Salmos 32:1-11
Davidan salmopa. Maskil.*
32 Khititï jan wali luratapat perdonatäki, juchapajj imjjatatäkaraki* ukajj kusisitawa.+
2 Kawkïr jaqerutï Jehová Diosajj juchapat jan juchañchki ukajj kusisitawa,+uka jaqen amuyupanjja janiw engañojj utjkiti.
3 Kunapachatï nayajj amukïkayäta ukhajja, uru jurnäl ayqotaj laykojja chʼakhanakajajj tukusiskänwa.+
4 Kuna laykutejj uruy arumaw amparamajj* jatjitäna.+
Kunjamtï umajj waña juntʼupachan wañskejja ukhamaw chʼamajajj wañsuwayjje. (Sélah).
5 Ukatjja juchajwa nayajj jumar arsusiyäta,janiw pantjasitaj imtʼkayätti.+
Akham sarakiyätwa: “Jehová Diosaruw jan wal luratanakaj-jja arsusëjja”+ sasa.
Jumasti pantjasitajsa juchanakajsa perdonistawa.+ (Sélah).
6 Ukatwa taqe khititï jumat jan jitheqtki ukajj jumar ortʼasïtam,+jumar jikjjatañatak tiempo utjkipana.+
Ukatjja walja umanakas sartkchinejja, janiw jupar jikjjatkaniti.
7 Jumaw nayan imantasiñajätajja,jumaw llakitsa jarkʼaqetäta.+
Nayar salvasajja kusisiñat arnaqasiñampiw muyuntayitäta.+ (Sélah).
8 Jumajj akham sistawa: “Nayaw suma amuyu churäma, cheqa thaknam sarañsa yatichäma.+
Nayaw amuytʼayäma, nayranakajasti jumaruw uñchʼukïtam.+
9 Janiy caballor uñtata jan ukajj mular uñtat jan amuytʼasir jaqer tukupjjamti,+salvajëpjjatap laykojja caballompir mulampirojj mä frenompi jan ukajj mä jakimampiw apnaqasijumar janïra jakʼachasinkkipana” sasa.
10 Jan wali jaqen llakinakapajj waljawa,ukampis Jehová Diosar confiyki ukajja jupan munasiñapsa jan jaytjasirïtapsa uñjaniwa.+
11 Cheqapar sarnaqerinaka, Jehová Dios layku kusisipjjam, kʼuchisipjjam.
Cheqap chuymaninaka, jumanakajj taqeni kusisit arnaqasipjjam.
