“DIOSAMP SUM APASIÑATAKEJJA, JUTÏR URUNAK SUYTʼAÑAJJ WALI WAKISKIRIWA” sasaw mä librojj qhanañchi. “Ukarakiw jan sapak jikjjatasiñatakisa, janis kun lurirjamäksna ukham jan amuyasiñatakisa, jan ajjsarañatakis yanaptʼistu” (Hope in the Age of Anxiety).

Jutïr urunak suytʼañajj kunja wakiskirisa uk Bibliajj qhanañcharakiwa, ukampis akham sasaw ewjjtʼarakistu: “Jilïr jaqenakarojj jan alkatapjjamti, jiwir jaqëpjjatap laykojj, janiw qhespiyapkaspati” sasa (Salmo 146:3). Jaqenakar confiyañat sipansa, Diosaruw confiyañasa, Jupajj promesanakap phoqañatakejj wali chʼamaniwa. Kunanak lurañsa Diosajj arsuwayi ukwa jichhajj mä qhawqhanak uñjañäni.

JAN WALINAKAJJ JANIW UTJ-JJANITI, SUMA CHUYMAN JAQENAKAS WIÑAYATAKIW JAKAPJJANI. “Akat mä jukʼa urunakarojj ñanqha lurir jaqenakajj chhaqtjjaniwa; [...] llampʼu chuymaninakasti oraq katoqapjjani, jilarkir sumankañampiw kusisipjjarakini” (Salmo 37:10, 11). Salmo 37:29 textojj akham sarakiwa: ‘Aski jan ukajj suma chuyman jaqenakajj wiñayatakiw aka oraqen jakapjjani’ sasa.

GUERRANAKAJJ JANIW UTJ-JJANITI. “[Jehová Diosajj] aka oraq tukuskamaw nuwasiñ tʼakurayi; arconak jiskʼa jiskʼa pʼakinoqe, lansanak tʼunari, nuwasiñ carronaksa ninampiw phichhantaraki” (Salmo 46:8, 9).

JANIW USUNAKASA, TʼAQESIÑASA, JIWAÑAS UTJ-JJANITI. “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (Apocalipsis 21:3, 4).

TAQENITAKIW WALJA MANQʼAÑANAKAJJ UTJANI. “Trigojj yapunakan jilarkir utjpan, qollu patanakansti jilantarakpan” (Salmo 72:16).

CRISTON REINOPAJJ CHEQAPAR APNAQERI MÄ SUMA GOBIERNÖNIWA. “[Jesucristoruw] munañanïñasa, jachʼa kankañasa, reinosa churatarakïna, taqe markankiri jaqenaka, kunayman casta parlani jaqenakarakiw juparojj servipjjäna. Chʼamapajj pachpakïskaniwa, reinopasa janirakiw tʼunjatäkaniti” (Daniel 7:14).

Uka promesanakajj phoqasipuniniwa sasin ¿kunatsa sissna? Jesusajj aka oraqenkkäna ukhajja, mä reyjam apnaqañatakejj suma wakichtʼatätapwa uñachtʼayäna. Jupajj usutanakaruw qolläna, pobrenakaruw manqʼa churäna, jiwatanakarus jaktayarakïnwa. Jukʼampisa, kunjamatsa jaqenakajj sumankañana, mayachtʼata wiñayatak jakasipjjaspa ukwa yatichäna. Qhepa urunakan kunanakas pasani uksa qhanañcharakïnwa.

Jesusan arunakaparjamajja, kunayman jan walinakaw qhepa urunakan utjañapäna. ‘Akapachajj niya tukusiñampïskani ukhajja’, mä markajj yaqha marka contraw sartani, manqʼat pistʼañanakasa, usunakasa, jachʼa terremotonakas ukjan akjan utjani sasaw Jesusajj säna (Mateo 24:3, 7; Lucas 21:10, 11; Apocalipsis 6:3-8). Ukat akham sarakïnwa: “Jan wali luräwinakan jiljjattatap laykojja, niya taqe jaqenakan munasiñapaw thayarani” sasa (Mateo 24:12).

Kunjamtï 2 Timoteo 3:1-5 textojj siskejja, jaqenakan jan sinttʼasirïpjjatapajj qhanaw jichhürunakan uñjasi. Uka textorjamajja, “qhepa urunakanjja” jaqenakajj jupanak pachpa munasirinaka, qollqe añcha munirinaka, pachpa munañapak thaqerinaka, jachʼa jachʼa tukurinaka, qhorunaka, jan munasirinaka, awkiparus taykaparus jan istʼirinaka, Dios chuymäpkaspas ukham tukurinaka ukhamäpjjañapänwa.

Jan waltʼäwinakajj utjki ukanakajj qhepa urunakan jakataswa uñachtʼayistu. Diosan Reinopajj wali jakʼankatapwa uñachtʼayarakistu, uka tiemponjj taqeniw wali sum jakasjjañäni. Qhepa urunakat parlkasajja, Jesusajj akham sarakïnwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14).

Uka suma yatiyäwinakajja, jan wali jaqenakatakejj juchañchir arunakawa. Suma chuyman jaqenakarusti, “Diosajj niyaw promesanakap phoqani” sasin confiyañatakiw yanaptʼi. ¿Diosan promesanakapat jukʼamp yatiñ munasmati? Ukhamächi ukhajja, aka revistan qhep qhepa yatichäwip liytʼañamatakiw chʼamañchtʼapjjsma.