Juan 11:1-57
11 Ukatjja Lázaro sutini mä jaqew utjäna, jupajj usuntatänwa. Jupasti Betania markatänwa, María, Marta+ sat kullakanakapas uka jiskʼa markanwa jakapjjarakïna.
2 Uka Mariaw mä suma olorani aceitempejj Tatitur warjjattʼäna, ñikʼutapampiw kayunakapsa wañsuyarakïna.+ Jupan Lázaro jilapaw usuntatäskäna.
3 Ukhamasti kullakanakapajj Jesusan ukaruw maynir khitapjjäna, akham sasin yatiyaniñapataki: “Tata, munat amigomaw usuntata” sasa.
4 Jesusajj uk istʼäna ukhajja, akham sasaw säna: “Uka usojj janiw jupan jiwañapatakïkiti, jan ukasti Diosar jachʼañchañatakïniwa,+ ukhamat Diosan Yoqapajj uka usu taypi jachʼañchatäñapataki” sasa.
5 Jesusajj Martarusa, Mariarusa, Lazarorus wal munasïna.
6 Ukampis Lazaron usutätap yatïna ukhajja, pä urumpiw jupajj kawkinkkäntï uka lugaran quedasiskäna.
7 Uka qhepatjja akham sasaw discipulonakar säna: “Wasitat Judear sarañäni” sasa.
8 Discipulonakapajj jupar sapjjarakïnwa: “Rabí,*+ jichhakirakis Judeankir jaqenakajj qalamp jaqjañ munapjjayätamjjä,+ ¿wasitat jumajj ukar sarañ munta?” sasa.
9 Jesusasti sarakïnwa: “Uru qhanajj 12 horanakaniwa, ¿janich ukhamäki?+ Uru qhanan sarnaqerejj janiw kunampis lanktʼaskiti, aka mundon qhanap uñjatap layku.
10 Arum sarnaqerejj lanktʼasiwa, qhanajj jupan jan utjatap layku” sasa.
11 Ukanak parlañ tukuyasasti, akham sasaw sarakïna: “Lázaro amigosajj iktʼawayjjewa,+ jupar sartayiriw nayajj ukar saraskta” sasa.
12 Ukatwa discipulonakajj jupar sapjjäna: “Tata, ikiskchejja waliptaskaniwa” sasa.
13 Jesusajj Lazaron jiwatapatwa parlaskäna. Ukampis arkirinakapajj ikin samartʼaskatapats parlkaspa ukham amuyapjjäna.
14 Ukatwa Jesusajj jupanakar qhan säna: “Lazarojj jiwatawa,+
15 ukampirus jumanak laykojj wal kusista, walik nayajj jan ukankkayätti, ukhamat jumanakan creyipjjañamataki. Jupan ukar sarapjjañäni” sasa.
16 Ukatwa Ispa* sat Tomasejj akham sasin discípulo masinakapar säna: “Jiwasajj sararakiñäni, jupamp chik jiwañasataki”+ sasa.
17 Jesusajj purïna ukhajja, Lazarojj pusi urunakaw sepulturankjjäna.
18 Betania markajj Jerusalén jakʼankänwa, niya kimsa kilometronak* sarañankänwa.
19 Walja judionakaw Martampin Mariampin ukarojj jutapjjäna, Lázaro jilapan jiwatapat chuymachtʼañataki.
20 Jesusan jutaskatap yatisinjja, Martajj jupamp jikisiriw saräna. Mariasti+ utan qontʼatäskänwa.
21 Ukatjja Martajj akham sasaw Jesusar säna: “Tata, jumatï akankasmänjja, janiw jilajajj jiwkasapänti.
22 Jichhajj yatiraktwa taqe kuntï Diosar maykäta ukanakjja, Diosajj churätamwa” sasa.
23 Jesusajj jupar sarakïnwa: “Jilamajj sartjjaniwa” sasa.
24 Ukjjarusti Martajj sänwa: “Nayajj yattwa, qhepa urun jiwatanakajj jaktanipkani+ ukhaw jupajj sartanjjani” sasa.
25 Jesusajj jupar sarakïnwa: “Jiwatat jaktañasa jakañasa nayätwa.+ Khititejj nayar confiyki* ukajja, jiwkani ukhas jaktaniniwa.
26 Taqe khititï jakki, nayarus confiykitu* ukajja, janipuniw kunapachas jiwkaniti.+ ¿Jumajj uk creytati?” sasa.
27 Jupajj sarakïnwa: “Jïsa, ukhamaw Tata, nayajj creytwa, jumajj Diosan Yoqap Cristötawa, khititï aka mundor jutañapäkän ukätawa” sasa.
28 Ukanak sasasti, Martajj María kullakapar jawsiriw saräna, akham sasaw jamasat säna: “Yatichirejj+ akankjjewa, jawstamwa” sasa.
29 Uk istʼasasti Mariajj mäkiw sartasin jupan ukar saräna.
30 Jesusajj janïraw uka jiskʼa markar mantkänti, jan ukasti kawkintï Martajj jupamp jikiskän ukankaskänwa.
31 Mariar jankʼaki sarthapisin misturi uñjasajja, utan jupar chuymachasipkäna uka judionakajj sepulturar+ jachiriw saraskpacha sasaw amuyapjjäna, ukatwa jupar arkapjjäna.
32 Jesusan ukar purisasti, nayraqatapar qonqortʼasisaw Mariajj akham säna: “Tata, jumatï akankasmänjja, janiw jilajajj jiwkasapänti” sasa.
33 Mariar jachir uñjasasa jupamp chika jutir judionakar jachir uñjasas Jesusajj walpun llaktʼasïna,* chuymapsa chʼalljjtayasirakïnwa.
34 Jupasti sänwa: “¿Kawkirus uchapjjta?” sasa. Jupanakasti sapjjarakïnwa: “Tata, jutamaya, uñjarakim” sasa.
35 Ukatjja Jesusajj jachaqtʼasïnwa.+
36 Ukatwa judionakajj akham sasin sapjjäna: “Uñjapjjam, ¡walpun jupar munasitayna!” sasa.
37 Yaqhepajj sapjjarakïnwa: “Aka jaqejj mä juykhurus nayranakat qollarakïnsä,+ ukhamajj aka jaqen jan jiwañapatakejj ¿janit kuns lurkaspänjja?” sasa.
38 Wasitat chuym chʼalljjtayasisasti, Jesusajj sepulturaruw saräna. Cheqas uka sepulturajj mä qollu pʼiyänwa, mä qalamp atkatatarakïnwa.
39 Jesusajj akham sarakïnwa: “Uka qal ateqapjjam” sasa. Ukampis jiwirin Marta kullakapajj akham sasaw jupar säna: “Tata, niya thujstatäjjpachawa, pusi uröjjchejjaya” sasa.
40 Jesusajj jupar sarakïnwa: “Jumatï creyïtajja Diosan kʼajkir chʼamapwa uñjäta sasajj ¿janit sisksma?”+ sasa.
41 Ukatwa jupanakajj uka qal ateqapjjäna. Jesusasti alajjpacharuw uñtäna,+ sarakïnwa: “Awkiy, nayar istʼatamat yuspärsmawa.
42 Cheqansa nayajj yattwa, jumajj istʼapunistawa. Nayamp chikäsipki uka jaqenak laykuw nayajj ukham sista, ukhamat nayar khitanitam creyipjjañapataki”+ sasa.
43 Ukanak sasasti akham sasaw jupajj jachʼat artʼäna: “¡Lázaro, mistunim!”+ sasa.
44 Ukatsti jiwatäkäna uka jaqejj mistunïnwa, kayunakas amparanakas telanakamp chʼoqantata, ajanupas mä pañompi chʼoqantata ukhamaw mistunïna. Jesusasti sarakïnwa: “Chʼoqarapjjam, sarnaqarakpan” sasa.
45 Marian ukar jutir judionakatjja, kuntï Jesusajj lurkäna uk uñjasajj waljaniw jupar confiyapjjäna.*+
46 Yaqhep judionakajj fariseonakan ukaruw sarapjjäna, kunanaktï Jesusajj lurkäna ukanak yatiyapjjäna.
47 Ukatwa jilïr sacerdotenakasa fariseonakas Sanedrinankir* jaqenakar tantachthapipjjäna, sapjjarakïnwa: “¿Kamachañänisa? Aka jaqejj walja milagronak* luri.+
48 Jiwasatï ukhamak jaytañäni ukhajja, taqeniw jupar confiyapjjani,* ukatjja romanonakaw jutasin templossa* markassa aparapjjestani” sasa.
49 Caifás+ sutini mä jaqew jupanak taypinkaskäna. Jupaw uka maran jachʼa jilïr sacerdotënjja, jupanakarojj sänwa: “Jumanakajj janiw kunsa yatipktati,
50 janirakiw amuyasipktasa, jumanakatakejj walïspaw mä sapa jaqek marka layku jiwañapajja, markpach tukjatäñat sipansa” sasa.
51 Caifás jaqejj janiw pachpa amuyupat uk parlkänti. Niyakejjay uka maran jachʼa jilïr sacerdotëchïnjja, Jesusan judionak layku jiwañapatwa jupajj mä profecía arsüna.
52 Ukampirus janiw judionak laykukejj jiwañapäkänti, jan ukasti Diosan anatatat wawanakapar mayaru tantachthapiñatakiw jupajj jiwañaparakïna.
53 Jupanakajj ukürutpachaw jupar jiwayañatak parlakipapjjäna.
54 Ukhamasti Jesusajj janiw judionak taypin qhan sarnaqjjänti, jan ukasti wasar jakʼankki uksa toqeruw sarjjäna, Efraín sat markaru.+ Ukanwa discipulonakamp quedasïna.
55 Judionakan Pascua+ fiestapaw jakʼankjjäna. Ukhamajj marka anqäjjan jakir walja jaqenakaw janïr Pascua qalltkipan Jerusalenar makatapjjäna, Leyirjam qʼomachasiñataki.
56 Ukatsti jupanakajj Jesusaruw thaqapjjäna. Templon akham sasaw jupanakkam parlapjjäna: “¿Kamsapjjtas jumanakajja? ¿Janit jupajj fiestarus jutkpachäni?” sasa.
57 Jilïr sacerdotenakasa fariseonakasa akham sasaw jaqenakar sapjjatayna: “Maynitï Jesusajj kawkinkisa uk yatinejja yatiyapjjetätawa” sasa. Ukjja jupar katuntañatakiw* sapjjäna.
Notanaka
^ Ukajja, “Yatichiri” sañ muni.
^ Jan ukajja, “Gemelo”.
^ Griego arunjja, “niya 15 estadionaka”. Apéndice B14 uñjjattʼäta.
^ Jan ukajja, “fe; iyawsäwi”.
^ Jan ukajja, “fe; iyawsäwi”.
^ Griego arunjja, “espiritun walpun llaktʼasïna”.
^ Jan ukajja, “fe; iyawsäwi”.
^ Griego arunjja, “señalanak”.
^ Jan ukajja, “fe; iyawsäwi”.
^ Griego arunjja, “lugarassa”.
^ Jan ukajja, “preso katuntañatakiw”.
