Bibriaseʼ zanʉngwa ni aʼnikwʉn nuʼna sekʉnanʉn nusi, imaʼba aʼnikwʉn nugeykari ta yeyka ná meʼzanʉkwéy kawa ni.
Rigʉnchunhasʉkwasi
-
Bibriaseʼ zʉnna wasʉyari zʉnnáy ki nanʉnno.
-
Inʉ iazatasi ʉnkʉrigawía una neykari azi nari Bibriaseʼ wasʉyari nʉnáy ni chwizʉnhasa awaki nuga no.
-
Bibriaseʼ tʉkin zanʉngwa sí ey wásʉya nanʉnno. Azi nameʼri.
INGUMɄ́N IZATAKA AWKWA
Azi nameʼ akowna kwʉn núkʉkwa ni meʼzanʉkwéy nanʉnno.
«6 profecías bíblicas en pleno cumplimiento» (La Atalaya, mayo 1, 2011)
Bibriaseʼ griego ɉina pin zʉnáy reʼguka awʉngwa ni waseyna azi nari ʉnchona uye meʼzari sékʉnʉn awkwa.
Iʼngwi Bibria sí ta aʼzanuʼ nʉnna azi nameʼ Bibriaseʼ tʉkin zanʉngwa neyka sí riwía uyeʼri kaʼmʉkana uye.
