Nicolas ca Céline ca dungu mu rupaingu. Ti Betel mülelu Francia mu huercüeyu tañi quelluntucumeal ca trahunche mu. Fei engu feipi: “Ellaca mu müna ayüucülequefuyu. Huelu rupachi antü mu, hueñancütufiyu taiñ pu hueni. Petu cüme hueniyeulafuiñ pu peñi ca pu lamngen taiñ hue trahunche mu”. a Feimu, ¿chem quelluafeimu tami cüme duamcüleal puhulmi quiñe hue trahunche mu? ¿Chumngechi quelluntucuafui caquelu pu peñi ca pu lamngen? ¿Chumngechi yafültucuafuimi ta caquelu? Ca, ¿chumngechi eimi yafültucungeafuimi?

MELI NGÜLAM TAMI QUELLUAETEU

1. Maneluhuaimi Jehová mu (Sal. 37:5). Kazumi, Japón mu mülelu, epu mari tripantu yeniefui tañi trahunche mu. Huelu tañi füta cañpüle elungei quiñe cüdau, fei mülefui tañi huiñamtuhual. ¿Chumi taiñ lamngen tañi quelluaeteu ta Jehová? Fei feipi: “Nülalelfiñ tañi piuque ta Jehová. Feipifiñ tañi quisulelu troquiucülen ca tañi llicalen. Jehová elueneu ta nehuen tañi duamniefel”.

Nicolas taiñ nütramcapeel, ¿chem quellueyu tañi doi maneluhual Jehová mu? Quisu raquiduami tañi chumün Abrahán, Jesús ca Pablo. Quisu engün famentufingün fentrenque dungu tañi poyeafiel ta Jehová. Inaduamlu tüfa, Nicolas doi maneluhui Jehová tañi quelluaeteu. Iñchiñ ca femngechi doi maneluhuafuiñ Jehová mu.  Raquiduamnge quiñe anümca mu, duamniei co ca itrofillem tañi tremal ca ñi nehuencüleal. Iñchiñ ca duamnieiñ taiñ papeltuafiel ta Biblia ca cüme raquiduamal taiñ papeltuel mu. Femngechi cüme chaftuafuiñ chem dungu rume taiñ mongen mu ca quimaiñ falinque dungu, femngechi yafültucuafuiñ taiñ hue trahunche.

2. Trürümcantu­layafimi tami hue trahunche tami cuifi trahunche mu (Ecl. 7:10). Taiñ peñi Jules, Benín mapu tuulu, huiñamtuhui Estados Unidos mu. Feitachi pais mu pu che ca huimtun niequei. Taiñ peñi feipi: “Quimfiel mu quiñeque che, dicümtucungelu reque troquihun tañi nütramcayafiel tañi mongen”. Taiñ peñi Jules huimtulelafui ñi nütramcayafiel caquelu che tañi mongen, feimu püntühui pu peñi, pu lamngen mu. Huelu doi quimürpufilu engün, cacünutui ñi raquiduam. Fei feipi: “Com pu che huall mapu mu femngechi chengeiñ. Huelu caquerumei chumngechi taiñ dunguquen ca taiñ femquen. Rume falin-ngei taiñ cüme llohuafiel ta caquelu che” feipi. Feimu trürümquelayafimi ti hue trahunche tami niequefel mu. Quiñe precursora Anne-Lise pingelu feipi: “Huiñamtuulu iñche, ayülafun ñi peal chem tañi elcünuel. Doi mai ayüfun ñi quimürpual hueque dungu”.

Tati pu loncolelu ca ngelai ñi trürümafiel cheu ñi tuhun puule ca trahunche mu. Cacünule ñi femquen pu peñi, pu lamngen ti hue trahunche mu, tüfa feipilai tañi huesa femün engün. Hune mülei tami cüme quimafiel ti trahunche petu tami feipinon chem rume (Ecl. 3:1, 7b). Dicümtuculayafiyiñ caquelu che ñi raquiduamal iñchiñ reque, doi cümei pengelelafiel pu peñi, pu lamngen iñchiñ taiñ cüme femquen (2 Cor. 1:24).

3. Coneltuaimi tami trahunche mu (Filip. 1:27). Huiñamtu­hulmi, müte nielayaimi tiempo ca nehuen. Huelu rume falin-ngei puhulmi müten tami amual hue trahunche mu. Pepi femülmi, amunge Trahunhue Ruca mu. Amunolmi, pu peñi ca lamngen quimlayafuingün chumngechi tami quelluaeteu. Quiñe lamngen Lucinda pingelu ca tañi epu domo püñeñ huiñamtuhuingün quiñe fütra huaria Sudáfrica mu. Taiñ lamngen feipi: “Femün tañi ngülamtueteu tañi pu hueni, feimu fülmaniefiñ ti hue trahunche, amuldunguquen fillque lamngen engün, huiñoldungual trahun mu. Ca feipifiñ taiñ pu lamngen iñchiñ taiñ ruca mu ñi trahuluhual taiñ amuldungual”.

Eluhulmi tami quiñentrür müleal tami hue trahunche mu, eimi nehuentucuhuaimi ca yafültucuafimi ta caquelu che. Anne-Lise taiñ nütramcapeel, pu loncolelu feipieyu ñi amuldungual com pu lamngen engün. Fei feipi: “Pürüm quimtucun: tüfa quellueneu ñi doi fülconcüleal trahunche mu”. Eluhulmi tami liftual ca cüme elcünutuafiel tami hue  Trahunhue Ruca, pu peñi, pu lamngen ngüneduamai tami fülconcülen ti trahunche mu. Doi fülconcülelmi tami trahunche mu, inaduamaimi tunte piuqueyeteu engün ca tami familia troquiafimi engün.

4. Nieaimi hueque hueni (2 Cor. 6:11-13). ¿Chumngechi femafuimi? Duamtuafimi ta caquelu. Petu ñi connon ti trahun ca deule, nütramcayafimi pu peñi, pu lamngen ca doi quimafimi engün. Loncontucuaimi tañi üi engün. Hueniyefilmi pu peñi, pu lamngen, loncontucufilmi tañi üi engün, cüpa fülconaingün eimi mu ca cüpa hueniyeaimu.

Re quintulayaimi tami tuteaeteu caquelu pu che. Hunelu mu pengelaimi tami chumngechi chengen. Inayentuafiyiñ ta Lucinda, quisu feipi: “Mangelfiyiñ pu lamngen taiñ ruca mu, femngechi doi cüme hueniyerpufiyiñ”.

“HUELUQUENTU LLOUNIEHUAIMÜN AYÜHUN MU”

Quiñeque peñi, lamngen cüdautuquei ñi conpual Trahunhue Ruca ñi quimnofiel inei no rume. Fei, ¿chumngechi quelluafuimi pu peñi, pu lamngen hue puulu tami trahunche mu? Pablo feipi: “Cristo ayühunquechi llohueimünmeu, ca femngechi hueluquentu llouniehuaimün ayühun mu” (Rom. 15:7). Pu loncolelu inayentuafuingün Jesús. Fei cüme llohuafingün pu peñi, pu lamngen hue puulu trahunche mu (inaduamnge ti huichulechi dungu “ ¿Chem mülei tami femal tami puhual hue trahunche mu?”). Com ti pu peñi, lamngen ca pichiqueche cütu mülei ñi cüme llohuafiel pu peñi, lamngen hue puulu tañi trahunche mu.

Ca mangelafuiñ hueque peñi, lamngen taiñ ruca mu ca quelluafuiñ quiñeque dungu mu. Quiñe lamngen quellufi cangelu lamngen hue puulu tañi huaria mu, pengelelfi ti huaria ca feipifi cheu püle ñi miyahun bus ca tren. Femngechi femngen mu ti lamngen,  rume mañumcülei ca quellueyu ñi huimtual ti hue huaria mu.

HUIÑAMTUHULMI, DOI CÜDAHUELAFUIMI TA JEHOVÁ

Hue puhulmi quiñe hue trahunche mu, pichi llicaleafuimi ca raquiduamcüleafuimi. Raquiduamnge tüfa: hue pichique üñüm llicalequei ñi tripayal tañi dañe mu, huelu quiñepülecünufi ti llican, müpüquei müten. Ca femngechi iñchiñ llicaleliyiñ, quiñepülecünuafiyiñ chem taiñ huesa duamelnieteu, femngechi müpüaiñ reque taiñ cüdahuelafiel ta Jehová. Nicolas ca Céline feipingu: “Huiñamtuhulmi, fentren dungu quimürpuafuimi. Quimfilu iñchiu peñi, lamngen caquerumelu, doi cüme chengerpuyu”. Jean-Charles, taiñ nütramcapeel, ca feipi: “Puulu tañi familia iñchiñ hue trahunche mu, tayu pichiqueche doi hueniyerpufingün ta Jehová. Rupalu quiñeque cüyen müten, tañi ñahue elungei asignacion trahun mu ca tañi fotüm üitungei ñi amuldungual trahunche mu”.

¿Chem chumafuimi pepi huiñamtunolmi cangelu troquiñche mu? Inanieafimi ñi feipin tüfachi troquiñ. Femülmi, raquiduamafuimi feula tami acun reque feichi trahunche mu. Maneluunge Jehová mu ca coneltunge chem cüdau rume niele ti trahunche. Amuldungunge pu peñi, pu lamngen engün, nieaimi hueque hueni ca tami nieelchi pu hueni doi fülmanieafimi. Raquiduamafuimi tati duamnielu quellu ca tati hue coneltulelu trahunche mu tami quelluafiel. Femülmi tüfa, doi fülconaimi Jehová mu. Ti piuqueyen mu quimfalcünuquei pu rüfngechi cristianongen mu (Juan 13:35). Tami femqueel “rume ayühuelquefi ta Chau Ngünechen” (Heb. 13:16).

Quiñeque cristiano cüdautuafui ñi amual ca trahunche mu. Huelu fentren engün huimtuleingün ca ayüucüleingün tañi hue trahunche mu. Eimi ca femngechi femafuimi. Taiñ lamngen Anne-Lise feipi: “Amun mu quiñe hue trahunche mu, quellueneu ñi doi nieal ta piuqueyen”. Taiñ lamngen Kazumi, ¿chem quimtucui? Feipi: “Huiñamtuhulmi, ngüneduamaimi Jehová tami doi quellueteu”. Taiñ peñi Jules ca feipi: “Nien fentren hueni, quisu tañi ruca mu mülelu troquiuquen. Müna huimtulen tañi hue trahunche mu, cüdautuafun tañi elcünuafiel”.