Jewba, taiñ Chaw ka taiñ dewmaetew, doy fütra wewnieeiñmew ñi kimün iñchiñ mew. Ka piwkeyeiñmew ka ngüneytunieeiñmew iñchiñ. Kidu dewmalaeiñmew ñi kiduke iñchiñ taiñ kidu ngünewküleal (Jeremías 10:⁠23). Kiñe pichiche reke duamniey tañi ngüyuletew ñi chaw ka tañi ñuke, ka femgechi kom iñchiñ duamnieiñ taiñ ngüyuletew Dio (Isaías 48:⁠17, 18). Biblia ñi feypin wülkey ngüyulün fey kiñe yewün reke tuwi Dio mu. Chillkatunge 2 Timotew 3:⁠16.

Jewba ñi feypin ka tañi ngülam kimeltueiñmew chumgechi küme mongeleal, ka pengelkeeiñmew chumgechi nieafuyiñ afnoachi kümelkan, küpalechi antü mu. Dio dewmaeiñmew, fey mew müley taiñ ayüwungechi feyentuafiel ñi feypietew. Chillkatunge Salmo 19:⁠7, 11, ka Apokalipsi 4:⁠11.

Kiñeke rüf dungu tuwlu Biblia mupiñ dungu mew, pengelkeeiñmew chem tañi ayün Dio taiñ femal fill dungu mew. Kakelu ngülam dungu kümekey kiñe dungu müten (Deuteronomio 22:⁠8). Müley taiñ küme rakiduamal ñi küme kimal chumgechi ti mupiñ dungu, mülelu Biblia mu feypieiñmew chem taiñ femal (Proverbios 2:⁠10-12). Kiñe dungu, Biblia kimeltukey ti mongen fey ta kiñe yewün reke tuwlu Dio mu. Tüfachi mupiñ dungu kelluaeiñmew taiñ küdaw mew, taiñ ruka mew, ka femgechi taiñ amuleal, femliyiñ küñiwtuleaiñ elkünulayaiñ taiñ mongen ka kakelu che ñi mongen küñiwtun dungu mu. Chillkatunge Hecho 17:⁠28.

Jesu kimeltuy epu falingechi werkün dungu. Ti wünen mu  pengeli chumgelu (chemu) müleyiñ iñchiñ: taiñ kimafiel, kom piwke mu rumel poyeafiel Dio. Müley taiñ küme rakiduamal chumgechi koneltuay tüfachi ngülam kom taiñ dullial (ngümintual) chem taiñ femal (Proverbios 3:⁠6). Feyti yeniekelu tüfachi ngülam ñi mongen mu weniyewafuy Dio engu, rüf ayüwün ka afnoachi mongen nieafuyngün. Chillkatunge Matew 22:⁠36-38.

Ti epungechi werkün dungu kellukeeiñmew taiñ kümelkawal kakelu che iñchiñ (1 Korintio 13:⁠4-7). Inaliyiñ tüfachi werkün dungu taiñ mongen mu, koneltuaiñ taiñ inayentuafiel chumgechi Dio ñi femkefiel ta che. Chillkatunge Matew 7:⁠12, ka 22:⁠39, 40.

Dio ñi feypin kimeltulfi pu reñmawen chumgechi ñi kiñewküleal piwkeyen mu (Kolosense 3:⁠12-14). Kafey Dio ñi Dungu montulkefi pu reñma ñi kimeltuafiel tati kurewen rumel tañi müleal engu. Chillkatunge Marku 10:⁠7-9.

Feyentuafiel Biblia ñi kimeltun, ka kellueiñmew taiñ kintukawal, ka taiñ nieal kiñe tüngkülechi piwke. Kiñe dungu, fentren ngen küdaw doy ayüy ñi nieal pu küdawfe yeniekey ñi mongen mu chumgechi pin ta Biblia, weñefe ngenoal, ka küme küdawfe ngeal (Proverbios 10:⁠4, 26; Ebrew 13:⁠18). Ka Dio ñi Dungu kimeltueiñmew ñi ayüwküleal kom duamfalchi dungu mu müten, ka taiñ doy rume falintuafiel taiñ weniyefiel Dio iñchiñ, ta kake dungu mu rume. Chillkatunge Matew 6:⁠24, 25, 33, ka 1 Timotew 6:⁠8-10.

Mongeliyiñ chumgechi pin ta Biblia, kellukeeiñmew taiñ doy kümelkaleal ka küme feleal (Proverbios 14:⁠30; 22:⁠24, 25). Kiñe dungu, inafilmi Dio ñi ngülam tami katrütual ti ngollin dungu, montulafeymu rume wedake kutran, ka weda inawtun dungu layafuymichi (Proverbios 23:⁠20). Jewba eluñmaeiñmew ñi pütokoal pülku, welu pichin müten (Salmo 104:⁠15; 1 Korintio 6:⁠10). Dio ñi feypin kümelkaeiñmew, kimeltueiñmew taiñ ngüneduamnieal taiñ femken ka taiñ rakiduamken (Salmo 119:⁠97-100). Welu pu rüfgechi kristiano yamkefiyiñ tüfachi ngülam taiñ kümelkawal iñchiñ müten no. Welu femkefiyiñ taiñ püramyeafiel taiñ Chaw Dio Jewba. Chillkatunge Matew 5:⁠14-16.