RIWIɄKWEYNA 7
Niwipawseʼ Reʼgukʉngwasi Chusánari inʉ nanʉnno
1. Niwipawseʼ Reʼgukʉngwasi Chusánari inʉ nanʉnno
Iari Jesuseʼ du reʼguka awkwéy kʉnʉna ni meʼzánʉko (MARKU 1:40-42).
Iʼngwi sakuku kuʼnawa zanʉn neyka ni awiri bin zanuʼgwi íkʉseʼ neki reʼgukuʼ nari a zʉʼn ʉnreʼgukʉngwa nika awʉngwa ni, ari Niwipawseʼ kuʼnawa awiri Kaʼgʉ́mʉseʼ eméy zanʉndi aʼzʉnna neyka ʉnchunha awʉngwa ni. Niwipawseʼ Reʼgukʉngwasi Chusánari niwikʉɉunʉn nuga ni; eymari íkʉri diʼkin riguzari kukwéy nʉngwa reʼgow awʉngwa ni. Ema gaʼkʉnámʉri duna naʼnʉnno. Daniel 2:44; Mateo 6:9, 10; 24:14 aʼgwa ú.
Sakúkuri reʼgukʉkwéy kʉnanʉngwásiri, iʼngéygwiseʼ igunámʉsi reʼguka awiza kʉɉúnʉya ni. Ey ʉwameʼ, Niwipáw Jeuwari Agʉmʉsinʉ, Jesukristu, Sakuku nʉngwasi ʉnkaʼguna neyka ni. Apocalipsis 11:15 aʼgwa ú.
Widew Niwipawseʼ Reʼgukʉngwasi Chusanari inʉ nanʉnno chwa ú
2. Iari Jesú nʉʼkin du reʼguka awkwéy kʉnanʉnno
Niwipáw Zʉgʉmʉsínʉri a nʉʼkin duna sakuku neyka ni, ari du arunhiri nanʉyʉʼkin reʼgúkʉya ni (Mateo 11:28-30). A ɉumamʉ kʉnʉna nameʼ, kuʼnawa pari Kaʼgʉ́mʉseʼ reʼgukʉn nukʉngeʼri, ikʉ igunámʉsa awʉngwa ni. Awiri Jesú ʉnwicha anowna nari, eygwi chʉká anaʼzaniseʼri kuʼnawa ʉnzoya una ni; eymékʉri reʼgukʉngwa nari Niwipawseʼ ɉumamʉ ipʉnhásʉkin acheynáy iwaʼka una ni (Hebreos 10:12, 13). Ey awi ʉnzanika anowyeʼri, Niwipáwseʼri ɉumamʉ anipʉnhasa una ni. Daniel 7:13, 14 aʼgwa ú.
3. Jesuri ikʉnʉ nari reʼgukʉngwa nanʉnno
Bibriaseʼ wasʉyari Jesuri ikʉ Niwipáw kaʼmʉkánʉya ingʉ zʉguró neykasin reʼgukʉngwa ni yeyka ni. Daniel 7:27seʼri «kʉzanukuʼ nanʉn nuga ɉina» nʉnní zakaʼchóʼsʉya ni. Kʉzanukuʼ nʉngwa nari eʼ keywʉ Niwipawseʼ ʉnkaʼgukʉnpʉ́nnari apóstol ɉina keywʉ nʉnna ni. Jeuwari a sí ta naʼnó aʼzʉna kʉzanukuʼ neyka nanʉngwasi igunámʉsʉn nuga ni. Ema íkʉri Jesú zanagwi nari ʉnwicha unigeʼri, anugwekin nari kuʼnawa ʉnzoya ʉwa ni. Juan 14:1-3; 1 Corintios 15:42-44 aʼgwa ú.
Bin íkʉri kuʼnawa zweingwa nanʉnno. Bibriáseʼri «sʉmʉ nʉngwa[...] nanuʼ» nʉnní wásʉya ni (Luka 12:32). Jesusin Kaʼgʉ́mʉseʼ reʼgukʉn nukʉngwari 144 mir zʉʼn neyka ni. Apocalipsis 14:1 aʼgwa ú.
4. Jesú sakuku nisi nareʼri azi zʉnnʉnno
1914 kʉ́giseʼ Jesú sakuku nisi nareʼri, Ikʉnusi awiri moru ɉinari kuʼnawa pari Kaʼseʼ kʉwite una ni. * Ey ʉwameʼ, o aʼzanisi pin zʉnáy buníʼgʉmʉ záʼkusi zwein nuga ni (Apocalipsis 12:7-10, 12). Ey anowye pari, ingumʉ́n du zanuʼ nari nakʉn nuga ni. Ʉnkʉpari, kaʼmʉnsa, wichamʉ, zamʉ tikumi nakʉn nugari Bibriaseʼ zanʉngwa wásʉya anʉnchonʉn nusi ey zʉna ni, awiri Niwipawseʼ Reʼgukʉngwasi Chusana Kaʼseʼ reʼgukʉngwari bin neki kauʼ nameʼ ey zʉna ni. Luka 21:7, 10, 11, 31 aʼgwa ú.
5. Niwipawseʼ Reʼgukʉngwasi Chusana íwari azi nikʉn nukʉnno awiri azi nikʉngwa nanʉnno
Niwipawseʼ Reʼgukʉngwasi Chusana sí gaʼkʉnamʉ ʉnkʉbákumʉn nusi, ikʉ pin zʉnáy zanʉn ʉnkaʼgukʉn nuga ni. Jesú niwisakuku nariza nʉndi aʼzari a ʉnkaʼnoʼsi zwein nugari, ikʉ du nanuʼ neyka kʉchunhi nanʉngeʼri, ikwa awʉngwa ni. Ey ʉwameʼ, níwiri a nikʉngwa neyka ʉnkaʼmʉkanʉngwaʼsa awʉn niweʼɉunʉndi, Jesú yay zoyamʉ kawa ni. Apocalipsis 7:9, 14, 16, 17 aʼgwa ú.
Iʼngwi mir kʉgi ichónʉkin, Niwipawseʼ Reʼgukʉngwasi Chusánari ikʉ du aʼzari kwanʉndi aʼzʉnna neykari ayéy anʉnchunha awʉngwa ni. Kaʼseʼri paraísu zanʉngwa ni. Ey awʉngeʼri, Jesuseʼ Reʼgukamʉ kʉnanʉn nugari Akákʉseʼ anipʉnhasa anawʉngwa ni (1 Corintios 15:24-26). Niwipawseʼ Reʼgukʉngwasi Chusana síri ey wasain meʼɉunʉnno. Salmo 37:10, 11, 29 aʼgwa ú.
^ par. 6 Bibriaseʼ gaʼkʉnamʉ minsaʼgwi waseyna nʉnnari 1914seʼ eméykʉchʉ ʉnchorín meʼzʉn awʉn meʼɉunʉndi, ingumʉ́n zakaʼchóʼsʉya 22, aʼnikwʉn nugaʼba 217 pari 220kin ribru ¿Qué nos enseña la Biblia?-seʼ taka ú.
