Salmos 147:1-20
147 ¡Jah Diosar jachʼañchapjjam!*
Diosasar alabanzanak cantañajj* wali sumawa,¡Diosar jachʼañchañajj wali kusiskañawa, wali sumarakiwa!+
2 Jehová Diosaw Jerusalén markarojj saytʼayaski,+jupaw Israel markat aywitatayatäpki ukanakarojj tantachthapi.+
3 Jupaw chuyma pʼakintatanakarojj qolli,usuchjatanakapsa chʼoqtʼaraki.
4 Diosaw qhawqha warawaranakas utji uk jaktʼi,sutitkamwa taqe warawaranakarojj jawsaraki.+
5 Tatitusajj wali jachʼawa, wali chʼamanirakiwa,+yatiñapas* jan tukuskirirakiwa.+
6 Jehová Diosaw llampʼu chuymaninakarojj* wayti,+ukampis jan wali jaqenakarojj oraqeruw liwti.
7 Jehová Diosarojj yuspärañatak cancionanak cantapjjam,Diosasarojj arpampi alabanzanak cantapjjam.
8 Jupaw alajjpachanakjja qenayanakampi phoqanti,jupaw oraqerojj jallu purjjatayi,+jupaw qollunakanjja chʼojjña alinak jiltayi.+
9 Jupaw animalanakarojj manqʼañ churi,+jupaw manqʼatjam jachapki uka cuervo jamachʼinakan chhiwchhinakaparojj manqʼañ churi.+
10 Janiw juparojj caballon chʼamapajj musparaykiti,+janirakiw jaqen chʼamani lankhu charanakapas musparaykiti.+
11 Jan ukasti Jehová Diosajj khitinakatï jupar ajjsarapki ukanakatwa kusisi,+khitinakatï munasirïtapsa jan jaytjasirïtap suytʼasipki ukanakatwa kusisi.+
12 Jerusalén marka, Jehová Diosar jachʼañcham,Sion marka, Diosamar jachʼañcham.
13 Diosaw markaman punkunakapan trancanakapjja wali chʼollqher tukuyi.
Jupaw wawanakamarojj bendisi.
14 Jupaw oraqemarojj sumankañ apani,+juparakiw suma trigompejj sistʼaytamjja.+
15 Jupaw oraqerojj mä orden churi,arupasti jankʼakiw tʼijuraki.
16 Jupaw khunjja janqʼo tʼarwar uñtat purjjatayani,+jupaw qaqawrantatanakjja qhellar uñtat apatataraki.+
17 Jupaw qala chhijchhinakapjja jiskʼa jiskʼa pachinoqat tʼantʼar uñtasit purjjatayani.+
¿Khitirak thayapan aguantaspasti?+
18 Jupaw mä orden churi ukatsti chhullunkayajj chullutatiwa,jupaw thayap thaytʼayani+ ukatsti umanakajj jaltatjjarakiwa.
19 Jupaw Jacoburojj arunakap yatiyi,jupaw Israelarojj leyinakapsa amtatanakapsa yatiyi.+
20 Jupajj janiw kawkïr markampis ukham lurkiti,+jupanakajj janiw kunsa leyinakapat yatipkiti.
¡Jah Diosar jachʼañchapjjam!*+
Notanaka
^ Jan ukajja, “¡Aleluya!”. “Jah” sutejja, Jehová Diosan jiskʼaptayat sutipawa.
^ Jan ukajja, “Diosasatak music tukañajj”.
^ Jan ukajja, “amuytʼasirïtapas”.
^ “Llampʼu chuymanïña” siski uk glosarion liytʼäta.
^ Jan ukajja, “¡Aleluya!”. “Jah” sutejja, Jehová Diosan jiskʼaptayat sutipawa.
