Munat jilat kullakanaka:

Jiwasan askisatakiw enero 1, 2008 marat aksarojj jaqenakar jaytaski uka Yatiyañataki sat revistanjja, “Jupjam iyawsäwinïpjjañäni” sat yatichäwinak apsusiwayi. Sapa kimsa phajjsiw yaqh yaqha yatichäwinakajj mistuwayi, ukanakajj ¡chuymar purtʼkiripunïnwa!

Uka yatichäwinak liytʼirinakajj ¿kamsapjjesa? Marta warmin sarnaqäwipat parlki uka yatichäw liytʼasajja, akham sasaw mä warmejj säna: “Uka yatichäw liytʼasajj lartʼasiyätwa, nayajj jupjamarakiw visitanakar sum katoqtʼañ muntjja, ukampis jupanakamp parltʼañataki ukat kusistʼañataki yaqha luräwinak jaytañajj kunja wakiskirisa ukjja awisajj armasjjaktwa” sasa. Ester warmin sarnaqäwipat liytʼasajj akham sasaw mä tawaqetajj säna: “¡Uka yatichäwejj nayatakjamänwa! Awisajj suma ukat jichhak uñstir isinakampiw wal isisiñ munsna. Cheqansa, sum isisiñajj walikïskiwa, ukampis janiw ukaruk chuyma uchañasäkiti. Jehová Diosatakejj chuyma manqhasan kunjam jaqëtansa ukaw jukʼamp wakiskirejja” sasa. Ukat mä kullakajj apóstol Pedron sarnaqäwipat liytʼasajj akham sasaw wali kusisit säna: “Sarnaqäwipat liytʼasajja, nayas ukankkirista ukhamwa amuyasiyäta. Kuna toqenakatsa parlaskäna uk amuyañatakejj wali amuyumpiw liytʼawaytjja” sasa.

Uka liytʼirinakasa ukat yaqha ukham liytʼirinakasa, apóstol Pablon arunakapajj cheqätapwa uñachtʼayapjje, jupajj akham sänwa: “Taqe kunatejj nayratpach Qellqatan uchatäkän ukanakajj jiwasanakaruw yatichistu” sasa (Rom. 15:4). Jïsa, Jehová Diosaw jiwasar yatichañataki taqe ukanak Bibliar qellqayawayi. Walja maranakas Diosar serviskstanjja, uka yatichäwinakat yateqaskaksnawa.

¡Aka libro jichpach liytʼañamatakiw chʼamañchtʼapjjsma! Ukat familjam Bibliat yatjjatapkta ukhaw aka librot yatjjatapjjarakisma. ¡Wawanakajj wal aka libro liyiñ munapjjani! Ukat Taman Bibliat Yatjjatañataki sat tantachäwin aka librot yatjjataskani ukhajja, ¡janipuniw mä tantachäwirus faltasiñamäkiti! Jan armasimti, sum liytʼañatakiw tiempo apstʼasiñama. Taqe amuyumpi ukat ukankkasmas ukhamwa liytʼañama. Jupanakajj kunjamsa jikjjatasipjjäna uksa amuyañamarakiwa. Ukat jan walinakan uñjasisajja, kunsa jupanakajj lurapjjäna ukat kunsa jumajj lurarakisamäna ukwa amuytʼäta.

Jumanakar aka qellqat apayaniñajj nanakatakejj wali kusiskañawa. Jumatakisa ukat familiamatakisa mä suma bendicionäniwa. Wali munasiñampiw aruntanipjjsma.

Jehová Diosan Qhanañchirinakapan Oraqpachan Jilïr Irpirinakapa