Küdawün-ngey peal ti doy küme yewün ñi eluafiel kiñe che. Rüfkünu may tati llowalu ti yewün feypiay tunte tañi ayüel. Fey kakerumeafuy chem ñi ayükeel pu che tañi elungeal.

Kiñe weche wentru ayüafuy tañi elungeal ti we tripachi elektroniko chemkün. Ka femngechi kiñe wentru dew tremlu, ayüafuy ñi elungeal kiñe yewün tañi piwkentukuel, tüfa kiñe chemkün fentren tripantu nielu tañi reñmawen mu. Ka kiñeke mapu mu pu wechekeche ka füchakeche doyümkey tañi elungeal plata, femngechi ñi dullial tañi chem chumal.

Fey fentren che yafüluwkey tañi peal ti doy küme yewün ñi eluafiel tañi piwkeyen che. Küdawün-ngefule rume, longkontukuliyiñ kiñeke ngülam, peafuiñ ti doy küme yewün. Ngüneduamaiñ meli dungu taiñ kelluaetew ñi wülal ti doy küme yewün.

Tati llowalu ti yewün ñi ayünieel. Kiñe wentru mülelu Belfast mu (Irlanda del Norte), elungey kiñe bicicleta nielu 10 kam 11 tripantu püle, fey ti doy küme yewün ñi elungeel trokifi, “rüf ayünielu kay ñi nieafiel” pi. Tüfa pengeli pu che tañi ayünieel nüwküley tañi chumngentuafiel ti yewün. Rakiduamnge iney tami küpa elufiel ti yewün. Kimtukunge chem tañi falintukeel, tüfa nüwkülelu am tañi ayünieel mu. Kiñe dungu, pu füchakeche falintukey ñi müleal tañi pu che engün. Fey ayünieafuy chi fillke rupa ñi peafiel tañi pu yall ka tañi pichikeche. Feymu pu füchakeche doyümay ñi trür miyawal tañi pu che engün, ñi eluaetew mu kakelu yewün.

Küme allkütuaymi tami kimal chem ñi ayünieel ta che. Biblia ta feypi: “Müley tamün wüne allkütuael, welu müley tamün pürümkawnoael  tamün dunguael” (Santiaw 1:19). Nütramkalmi tami pu che ka tami pu weni engün, küme allkütuafimi tami kimal chem tañi ayükeel engün, femngechi kimaymi chem yewün eluafuymi tami ayüwülafiel engün.

Chem tañi duamnieel tati llowalu ti yewün. Elufilmi tañi duamnieel, kiñe che müna sakiafuy kiñe yewün, pichi falile rume. Welu, ¿chumngechi kimafuymi chem ñi duamnieel ti che?

Doy kümeafuy ramtuafiel ta che chem tañi duamnieel kam ayünieel. Welu kiñeke che küpa afmatulkefi ta che tañi yewün mu, feymu ramtukelay chem tañi ayünieel engün. Ka kiñeke che feypikey chem tañi ayükeel ka ayükenoel, welu müte feypikelay chem tañi duamnieel engün.

Feymu küme ngüneduamnge chem ñi rupakeel ta che. ¿Wechengey kam füchaley? ¿Dew niey afkadi kam petu no? ¿Wüdapey may kam lantupey chi? ¿Küdawkey kam küdaw-welay? Fey rakiduamnge chem yewün ñi duamnieel ta che.

Tami kimal chem ñi rüf duamnieel ti che tami küpa elufiel kiñe yewün, nütramkayaymi kakelu che engün rupalu kidu reke. Feypiafeymew chi kiñe dungu tañi duamnieel kakelu che ñi kimnofiel. Femngechi eluafuymi kiñe yewün ñi rüf duamnieel, fey tañi ngüneduamkenoel kakelu che.

Puwchi antü mu. Biblia feypi: “Kiñe dungun feypingelu puwchi antü mew, ¡müna küme dungu tati!” (Proverbios 15:23). Feymu puwchi antü mu entuliyiñ taiñ dungun kümelkayafuiñ taiñ allkütuetew. Ka femngechi feley taiñ femkeel, puwchi antü mu elufiliyiñ ta che kiñe yewün, fey fütra ayüwafuy llemay.

Fentren che wülkey yewün femngechi dungu mu: kiñe weni epe kurengealu, kiñe weche wentru dewlu ñi kolegiotulen, kiñe kurewen niepüñeñkülelu. Feymu kiñeke wirintukuyngün feychi sakin antü tañi küme adkünual chem yewün tañi wülal. *

Rüfkünu llemay, chumül rume wülafuiñ yewün, kiñe sakin antü müten no tati. Welu müley taiñ kuñiwtukuleal. Rakiduamnge, kiñe wentru elurumefile yewün ta kiñe domo, kidu rakiduamafuy ñi küpa dakeletew, welu ti wentru rüf ayünole tüfa müleafuy wedake dungu ka yafkawün. Feymu ngüneduamfali tüfachi dungu: ¿chumngelu am küpa elufi ti yewün?

Chumngelu ñi wülkeel ti yewün. Chumngechi taiñ inaduampeel nga, ngüneduamfali chem ñi rakiduamal ti che llowle ti yewün. Welu ka femngechi müley taiñ ngüneduamal chumngelu küpa wülkeiñ ti yewün. Fentren che feypiafuy: “Küme duam mu eluan yewün”, welu kiñeke kawiñ mu fentren che wülkey yewün ayünolu rume ñi femal. Kakelu che elukey yewün tañi fürenengeal kam sakingeal.

¿Chumafuiñ ta wülal yewün küme duam mu? Biblia feypi: “Kom dungu tamün femel, femkeaymün piwkeyewün mew” (1 Korintio 16:14). Elufilmi yewün tami rüf piwkeyefiel ka duamniefiel ti che, fey ayüwün mu lloway ti yewün. Fey kimtukuaymi fente tami ayüwülkeetew wülal küme duam mu. Fey eluliyiñ yewün piwkeyen mu ka ayüwülafiyiñ taiñ Wenu Chaw. Ti apostol Pablo sakifi pu kristiano mülelu Korintio mu, elufilu kay piwkeyen mu itrofillem ñi kelluafiel pu peñi ka lamngen Judea mapu mu. “Ngünechen am piwkeyekefilu tati che ayüwünkechi wülkelu” pifi (2 Korintio 9:7).

Longkontukulmi ti ngülam taiñ ngüneduampeel, tami yewün mu ayüwülafimi ta che. Chaw Ngünechen longkontukuy tüfa ka kakelu dungu ñi eluafiel ta che ti doy küme yewün mülelu. Ka trokiñ mu ngüneduamaiñ chem am feychi falin yewün.