Doi cüme quimfilmi ñi chumngen quiñe che, doi cüme hueniyeafimi. Ca femngechi, doi cüme quimfilmi ñi chumngen ta Chau Ngünechen, doi cüme quimafimi ta quisu, fei doi cüme hueniyeafimi. Chau Dios tañi cüme chumngen meu, doicülei tañi nehuen-ngen, tañi quimün-ngen, ñi norngen ca tañi piuqueyechefengen.

“¡Ahuempeñ Chau Ngünechen Jehová! Eimi ta deumaimi tati huenu mapu ca tati nag mapu fente tami nehuen nien” (JEREMÍAS 32:17).

Com tati deumangelu pengeli Chau Ngünechen ñi nehuen-ngen. Quiñe dungu, arelele chi antü fei pañitulmi, müna cüme pañi piaimi chi. Cafei raquiduamafuimi Jehová hulquei tañi nehuen, femngechi ñi alofcüleal ti antü. ¿Tunten nehuen niei ti antü? Raquiduamaimi ta tüfa: ponhui antü meu entufuliyiñ quiñe pichi troquiñ, pilun acucha reque felelu, fei cüpalfuliyiñ mapu mu, elcünuafuiñ 140 kilometro alü camapu taiñ lüpümnoaeteu. Ti antü ñi hulqueelchi nehuen quiñe segundo mu, trürümfalngeafui ñi chumquen fentren millon bomba atomica.

Trürümfiliyiñ ti antü fentren millonque huangülen mu, müna pichingei ti antü piafuiñ. Pu cientifico feipi tati huangülen UI Scuti pingei, doi alüi ti antü mu. Fente ñi alün-ngen tüfachi huangülen huelutucufuliyiñ cheu ñi mülen ti antü, puhuafui rangiñ sistema solar mu. Ngüneduamal tüfa, quellueiñmu doi quimtucual Jeremías ñi feipifiel ta Jehová: “Deumaimi tati huenu mapu ca tati nag mapu fente tami nehuen nien”.

 Chau Ngünechen ñi nehuen-ngen, ¿chumngechi cümelcaqueiñmu tüfa? Ngenofule ti antü ca com ñi mülen mapu mu, mülelayafuiñ iñchiñ. Huelu Chau Ngünechen ñi nehuen, ¿chumngechi cümelcaqueiñmu quisuque iñchiñ? Cuifi meu, Jehová elufi ñi nehuen ta Jesús ñi femal afmatufal dungu, quiñeque tüfa: ‘Pu traumalelu ñi pelotun, pu cüntrongelu ñi trecatun, pu lepra cutran nielu ñi tremotun, pu pilu ñi allcütun, pu la ñi huiñomongetun’ (Mateo 11:5). ¿Fantepu cai? Jehová “nehuentuniefi tati pu ürcülelu”, pi Biblia. Ca feipi: “Pu maneluucülelu Jehová meu nehuencontuaingün” (Isaías 40:29, 31). Huesaque dungu rupaliyiñ, Chau Ngünechen eluafeiñmu quisu ñi “nehuen” taiñ chaftuafiel chem huesa dungu rume taiñ mongen mu (2 Corintios 4:7). Jehová piuqueyen mu pengeli ñi nehuen, feimu ¿cümenoafulu taiñ hueniyeafiel ta quisu?

“¡Ahuem Jehová, rume fentrelei tami deumael! Quimün mu com deumafimi” (SALMO 104:24).

Doi ngüneduamfiliyiñ Jehová ñi deumael, doi afmatulehueaiñ ñi quimün mu. Feimu quiñeque cientifico inaduamquefingün Jehová ñi deumael, femngechi quimqueingün chumngechi doi cüme deumangeal fentren dungu, quiñeque tüfa: pu avion ca tacuhun.

Taiñ cuerpo mu, Jehová ñi nehuen doi quimfalngequei. Raquiduamnge chumngechi tremquei quiñe pichiche tañi ñuque ñi pütra meu. Conlu ti fine tati ovulo meu, ponhui mu quimfalcünungei ñi chumngen ca ñi femngen tati choyüngealu. Feichi celula hudatripaquei caquelu celula meu. Huelu yochi caquerumequei, fei quiñeque celula coneltuquei mollfüñ mu, caquelu müllo mu, caquelu foro mu. Femngechi cüme amulei ñi tremün ti cuerpo. Ailla cüyen rupalu, feichi hunen celula, quiñe cuerpongetuquei. Afmatufali ñi femngechi tremquen ti cuerpo, feimu quiñe huentru feipifi ta Jehová: “Püramyenieayu afmatufalngelu am iñche tañi cüme deumacünungen” (Salmo 139:14).

Chau Ngünechen ñi quimün-ngen, ¿chumngechi cümelcaqueiñmu tüfa? Chau Ngünechen quimniei chumngechi taiñ ayüucüleal, feimu huli cümeque ngülam Biblia mu. Quisu feipiqueiñmu: “Hueluquentu perdonahuaimün com piuque mu” (Colosenses 3:13). Müna cüme ngülam tati, ¿felelai? Quiñeque che, inaduamquei chumngechi cümelcaqueiñmu perdonacheal. Feipi, perdonacheliyiñ, tüfa quelluafeiñmu taiñ doi cüme umautual ca presion cutran nierpunoal. Cafei perdonacheliyiñ, contulayafeiñmu depresion cutran ca caquelu huesaque cutran. Chau Ngünechen, quiñe cüme hueni reque felei, ngülamtuqueiñmu taiñ cümelcaleal (2 Timoteo 3:16, 17). ¿Ayüafuimi nieal femngechi hueni?

‘Chau Jehová piuqueyefi tati norngechi dungu’ (SALMO 37:28).

Chau Ngünechen femquei nor dungu. Feimu “¡raquiduamfalngelai Chau Ngünechen ñi femal huesaque dungu, ca ñi huesalcayal tati Com Pepiluhun-nielu!” (Job 34:10). Quisu nor juzgachequei. Biblia feipi: “Eimi ta nor juzgayafimi [...] com pu troquiñche” (Salmo 67:4). “Chau Jehová pei chem ñi mülen piuque mu”, feimu quimniefi tati cüme piuquecauquelu ca tati rüf dunguquelu, femngechi ñi nor juzgayafiel engün (1 Samuel 16:7). Jehová quimniei taiñ rupamequen huesaque dungu, feimu feipicünui com pu huesaque che ngehuelayai (Proverbios 2:22).

Jehová cüpa castigaquelaeiñmu, doi mai quisu cutranpiuqueyequeiñmu. Biblia feipi: “Jehová cutranpiuqueyechequei ca cüme piuquengei”. Cafei tati pu huiñoraquiduamtulu ñi huesa femün, quisu ta cutranpiuqueyefi. Feimu, ¿nor juzgachenoafulu Jehová? (Salmo 103:8; 2 Pedro 3:9).

Chau Ngünechen femquei nor dungu, ¿chumngechi cümelcaqueiñmu tüfa? Ti apostol Pablo feipi Chau Ngünechen “dullintuchequelai. Doi mai llouquefi inei tañi yamnieteu ca femlu cümeque dungu, chuchi tuhun-ngele rume” (Hechos 10:34, 35). Jehová dullintuchequelai, tüfa pengeli ñi norngen ta quisu. Feimu chem mollfüñ ca tuhun nieliyiñ rume, colegiotunofuliyiñ rume, ricu cam pofrengeliyiñ rume, com iñchiñ hueniyeafeiñmu Chau Ngünechen ca poyeafuiñ tati. Felei, Jehová ñi femquen nor dungu cümelcaqueiñmu llemai.

Jehová femquei nor dungu ca ayüquei taiñ cümelcayaeteu tüfa. Feimu elueiñmu taiñ  raquiduamal. Biblia feipi tüfa quiñe ley reque felei ‘ñi huiriconcülen taiñ piuque mu’ ca “quimfalcünuquei” ñi cümen ca ñi cümenon taiñ femün (Romanos 2:15). ¿Chumngechi cümelcaqueiñmu? Cüme raquiduamliyiñ, famentuafiyiñ huesaque dungu. Cafei huelulcauliyiñ, huiño raquiduamtuaiñ. Felei llemai, quimtuculiyiñ Jehová ñi femquen nor dungu, doi fülconafuiñ ta quisu.

“Chau Ngünechen fei ta piuqueyen” (1 JUAN 4:8).

Chau Ngünechen nehuen-ngei, feimu femquei com dungu. Ca com ñi femqueel cüme pengeli ñi quimün-ngen ca ñi femquen nor dungu. Huelu, ¿chumngelu femngechi femquei? Ti Biblia feipi Chau Ngünechen fei ta piuqueyen. Felei llemai, piuqueyen mu femquei com dungu.

Jehová chem no rume ta duamnielai. Huelu fente ñi piuqueyechefengen, deumafi pu püllü ca ti pu che. Piuqueyen mu deumafi ti mapu com che ñi cüme feleal fei mu. Cafei Biblia feipi, Jehová “eluquefi antü tati cümeque che ca huesaque che. Cafei eluquefi mahun tati norngelu ca pu norngenolu” (Mateo 5:45).

Cafei ‘Chau Jehová rume poyechefengei ca cutranpiuqueyeche’ (Santiago 5:11). Quisu cuñillquefi tuchi cüpa quimeteu ca fülmaeteu rüf piuque mu. Mai, duamtunieiñmu quisuque iñchiñ (1 Pedro 5:7).

Chau Ngünechen ñi piuqueyen, ¿chumngechi cümelcaqueiñmu? Müna ayüucüleiñ ñi acun ta pehu, ñi ayelen quiñe pichiche ca taiñ piuqueyenieteu taiñ pu che. Com tüfa fütra dungu no, huelu müna ayühulqueiñmu.

Chau Jehová cümelcaqueiñmu ca quiñe dungu mu: ti llellipun. Biblia feipi: “Chem meu no rume fill raquiduamlayaimün. Doi mai ngillatuqueafimün ta Chau Ngünechen, llellipuqueafimün tamün quelluaeteu com dungu meu ca mañumtuqueafimün”. Quiñe cüme chau reque, Jehová cüpa allcütueiñmu. Feimu catrüduamcüleliyiñ, ngillatuafiyiñ müten ta Jehová, quisu eluaiñmu tañi “cüme tüngün” (Filipenses 4:6, 7).

Inaduampeiñ nga ñi chumngen Chau Ngünechen: nehuen-ngei, quimün-ngei, femquei nor dungu ca piuqueyechefengei. Huelu taiñ doi quimafiel, ngüneduamaiñ ñi chumün taiñ quelluaeteu ca chumai taiñ cüme feleal.