Yanaptʼasiñaw yupaychäwisan nayrar sartañ yanapistu

FAMILIAPAN Diosar yupaychäwin nayrar sartañap munapki ukanakatakixa, yanaptʼasiñaw wali wakiskirixa. Kunapachatï Jehová Diosax chacha warmir lurkatayna ukhaxa, kunja wakiskiris yanaptʼasiñax ukwa qhanañchäna: Evax Adanan ‘yanapiripäñapänwa’, ukhamasti chacha warjam qamasiñansti yanaptʼasiñax utjañapapunïnwa (Gén. 2:18; Ecl. 4:9-12). Awk taykasa wawanakasa Jehová Diosat mä luräwi katuqapxi, uk phuqañatakix yanaptʼasirïpxañapawa.

Familpacha Diosar yupaychaña

Barri ukat Heidi sat chacha warmix phisqa wawanïpxiwa, familpacha Bibliat jan jaytas yatxatañatakis nayrar sartañatakis yanaptʼasiñaw wali askixa sasaw sapxi. Barrixa akham sasaw qhanañchtʼi: “Awisax Familian yatxatañatakiw wawanakarux Bibliat apstʼat qillqatanakat mä jukʼa yatxatapxañapatak maytxa ¡Despertad! sat revistan yatichäwinakapatsa arstʼapxarakiwa. Ukat yatiyir sarasin kunsa jaqinakampi parltʼapxirïsta uks yatsupxaraktwa, ukhamat sapa maynix yatiyañataki wakichtʼatäpxañapataki” sasa. Heidix akham sarakiwa: “Diosar yupaychäwinja kunanaksa lurañ amtapxta ukwa sapa maynix qillqtʼasipxta, familpach Bibliat yatxatkasaw ukanak phuqasipkti janich uk amuytʼaptxa” sasa. Ukatxa, jupanakax semanan mä qhawqha arumanakax janiw televisión naktayapxirïkänti, ukaw familpachar liytʼañatak yanaptʼäna.

Taman tantachäwinakapa

Mike ukat Denise sat chacha warmixa, pusi wawaruw uywsuwayapxi. Yanaptʼasiñaxa, ¿kunjamsa familiapar yanaptʼpachäna? Mike jilatax akham siwa: “Awisax tantachäwinakar horasapar puriñatakix suma amtanakas utjchïnxa, inamayakïnwa, ukampis taqini yanaptʼasisax horasapar puriñjamänwa” sasa. Denisex akham qhanañchtʼaraki: “Wawanakajax jiskʼapkäna ukhax sapa mayniw mä lurañanïnxa. Kim sat phuchajaxa, manqʼa phaytʼaña ukat manqʼañatak mesa wakichtʼañ yanaptʼirïna” sasa. Michael sat yuqapaxa akham sasaw amtasiraki: “Martes arumanakax taman mä tantachäwipaw utajan apasirïna. Ukatwa sum wakichtʼapxirïta, qʼumachtʼapxirïta ukat sillanaksa yäpar usktʼapxirïta” sasa. Ukat Matthew sat maynïr yuqapax akham sarakiwa: “Tantachäwi utjkäna uka arumax papitujax jankʼakiw irnaqäwipat puriniri nänakar wakichtʼañataki”. Ukham luratapatxa, ¿kuna askinakas utjawayi?

Chʼamachasiñax wali askipuniwa

Mike jilatax akham siwa: “Denisempix 1987 maranwa precursorjam irnaqtʼañ qalltawayaptxa. Wawanakajatxa, kimsaniw uka maran nänakamp chikäsipkäna. Jupanakatxa paniniw precursorjam irnaqtʼañ qalltapxarakïna, ukat paninisti Betelanwa mä qhawqha utanak lurañ yanaptʼapxarakïna. Ukat familiajaxa pusi tunkaniruw Diosar katuyasipxañapataki ukat bautisasipxañapatak yanaptʼawayi, ukham lurasax wali kusisitaw jikxatasipxta. Ukat anqäx markansa Diosar yupaychasiñapatak utanak lurañsa taqinirakiw yanaptʼapxta, ukax nänakatakix wali askipuniwa” sasa.

Chiqpachansa, yanaptʼasiñatak chʼamachasiñax wali askipuniwa. ¿Kunanakansa familiaman yanaptʼasipxasma? Ukhamasti, yanaptʼasiñaw familiamaru Diosar yupaychäwin nayrar sartañ yanaptʼani.

[28 janan fotopa]

Yatiyañatak yatsuñax jaqinakar sum yatiyañatakiw yanapistu