Elcaná sat mä israelitajj pä warminïnwa. Maynejj Ana satänwa, maynisti Peniná satarakïnwa. Elcanajj Anaruw jukʼamp munasïna. Peninajj walja wawanakanïnwa. Anajj janiw mä wawanïkänsa. Ukatwa Peninajj jupar wal jiskʼachäna. Elcanajj sapa maraw familiaparojj Siló markar irpirïna, Jehová Diosar tabernaculon adorañataki. Mä kutejja, Siló markankasipkäna ukhaw Elcanan munat Ana esposapajj wali llakitäna, ukatwa Elcanajj akham säna: ‘Ana, mirä amp suma, jan jachjjamti. Nayaw jumampïskta, wal jumar munassma’ sasa.

Qhepatjja, Anajj sapakiw orasir saräna. Jehová Diosarojj jachtʼasisaw yanaptʼa mayisïna. Akham sasaw Diosar mä promesa luräna: ‘Jehová Dios, mä wawa churitäta ukhajja, taqpach vidapan jumar serviñapatakiw churjjäma’ sasa.

Anajj wal jachaskäna, lakapas wal unoqtʼäna. Elí sat jachʼa jilïr sacerdotejj Anar uñjasajj umatäkaspas ukham amuyäna. Ukatwa Anajj säna: ‘Janiw umatäkti. Jehová Diosaruw mä jachʼa llakijat parlaskta’ sasa. Elí sacerdotejj pantjasitap amuyasajj akham sasaw Anar säna: ‘Kuntï Diosar mayiskta ukajj phoqaspan’ sasa. Ukatjja Anajj janiw sint llakiskjjänti, uka lugaratsa sarjjarakïnwa. Janïraw mä maras  paskänti ukhaw wawapajj nasjjäna, Samuel sasaw sutiyarakïna. ¿Anajj wal kusispachänjja uk amuytati?

Anajj Diosar promesa luratap janiw armkänti. Samuelur ñuñ tʼaqjjäna ukhajja, tabernaculoruw apjjäna, ukan Diosar serviñapataki. Anajj Elí sacerdoter akham sänwa: ‘Jehová Diosaruw aka wawa mayista, jichhajj taqpach vidapan jupar serviñapatakiw churjjta’ sasa. Elcaná chachampi Anampejj sapa maraw visitir sarapjjerïna, jan mangani mä suma isi regalot aparapipjjerïna. Jehová Diosajj phesqa wawampwa Anar churäna, kimsa yoqallampi pä imillampi.