Chau Dios, ¿fill püle mülequepei mai?

AMULCÜNUNGEAL

Biblia ñi quimeltuqueel

Chau Dios com adquintuniei ca chem meu rume pengelquei tañi nehuen-ngen (Proverbios 15:3; Hebreos 4:13). Huelu Chau Dios fill püle miyauquelai ca itrofill dungu meu mülelai. Biblia quimeltuquelai tüfa. Huelu mai, Biblia pengeli Chau Dios mülequei huenu meu.

¿Chumngei ta Chau Dios?: Quisu ta quiñe püllüngei (Juan 4:24). Inei no rume pequelaeyu (Juan 1:18). Fillque nütram mülelu Biblia mu, pengeli Ngünechen niei cheu ñi mongelequen. Huelu feipiquelai fill püle ñi mülequen (Isaías 6:1, 2; Apocalipsis 4:2, 3, 8).
¿Cheu mülei Chau Dios?: Biblia feipi Ngünechen niei tañi mülehue huenu meu (1 Reyes 8:30). Tüfa feipi Chau Dios miyauquelai Mapu meu, huelu mai mülequei huenu mu. Quiñe rupa, ti Biblia pengeli pu cümeque püllü trahuingün ñi müleal Jehová⁠ a ñi adquiñ meu (Job 1:6). Femngechi pengeli Chau Jehová niei cheu ñi mülequemum.

Chau Dios mülenole fill püle Mapu meu, ¿rüf quellupeafeneu iñche?

Femafui llemai. Ngünechen mülefui rume huenu mu, huelu com che duamtuquefi. Adquintuniefi com tañi feyentuqueteu ca fürenequefi engün (1 Reyes 8:39; 2 Crónicas 16:9). Ngünechen, ¿chumngechi pengelquei ñi duamtuchequen?

Llellipulmi: Petu llellipumequelmi, Chau Dios allcütulequei tati (2 Crónicas 18:31).
Ngañhuadcülelmi: “Jehová fülmaniequefi com pu hueñancülelu ñi piuque; ca montulquefi com pu huesa duamcülelu” (Salmo 34:18).
Duamngelmi tami ngülamtungeal: Jehová tati Biblia meu, eluqueimu quimün ca adniequeimu ti rüpü tami miyahual (Salmo 32:8).

Ñi hueluraquiduamcülen ta che

Quiñeque che ñi feyentuquen: Ngünechen mülei ta com tañi deumael meu.

Ti rüf dungu: Chau Dios mülequelai Mapu meu (1 Reyes 8:27). Huelu Biblia feipi tati pu huangülen ca caquelu dungu ñi deumael “huldungumequei ta Chau Ngünechen ñi fütra pepiluhun” (Salmo 19:1). Huelu tüfa pengelquelai ñi mülequen tüfa meu Chau Dios. Raquiduamnge tüfa: quiñe che deumaquei retrato, fente cümecünuquei ñi cüdau. Com ñi deumaelchi retrato pengeli ñi chumngen ta quisu. Ca femngechi com ñi deumael ta Ngünechen pengeli ñi chumngen quisu: nehuen-ngei, quimün-ngei ca piuqueyechefengei (Romanos 1:20).

Quiñeque che ñi feyentuquen: Ngünechen mülenole itrocom dungu meu, feingelai ñi com nehuen-ngen.

Ti rüf dungu: Chau Dios tañi nehuen meu femquei com dungu. Feimu com quimniei ñi rupamequen ca chuchi rume femafui tañi ayüqueel. Duamfalngelai ñi mülenagal feiti mu (Salmo 139:7).

Quiñeque che ñi feyentuquen: Salmo 139:8 feipi: “Pürafuli huenu meu, feiti mu müleafuimi. Ca nagli tati Rüngan meu, eimi ca müleafuimi tüfei meu”. Quiñeque che ngüneduamquei tüfachi troquiñ, fei feipiquei Chau Dios fill püle mülequei.

Ti rüf dungu: Tüfachi texto cüpa feipilelai Chau Dios ñi mülequen fill püle. Huelu mai, pengeli Chau Dios eluucülei taiñ quelluaeteu cheu rume müleliyiñ iñchiñ.

a Biblia pengeli Chau Ngünechen ñi üi Jehová pingei.