Llätunk tunka maranakaw Jehová Diosat jan armaskti

Edwin Ridgwell sat jilatan arsutaparjama

NAYRÏR Jachʼa Chʼaxwäwi jan utjxañapataki 1918 maran noviembre phaxsit 11 uru saraqatar mä qillqat firmtʼapxäna, uk fiestachañatakix escuelajankir taqi wawanakaruw ukürux tantachapxitäna. Nayax phisqa maranikiskayätwa, ukat kuntï pasaskäna uk janiw sum amuykayätti. Ukampis ak sum yatiyätxa, janipuniw jupanakamp uk fiestachkiriskayätti, awk taykajaw kuntï uka tuqit Diosax amuyki uk yatichapxitäna. Diosan yanapap maytʼasta, ukat chuym chʼallxtayasisin jachaskchiyätsa, janiw jupanakamp fiestachkayätti. Ukhamawa, phisqa maranikïkasasa Inuqir Diosajatxa janiw armaskayätti (Ecl. 12:1).

Escocia markan Glasgow sat jakʼaru qamasir sarxapjataxatxa mä qhawqha phaxsikiskänwa. Ukürunakarakiw awkijax “Jichhürunakan jakapki ukanakatxa millón millón jaqinakaw jan jiwapkaniti” sat arstʼäwi istʼir saräna. Uka arstʼäwin istʼkäna ukax chuymaparupuniw purtʼäna. Awk taykajax Bibliat yatiqañ qalltawayapxäna ukat Diosan Apnaqäwipax kuna bendicionanaksa apanïni uka tuqinakatwa wal parltʼasipxirïna. ¡Diosar munasiña ukat Jupar atinisiñ nayar yatichapxatapat walpun kusistxa! (Pro. 22:6.)

Diosatakiw sapüru irnaqtʼañ qalltta

15 maranïkasax jachʼa yatiqañ utar sarañatak wakichatäkchiyätsa, Diosatakiw sapüru irnaqtʼañ munayäta. Ukampis tatajaxa, uk lurañatakix wawasktaw sitänwa, ukatwa mä oficinan irnaqañ qalltawayta. Ukhamarus Diosatak sapüru irnaqtʼañ munaskakïyätwa, ukatwa mä urux J. F. Rutherford sat jilataruw kuntï lurañ munkayäta uk qhanañchtʼañataki ukat kunsa uka amtajat sitani uk yatiñatak mä carta qillqta, jupax Uraqpachan yatiyasiñapatakiw pʼiqtʼaskäna. Jupax akham sanituwa: “Irnaqañatakitï jan wawakstaxa, Diosaru sapüru luqtañatakix janirakiw wawäktati [...]. Diosat jan jithiqtas luqtaskakiñatak chʼamachasim ukat Jupax bendiciskarakïtamwa” sasa. 1928 maran marzo phaxsit 10 urunak saraqataruw ukham qillqtʼanitäna, uka cartax familiajarux chuym chʼallxtayäna. Ukat mä jukʼa tiemporux awk taykajasa jilïr kullakajasa nayasa sapüruw Diosar luqtxapxayäta.

Londres markanxa, 1931 maran mä jachʼa tantachäwin Rutherford jilatax anqäx markanakan suma yatiyäwinak yatiyirinakaw munasi, sasaw säna. Uk istʼasaxa, nayaw sariristxa sasaw jupan ukar sarta, ukat Kaunas sat markaruw Andrew Jack sat jilatamp khithapxitu, uka markax uka tiempon Lituania markan capitalapänwa. Nayax 18 maranïxayätwa.

Anqäx markanakanwa Diosan Apnaqäwipat yatiyta

Uka tiemponxa, Lituania markankirinakax yapumpi uywampikiw pisin jakasipxirïna. Pata pampanakan yatiyañax chʼamakïnwa, kunattix janiw kawkhar qurpachasiñas utjkänti. Kawkhantï qurpachasipxirïktxa uk janipuniw armaskäti. Mä arumax janiw ikïrjamapkayätti ukatwa sartxapxakta. Ukat aceitempi nakhir micha  naktayasipxta ukhaxa, chinche sat laqunakakiw ikiñar qʼal aqantxatayna. Kayut pʼiqikamaw qʼal achurapxitütu. Semanpachaw sapa alwa uka jakʼan utjkäna uka jawiran chʼuchʼu umanakapar chhaqantirïta, ukhamatcha jan usxitani sasa. Ukhampachasa, Diosan Arupat yatiyasipkakiyätwa. Ukat mä jukʼa tiemporux mä wayn tawaq jaqichasitanakaruw uñtʼapxta, jupanakasti chiqa yatichäwinakarux iyawsapxänwa, ukat utapanwa qurpachtʼapxitu. Uka lugarax janis jachʼakchïnsa ukat pampansa ikipchiyätxa, wali qʼumänwa janirakiw kuna laqʼus utjkänti, ukhaman iktʼañax nänakatakix wali sumänwa.

Uka maranakanxa, Lituania markax Iglesia Católica ukat Iglesia Ortodoxa Rusa ukanakamp apnaqatänwa. Qamirinakakiw mä Biblia alasipxirïna. Taqinir yatiyiña ukat Bibliat apstʼat qillqatanak jaytañwa amtapxayäta. Mä markar purisax qurpachasiñwa nayraqat thaqhapxirïta. Ukat wali amuyumpiw uka marka anqäxanakan yatiyañ qalltapxirïta. Tukuyañatakisti jankʼakirakiw uka markan yatiyapxirïta. Ukhamatwa, janïra yupaychäwi pʼiqtʼirinakamp jan waltʼayatäkasin yatiyañ tukuyxapxirïta.

Diosan Arupat yatiyasiñapatakiw yanaptʼäna

1934 maranxa, Kaunas markankir sucursalaruw Andrew sat jilatarux khitxapxäna ukat yaqha yanaptʼirirak khitanipxitäna, jupax John Sempey satänwa. Jupamp irnaqtʼasax jan armkay experiencianakwa pasapxitäna. Mä uruxa, mä abogadon oficinaparuw yatiyir mantayäta. Jupax walpun colertʼasïna ukat mä cajonat pistola apsusisaxa, aka oficinajat mäki mistum sasaw sitäna. Chuymajan Diosat maytʼasta ukat Biblian aka iwxtʼapat amtasta: “Suma arumpi kuttʼayañaxa colerañxa apaqiwa” (Pro. 15:1). Ukatwa akham sista: “Janiw jumamp chʼaxwir jutkti, jan ukasti suma yatiyäwinak yatiyiriw jutta, pacienstʼasisma ukax walipunïspawa” sasa. Uk istʼasax janiw pistolap limtʼxänti, nayasti kʼachat kʼachat punkur jitsxayäta.

John jilatampi jikisxayäta ukhaxa, nayax mä experiencianirakïtwa sasaw situ. Mä warmin jila valoran billetep lunthatatapat kʼarintapxatayna, ukatwa policiar apapxatayna. Policianxa uka billet jikxatañatakix isip qʼal apsusiyapxatayna, ukampis janiw kuns jikxatapkataynati, kunattix jupax janiw lunthatakänti. Qhipatwa lunthatar katxapxatayna.

Ukanak yatiyasax uka markankirinakax wal muspharapxäna, kunattix janiw uka markan ukhamanakax pasirikänti, ukampis Diosan Arupat jukʼampi yatiyasiskakiñapatakiw yanaptʼäna.

Jamasat irnaqtʼapxayäta

Letonia markanx Diosan Arupat yatiyañax jarktʼatänwa. Axsarañjamäkchïnsa, Bibliat apstʼat qillqatanak apañatakix phaxsin mä kutiw trenat arum viajapxirïta. Awisax uka qillqatanak jaytasax Estonia markakamaw puripxirïta, ukhamat jukʼamp qillqatanak aptaniñataki ukat kuttʼanisin Letonia markar jaytañataki.

Mä kutixa, aduanan irnaqtʼir mä jaqix trenat saraqapxam ukat uka qillqatanak pʼiqtʼirijar uñachtʼayanipxam sasaw sapxitu, kuntï nänakax lurapkayät ukwa jupar yatiyapxatayna. Johnampi nayampix Jehová Diosaruw yanaptʼapxitaya sasin mayisipxta. Ukampis uka chachax  janiw kuna qillqatanaktï apasipkayäta ukxa pʼiqtʼiripar siskänti, jan ukasti akham sakïnwa: “Aka chachanakax may qhanañchtʼañ munapxtam” sasa. Ukxarusti nayax akham sasaw qhanañchtʼta: ‘Aka libronakax kunatsa jan waltʼäwinakax utji uk sum amuyapxañapatakiwa, escuelanakana ukat jachʼa yatiqañ utanakan yatiqirinakaruw yanaptʼani’ sasa. Uk istʼasax khithanukxapxakituwa, ukhamat jilat kullakanakarus Bibliat apstʼat qillqatanak churapxta.

Estonia, Letonia ukat Lituania markanakanxa jukʼamp chʼaxwäwinak utjxatap laykusti nänakarux sapürutjamaw uñisxapxitäna. Ukat qhiparux Lituania markansa Diosan Arupat yatiyañax jarktʼatäxarakïnwa. Andrew ukat John jilatampix uka markat jaqsutaw uñjasipxäna, ukat Payïr Jachʼa Chʼaxwäwi niya qalltirjamïpanxa, wali llaktʼataw uka markat sarxarakiyäta Inglaterra markankir jaqinakamp chika.

Irlanda del Norte markanxa walja aski bendicionanakwa jikxatta

1937 maranxa, awk taykajampiw jikisipxta, uka maranakanxa Irlanda del Norte sat markanwa jakxapxäna. Ukanxa, Bibliat apstʼat qillqatanakas jarktʼatäxarakïnwa, kunattix jaqinakax chʼaxwäwimp mayjtʼatäpxänwa. Ukhamansa, Diosan Arupat yatiyasipkakïyätwa. Payïr Jachʼa Chaxwäwi tukusxäna ukhaxa, janiw kuna kamachinakas yatiyäw jarkʼañatakix utjxänti. Ukat Harold King sat wali yatxattʼat precursor jilataw callen arstʼäwinak arstʼasiñapatak wakichtʼañ qalltäna, qhipatxa China markanwa misionerjam irnaqxäna. Jupax akham sasaw yatiyäna: “Aka sabadoxa nayaw arstʼä.” Ukat nayar uñtanisasti sarakitänwa: “Alay sabadosti jumarakiw arstʼäta” sasa. Uka istʼasax walpun sustjasiyäta.

Janipuniw nayrïr arstʼäwijat armaskäti. Patak patakanakaw istʼir jutapxäna. Mä caja patxar saytʼasisinxa jan parlantimpikiw arstʼañ qalltta. Uka arstʼäwi tukuyatajarux mä chachaw jakʼachasinitu Bill Smith satätwa sasaw arunttʼitu. Jaqinakar uñjasaw kunas paspacha sasin jakʼachasinta, sasaw situ. Jukʼamp nayrax tatajaw jupampi  parltʼatayna, ukampis awkijampi warmipampix Dublín sat chiqaru precursorjam irnaqtʼañataki sarxapxäna ukhaxa, Jehová Diosan Qhanañchirinakapampix janiw jikisxataynati. Ukhamax Bibliat yatichañ qalltapxta ukat tiempompix familiapatxa llätunkaniw Diosar luqtxapxäna.

Qhipatxa Belfast marka thiyaruw Diosan Arupat yatiyir sarxta, kawkhantï qamirinakax jakapki ukharu. Ukanwa Rusia markankir mä mamar uñtʼta, nayrax Lituania markanwa qamasitayna. Ukat Bibliat apstʼat qillqatanak uñachtʼayt ukhaxa, akham situwa: “Uka librox utjituwa. Kaunas sat markan jachʼa yatiqañ utan yatichir tiojaw churito” sasa. Ukatwa polaco arut qillqtʼat La Creación sat libro uñachtʼayitu. Uka librox qʼala qillqsutänwa. Nayaw tiomarux Kaunas markan uka librxa churayätxa sist ukhaxa, uka mamax wal muspharäna (Ecl. 11:1).

Irlanda del Norte markar purisaxa, Nellie sat sullka kullakajaruw tumptʼarapitäta, Bibliat yatiqañjamak muni sasaw John Sempey sat jilatax sitäna. Ukatwa juparux Connie sat kullakajampi Bibliat yatichañ qalltapxayäta. Jupax jankʼakiw Diosatakjam nayrar sartasin bautisasxäna. Tiempompix uñtʼasisinxa casarasxapxayätwa.

Chacha warmjamax phisqa tunka suxtan maranakaw Jehová Diosar luqtawayapxta. Ukat patakat sipansa jila jaqinakaruw Biblian chiqa yatichäwinakap uñtʼapxañapatak yanaptʼawayapxta. Panpachaniw Armagedonat qhispisin machaq uraqir mantañäni sasaw sapxayäta, ukampis 1998 maranwa warmijax jiwawayxi. Nätakix sinti llakkañapunïnwa, taqi yantʼanakat sipansa jukʼampïnwa.

Estonia, Letonia ukat Lituania markanakaruw kutʼta

Warmijan mä mara jiwxatapatsti mä suma muspharkañ bendicionwa katuqawayta: Tallin (Estonia) markankir sucursalaruw jawstʼapxitu. Kawkïr qillqatti apayanipkitänxa mä chiqan akham sänwa: “1920 maranakat 1930 maranakkamaxa Estonia, Letonia ukat Lutuania markanakar Bibliat yatiyapxañapatak tunka jilatanakax khitatäpkän ukanakatxa jumakiw jakxtaxa” sasa. Uka markanakanxa kunjamsa Bibliat yatiyasitayna uk qillqtʼasipkäna, ukatwa yanaptʼapxitasmati sasin qillqanipxitütu.

Uka maranakanxa kunsa nayamp chik irnaqtʼirinakampix lurapxiriyäta uk qhanañchtʼañax nätakix wali askipunïnwa. Letonia markar purt ukhaxa, nayra sucursalax kawkïr cuartonakänsa ukat kawkharus Bibliat apstʼat qillqatanak imantapxirïta ukwa jilatanakarux uñachtʼaytxa, uka chiqxa janipuniw policiax katjawaykänti. Lituania markanxa, Šiauliai sat markaruw irpapxitu, kawkhantï precursorjam irnaqtʼkayäta ukharu. Ukanwa mä jilatax akham situ: “Khuri nayra maranakanxa, mamajampix mä utwa markan alapxta. Kunapachatï mirqʼi yänak imaski uka cuarto pichsupxt ukhaxa El Plan Divino de las Edades ukat El Arpa de Dios sat libronak jikxatapxta. Uka libronak liytʼasaw chiqa yatichäwinakätap amuyasta. Jumapuniw uka libronak uka utar jaytawaypachätaxa” sasa.

Ukhamaraki kawkïr markantï precursorjam irnaqtʼkayät uka markanwa pä uru jachʼa tantachäwir sararakta. Uka markanxa, nayrïr jachʼa tantachäwinxa 35 istʼirinakakiw utjäna. Ukampis jichhax 1500 jila istʼirinakaw utjxäna. ¡Jehová Diosaw ukham jilxattañapatak bendicïna!

Jehová Diosax janipuniw jaytjkitänti

Jichhakiw 2006 maran noviembre phaxsin Bee sat mä suma kullakampi jaqichasta, ukham suma bendicion katuqañxa janipuniw suykayätti.

Kawkïr wayn tawaqutï jakäwijan kuns lurä sasin lupʼiskchi ukarux Diosan amuytʼayat aka iwxtʼar istʼañapaw wali askïspaxa: “Waynäkasina [tawaqükasina], jumar irnuqir Diosamat amtasim”. Kunjamtix salmonak qillqirix jikxataskän ukhamarakiw nayax jikxatasta, jupax akham sänwa: “Diosaxay, wayna kankañaxatpach yatichasista, nayasti jichhürkamaw muspharkañ luratanakamat yatiyaskta. Diosaxay, chʼama qarit pachan uñjaskasasa, janqʼu ñikʼutan pachankkasasa, janikiy jaytanuktʼasistati, jutir mita jaqinakar[usa] [‘jichhak yuripkani ukanakarusa’, NM] chʼamamat yatiyañaxaw waktʼaskitu” sasa (Sal. 71:17, 18).

[25 janankir mapa]

(Sumpach amuytʼañatakix qillqatn mistki uk uñxatañamawa)

Axsarañjamäkchïnsa Letoniarux Bibliat apstʼat qillqatanakxa apapxayätwa

ESTONIA

TALLIN

Golfo de Riga

LETONIA

RIGA

LITUANIA

VILNA

Kaunas

[26 janan fotopa]

15 maraniw Escocia markan precursorjam irnaqtʼañ qalltayäta

[26 janan fotopa]

Nelliemp jaqichasipkayät uküru (1942)