Choyüngen Canadá mapu mew, Quebec pingechi waria mu. Tüfachi waria müley kiñe trokiñ mapu mu Quebec ka pingelu, üye mu pu che frances kewün dungukey. Tañi chaw Louis pingey ka tañi ñuke Zélia pingey, kidu engu piwkeyenkechi tremümenew. Tañi chaw yewenchengefuy ka rume ayükefuy ñi papeltual. Iñche rume ayükefun wirintukual fillke dungu, fey ayüniefun ñi periodista ngerpual.

12 tripantu nielu iñche, puwi tañi ruka mu epu wentru Dungukelu Iney Ngen Jewba. Kiñe tüfachi wentru Rodolphe Soucy pingey ka kiñe mu küdawkefuy iñche ñi chaw engu. Iñche müte kimkelafun pu Dungukelu Iney Ngen Jewba ka duamkülekelafun ñi doy kimafiel engün. Welu rume ayüfiñ tañi küme chengen ka chumngechi küme wiñoldungueiñmu taiñ ramtun Biblia mew. Tañi pu chaw ka femngentufingu, feymu kom eluwiyiñ taiñ chillkatual ti Biblia.

Feychi antü mew amukefun kiñe colegio catolico mu. Kiñeke mu nütramkakefun tañi pu compañ chem tañi kimürpun Biblia mu. Tañi pu kimeltuchefe sacerdote ngefuyngün, fey kiñe antü kimürpuyngün chem ñi nütramkafiel tañi pu compañ. Kiñe tati pu sacerdote chaftulaenew Biblia mew rume chem tañi kimürpun, doy may dalluntukuenew ñi welurakiduamelkefiel tañi pu compañ. Aroftripan feychi nütramkawün mu, welu rume kelluenew. Kimtukun feychi pu sacerdote ñi kimeltukenoel Biblia ñi feypin ti colegio mu. Fey ayüniewelan ñi amual üye mu, feymu tañi pu chaw eluenew ñi chillkaturpual kangelu colegio mew.

Amulerpun ñi chillkatufiel ti Biblia, welu rume llükakefun ñi amuldungual fill ruka püle, feymu pepikawkülelafun ñi fautisawal. Tati Iglesia catolica rume koneltulefuy politico dungu mew ka ngenkawkülefuy reke tati pu che mu. Feymu rume weda kayñetungekefuy  taiñ amuldungun küdaw. Feychi antü mew, tati wentru longkolekefulu Quebec mapu mu Maurice Duplessis pingekefuy, kidu rume kiñewkülefuy tati Iglesia mu. Tüfachi wentru kelluntukukefuy fentren che ñi wedalkayafiel ka kayñetuafiel pu Dungukelu Iney Ngen Jewba. Feymu feychi antü mu, pu peñi ka pu lamngen mülefuy ñi newen piwkekünuwal tañi amuldungual.

Rume kelluenew ñi llükanchengenoal kiñe peñi John Rae pingelu, kidu amuy tati 9 chillkatun Galaad pingechi Chillkatuwe mu. Tüfachi peñi fentren kimün niefuy, welu rume ñom piwkengefuy ka eluwkülefuy ñi nütramkangeal. Kiñeke mu müten ngülamtuenew, welu tañi küme femün mu fentren dungu kimürpun. Tüfachi peñi küdawtukefuy frances kewün dungual, feymu fentren rupa trür amuldungukefuyu, fey ñi kelluafiel. Rume kelluenew ñi tripan tüfachi peñi iñchiw, fey eluwürpun tañi fautisawal 26 konchi mayo 1951 tripantu. Dew rupawyefuy 10 tripantu ñi wünen nütramkaetew pu Dungukelu Iney Ngen Jewba.

Pichin peñi ka lamngen müten koneltulefuy taiñ trawünche mülelu Quebec waria mu, welu epe kom engün wünelekefuy amuldungun mew. Feymu iñche ka femngechi eluwün tañi wünelerpual amuldungun mu. Feychi antü mu, niekefuiñ tati Biblia müten taiñ amuldungulelafiel pu che. Feymu mülefuy taiñ küme adümafiel. Fey eluwün ñi kimürpual fillke texto ñi küme kimeltual tati rüf dungu. Welu feychi antü mu, tati Iglesia catolica marcakefuy kiñeke Biblia, fey feypikefuy ñi papeltungeal feychi Biblia müten, feymu fentren che pilafuy rume papeltual kakelu Biblia marcalenolu.

1952 tripantu mew, niewiyu Simone Patry iñchiw. Tüfachi lamngen nor piwke mu küdawelkefuy ta Jewba Quebec waria mew. Pichilewelu tayu niewal Simone iñchiw, iñche wünelewelan amuldungun mew, welu Simone iñchiw eluwiyu tayu küme küdawelafiel ta Jewba. Wiñamtuwiyu Montreal waria mu. Ka epe kiñe tripantu rupalu tayu niewün, nierpuyu kiñe pichi malen, Lise üytukulelfiyu.

Rupay 10 tripantu, fey tañi rakiduamtun ñi wiño wünelerpual amuldungun mu. 1962 tripantu mew, kiñe küyen mülepun Betel mülelu taiñ trokiñ mapu mu, fey ñi koneltual tati Chillkatuwe ñi Pepikangeam pu Longkolelu. Üye mu, kimürpufiñ kiñe peñi Camille Ouellette pingelu, fey trür mülekefuyu kiñe umañtuwe mu. Tüfachi peñi doyümniekefuy ti amuldungun küdaw niefulu rume ñi domo ka tañi  pu yall, fey tüfa afmatulenew. Feychi antü mu Quebec mapu mew kiñeke pichiken chaw müten eluwkefuy ñi wüneleal amuldungun mu. Welu peñi Camille eluwkülefuy ñi wüneleal amuldungun mu. Tunte tayu trürkülen, peñi Camille yafültukuenew ñi ngüneduamal tañi mongen, fey ñi doy küdawelafiel ta Jewba. Pichin küyen rupalu, kimtukun ñi ka wiño wünelerpuafel amuldungun mu. Welu kiñeke cristiano müte kümenolu trokikefuy tañi femngechi femal iñche, welu maneluwürpun Jewba mu tañi kelluaetew, fey wünelerpun müten amuldungun mew.

1964 tripantu mu, Simone iñchiw elungeyu tayu wünelerpual amuldungun mu, 150 hora fill küyen mülefuy tayu femal, fey werküngeyu Quebec waria mew. Üyew küdawelfiyu ta Jewba amulechi tripantu mew. Feychi mu müte katrütungelaiñ taiñ amuldungual, welu petu mülekafuy kiñeke che taiñ kayñetukeetew.

Kiñe sabado nagantü mu, miyawfun Sainte-Marie waria mu, tüfa pichi tripalefuy Quebec waria mew. Üye mu kiñe soltau yeenew tati comisaria mu, fey carceltukuenew tañi amuldunguyawün, fey tañi katrütungefel. Fey wüla yengen kiñe llükafalchi juez mew, Baillargeon pingefuy. Kidu ramtuenew: “¿Iney dunguñpeaeymu tati juicio mu?”. “Glen How”⁠ * pifiñ. Fey tati juez feypi: “¡Fey amfe! ¡Müna weda!” pi. Taiñ peñi Glen abogado ngefuy ka dunguñpefi fentren peñi ka lamngen, fey wewi fentren juicio. Pichin antü rupalu, tati tribunal feypi iñche tañi dalluntukungewenon.

Fente taiñ kayñetungen Quebec mapu mew, küdawngefuy peal chew taiñ trawüluwal. Ngellu peiñ kiñe kuyfi pichi bodega reke taiñ trawüluwal, nielafuy rume chumngechi taiñ eñumtual. Pukem mew, yekefuiñ kiñe pichi estufa taiñ eñumtuam. Kiñeke hora petu ñi kon-non ti trawün, walloñmaniekefuiñ ti eñumtuwe, fey entukefuiñ ayüfal dungu ñi rupan amuldungun mu.

Rume ayüwülenew ñi küme amulerpun ti küdaw amulechi tripantu mew. 1960 tripantu püle pichilekefuy müten pu peñi ka pu lamngen mülelu Quebec, Côte-Nord ka Gaspé pingechi mapu mew. Famülke mu, fentren peñi ka lamngen mülerpuy feychi mapu mew ka trawüluwkeyngün adngechi Trawünwe Ruka mu.

1970 tripantu mu, Simone iñchiw elfalkünungeyu tayu witranmayafiel kiñeke trawünche. Fey 1973 tripantu elfalngeyu tayu compañafiel kiñeke witran-ngepakechi longkolelu tañi yafültukuafiel. Kom feychi tripantu, rume kimeltuenew fente ñi adümuwkülen kakelu witran-ngepakechi longkolelu. Kiñeke tüfa, fey taiñ peñi Laurier Saumur⁠ * ka David Splane.⁠ * Dewlu tati fütrake trawün, David engu ngülamtuwkefuyu chumngechi doy küme kimeltufe ngeal. Kiñe rupa, David feypienew: “Peñi Léonce, rume ayüfiñ tami inan wewpin. Rume kümey tati, welu iñche entuafun küla wewpin tami wewpin mu”. Iñche dullikefun  fentren dungu ñi feypial tañi wewpin mu, feymu duamtuniefun dullial doy pichin dungu tañi feypial.

Chumngechi tañi nütramkapeel, iñche elfalngen tañi yafültukuafiel kiñeke witran-ngepakechi longkolelu. Welu fentren peñi ka lamngen mülelu Quebec mapu mew kimnieenew, feymu amulu iñche tati trawünche mu ayüfuyngün taiñ trür amuldungual. Rume ayükefun amuldungual kidu engün mu, welu kiñepülekünufiñ reke tati witran-ngepakechi longkolelu feychi semana. Feymu llemay, kiñe rupa kiñe witran-ngepakechi longkolelu piwkeyenkechi feypienew: “Kümey tami tripayal pu peñi ka pu lamngen engün, welu tüfachi semana iñche ka duamyefeyu tami kelluafiel”. Rume kelluenew feychi ngülam.

1976 tripantu mu, ruparumen kiñe fütra weñangkün dungu mu. Tañi poyen domo Simone, weda kutrankülerpuy, fey larpuy. Tañi domo yem rume duamniekefuy ta kakelu che ka müna piwkeyeniefuy ta Jewba, feymu müna küme domo ngefuy. Tañi doyümfiel ti amuldungun küdaw, kelluenew ñi yafüluwal. Ka femngechi mañumkefiñ ta Jewba tañi kelluntukuetew piwkeyen mu petu ñi rupan feychi fütra weñangkün dungu mu. Rupalu kiñeke tripantu ka kurengetun, niewiyu Carolyn Elliott iñchiw. Tañi we domo gringodungukey ka wünelekey amuldungun mu, fey küpay Quebec mapu mu tañi amuldungual. Carolyn rüf duamniekey ta kakelu che ka eluwkülekey ñi nütramkangeal, doyelchi may duamtukefi pu yewenchengelu ka kidulelu. Kafey rume kelluenew ñi femal tüfachi küdaw, witran-ngepakechi longkolelu ngeal.

Enero 1978 tripantu, elfalngen ñi kimeltufe ngeal tati Chillkatuwe ñi Pepikangeam pu Wünelekelu Amuldungun mew. Tüfa tati wünen chillkatun ñi femngeel Quebec mapu mew. Iñche koneltukelafun feychi escuela mu ka pekelafun rume chem lifru ñi chillkatungeal, feymu rume llükalefun. Welu tati chillkatuwe mu amuy fentren peñi ka lamngen fentren tripantu yenielu feychi küdaw mu. Iñche mülefuy tañi kimeltuafiel engün, welu ka kimürpun falinke dungu kidu engün mew.

 Amulelu 1978 tripantu, femngey ti fütra trawün feypilelu “Taiñ feyentun Ngünechen mew wewkey”. Tüfachi fütra trawün mu küpay fentren che fillke trokiñ mapu tuwlu, fey femngey ti Estadio Olímpico de Montreal. Turpu mülekelafuy femngechi fütra trawün Quebec mapu mu, amuy doy 80.000 che. Elfalngen tañi wiñoldunguafiel fentren periodista ti fütra trawün mu. Müna ayüwülenew ñi wirintukuel engün fentren kümeke dungu Jewba tañi trokiñche mu. Taiñ nütramkangeel triparpuiñ television ka radio mu doy 20 hora, kafey pu periodista entuyngün fentren wirintukun iñchiñ taiñ femken mu. ¡Fütra amuldungukaiñ reke!

Tañi fautisawün mu iñche, küdawelkefuiñ ta Jewba Quebec mapu mu, üye mu tati pu che frances kewün dungukey. Welu 1996 tripantu mu, werküngen ñi pemeafiel pu trawünche mülelu Toronto mapu mu, üyew tati pu che gringodungukey. Iñche newe adümlafun gringodungun, feymu pepilnoalu trokiwkefun ka llükakefun ñi wülal wewpin. Duamniefun ñi doy ngillatuafiel ta Jewba ka doy maneluwal kidu mu.

We mülepulu iñche Toronto mapu mu, rume llükalefun. Welu rume ayüwürpun ñi küdawelafiel ta Jewba epu tripantu üye mu. Tañi domo ñom piwke mu kelluenew ñi gringodungual, ka pu peñi ka pu lamngen rume kelluntukuenew ka yafültukuenew engün. Pürüm müten nierpun weke weni.

Kiñeke mu mülefuy fütrake trawün sabado ka domingo antü mu, feymu mülefuy ñi pepikakünual fentren dungu viernes antü mew. Welu iñche ka ayükefun ñi tripayal amuldungual viernes nagantü mu. Kiñeke peñi ka lamngen pefiel mu fentren duam ñi nieel iñche, ramtuwkefuyngün chi chumngelu (chemu) tripakefun ñi amuldungual feychi viernes antü. Kimtukun ñi rume küme duamelkeetew amuldungulelafiel pu che, feymu tripakefun. Fanten mu, rume ayüwmakeenew amuldungucheal.

1998 tripantu, Carolyn iñchiw werküngeyu Montreal waria mu, fey tayu wünelerpual amuldungun mu 140 hora fill küyen. Fentren tripantu, elfalngen ñi adkünual ti amuldungun küdaw chew ñi rupaken alünke che. Ka femngechi nütramkakefiñ tati pu periodista, fey ñi norümtungeal chem ñi rakiduamken pu che Jewba tañi trokiñche mu. Famülke mu, amuldungulelkefiyu pu katripanche akulu Canadá mapu mew, fentren engün ayüniey ñi doy kimafiel tati Biblia.

Dew rupay 68 tripantu tañi fautisawün mu. Rakiduamün mu chem ñi rupan, rume mañumkülen. Falinturpufiñ ti amuldungun küdaw ka kellufiñ fentren che ñi kimafiel ti rüf dungu, feymu müna ayüwkülen. Tañi ñawe Lise tañi füta engu tremümfi tañi pu pichikeche, fey wüla ka wünelerpuyngu amuldungun mu. Tañi ñawe turpu fentekünukelay ñi ayüwünkechi amuldungucheken, feymu rume ayüwken. Ka longkontukunien, fentren peñi kelluenew tañi küme femün mu ka ngülamtuenew ñi doy küme weniyeafiel ta Jewba ka ñi küme wechurpual tañi elfal küdaw, feymu rume mañumkülen. Ka kimürpun müley taiñ maneluwal Jewba tañi newen mu, femngechi müten püntütripalayaiñ kidu mu chew rume taiñ werküngeel (Sal. 51:⁠11). Chaw Jewba eluenew ñi püramyeafiel tañi fütra üy, feymu af mañumlayafiñ (Sal. 54:⁠6).