INDONESIA mapu mu, mülei quiñe pichi huapi Sangir Besar pingelu, feita mu mülei cüla taiñ pu lamngen. Quiñeque tripantu cuifi mu, cüdauqueingün inafül fütra lafquen. Quimniengequefuingün tañi enseñachequen Biblia. Huelu amuldunguquelafuingün inafül fütra lafquen mu. Feimu, ¿chumquefuingün? Peaiñ.

Hunelu mu, conquefuingün ti fütra lafquen mu tañi entuafiel fütraque cura, quiñe pelota de futbol reque quechilei. Metanentuquefuingün inafül fütra lafquen, fei hula anücünuuqueingün quiñe huancu mu, femngechi trafocaquefi tati cura quiñe martillo. Feitachi pichique cura palti mu tucuquefuingün. Amuletulu tañi ruca mu, quiñe escalera püraqueingün. Tañi yeelchi cura guardacünufuingün quiñeque sacu mu. Fei hula, quiñe camion yerpuquefi tati sacu cura, femngechi pünefi tati cura ñi deumangeal ta rüpü.

Quiñe taiñ pu lamngen Hulda pingefui. Feitachi lamngen doi cüdauquefui fütra lafquen mu. Cullingen mu feichi cüdau, quelluquefui tañi familia. Huelu feula ayüfui tañi ngillayal quiñe tablet, femngechi tañi conal ti aplicacion JW Library^® mu. Hulda cüme quimniefui tati video ca caquelu dungu mülelu ti aplicacion quellueyu tañi doi cüme amuldungual ca tañi doi cüme adümafiel Biblia.

Doi quiñe cüyen, Hulda cüdahui epu hora fill pulihuen mu. Apolfi quiñe pichi camion cura mu. Femngechi femlu, niefui plata tañi ngillayal tañi tablet.

Hulda feipi: “Rüfngefui tañi rume cansalefel tañi trafocafiel mu ta cura. Huelu ngillalu tañi tablet, quellueneu ñi doi cüme amuldungual ca doi matu pepicaufun ñi coneltual trahun mu. Feimu ngoimanentufiñ com tañi fente cansalefel”. Hulda ca feipi tati tablet ca quellueyu aculu ti pandemia, com pu trahun ca ti amuldungun femngelu internet mu. ¡Rume ayüuqueiñ Hulda huechurpun tañi ayüqueel!