KIMELÜN 7
¿Chem am Chaw Dio tañi Ngüneneel?
1. ¿Chem am Chaw Dio tañi Ngüneneel?
¿Chemu eypiabüiñ Jesu doy küme longko ülmen ngi? (MARKU 1:40-42)
Jewba Dio üytubi tañi Botüm, Jesukristo, longko ülmen ngeel Kidu tañi Ngüneneel mu. Tübachi Ngüneneel müli wenu mapu mu, püchün upa mu weluntukuay kom pu che tañi ngüneneel, kabey bemay Chaw Dio tañi piel tübachi mapu mu ka wenu mapu mu. Chaw Dio tañi Ngüneneel bemay kom pu che duamyeel. Kom pu che kiñewküleay tübachi Ngüneneel mu. Kümeke dungu tati ¿belelay? Papiltunge Daniel 2:44; Matew 6:9, 10, TNM; 24:14, ka Apokalipsi 11:15.
Pebinge tati video ¿Chem am Chaw Dio tañi Ngüneneel?
2. ¿Chemu Jesu doy küme longko ülmen ngi?
Chaw Dio tañi Botüm küme piwkengi, nor dungu bemki. Beymu doy küme longko ülmen ngi (Matew 11:28-30). Kidu müli wenu mapu mu, ka newen-ngi. Beymu, ngünenebile kom mapu, kelluabi pu che. Wiñomongelngetulu Jesu püray wenu mapu mu tañi ingelküleel (esperaleal) Chaw Dio tañi man püle mu, tañi elbalkünongeel tañi ngüneneel (Ebrew 10:12, 13). Bey ula Chaw Dio elubi tañi ngüneneel. Papiltunge Daniel 7:13, 14.
3. ¿Ngüneneay kake che Jesu engün?
Biblia eypi Chaw Dio kiñeke poyekeetu ngüneneay Jesu engün. Daniel 7:27 mu “ngümintungelu” pingingün. Chaw Dio une ngümintubi Jesu tañi pu apostol. Jewba bachantü petu ngümintunebi wentru ka domüche tañi müleel wenu mapu mu, beymu Jesu reke lalu engün, püllü ngetuayngün. Papiltunge Juan 14:1-3, ka 1 Korintio 15:42-44.
¿Chumten che amuay wenu mapu mu? Biblia eypi püchün che müten, beymu Jesu “püchü kechan obicha” pieyu (Luka 12:32, TNM). Pu ngüneneabilu Mapu Jesu engün 144.000 che ngingün. Papiltunge Apokalipsi 14:1.
4. Jesu llowlu tañi ngüneneel, ¿chem upay?
Jesu llowi tañi ngüneneel 1914 tripantu mu, une dungu tañi bemün, wemünentubi Satana ka tañi pu wedake püllü wenu mapu mu ka ütrünaumbi Mapu mu. * Satana bente tañi lladken, amuli tañi weda bemkünoken wall Mapu püle (Apokalipsi 12:7-10, 12). Beychi mu, pu che wall Mapu mu mülelu, doy wedalkaletuy. Kiñe pelon dungu eypikünoy mülele weychan, nüyün, kutran ka ngüñün, Chaw Dio tañi Ngüneneel püchün upa mu ngünenetuay kom tati Mapu. Papiltunge Luka 21:7, 10, 11, 31.
5. ¿Chumki Chaw Dio tañi Ngüneneel bamülke mu ka chumay küpalechi antü mu?
Chaw Dio tañi Ngüneneel trapümki “bentren pu che” kom lob mapu küpalu, kiñe amuldungun küdaw kom Mapu mu bemngekelu. Bentren warangka pu wentru ka domüche küme piwkengelu, ayüwki tañi ngüneneetu Jesu ka mupitukebi. Chaw Dio tañi Ngüneneel apümabilu tübachi weda mapu mu müleyechi dungu, kom tübachi pu che montulngeayngün. Beymu, küpa llowliiñ kom kümeke dungu küpalu tati Ngüneneel, mupituabiiñ Jesu. Papiltunge Apokalipsi 7:9, 14, 16, 17.
Kiñe warangka tripantu mu, tati Ngüneneel bemay Chaw Dio kom tañi ayükel unelu mu, dewmalu pu che. Mapu kiñe küme mülewe ngetuay. Ab mu, Jesu wiñoleltuabi tati Ngüneneel tañi Chaw (1 Korintio 15:24-26). ¿Ayüabüymi tami ngütramelabel ka che tübachi Ngüneneel mu? Papiltunge Salmo 37:10, 11, 29.
^ parr. 6 Ayülmi tami doy kimal Biblia tañi pelon dungu pengelelu 1914 tripantu mu, pebinge tati pagina 215 powal 218 mülelu libru Tati Biblia ñi rüf kimeltukeel (mapudungun mu).
