NAYRÏR Jachʼa Chʼajjwäwejj 1914 maran qalltkän ukhaw jaqenakajj Bibliat Yatjjatirinakan guerran jan nuwasirïpjjatap amuyapjjäna (Isa. 2:2-4; Juan 18:36; Efe. 6:12). ¿Gran Bretañankir jilatanakajj kuns lurapjjäna?

Cuartelar sarañataki leyejj akham sasaw 1916 maran apsusïna: solteronakajj mun jan munaw 18 maranit 40 marankamajj nuwasiñatak sarapjjañapa sasa. Nayrajj janipuniw ukham leyejj Gran Bretaña markan apsuskänti. Uka leyirjamajja, concienciap layku jan sarañ munirinakarojj janiw khitaskänti. Ukampis khitinakas jan sarapkaspa ukat kuns lurapjjaspa uk amtapjjañapatakejj marka apnaqerejj tribunalanakwa uttʼayäna.

Mä qhawqha tiemponakwa niya 40 jilatanakarojj cuartelankir carcelar jistʼantapjjäna ukat 8 jilatarojj Francia markaruw nuwasipjjañapatak khitapjjäna. Ukham lurapjjatapatjja, Gran Bretañankir jilat kullakanakajj Herbert Asquith sat nayrïr ministroruw mä carta 5.500 firmanakani apayapjjäna.

Franciar khitat 8 jilatanakarojja, jan nuwasiñ munapjjatapat jiwayatäpjjaniwa sasaw mä yatiyäwi katoqapjjäna. Ukampisa, janïr jiwayatäpkipanjja, tunka maranak wal irnaqayañatakiw Inglaterrar kuttʼayapjjäna ukat carcelaruw jistʼantapjjäna.

Guerra utjaskakipanjja, casado chachanakaruw nuwasir sarapjjañapatak jawsasïna. Manchester (Inglaterra) markanjja, Henry Hudson jilataruw juchañchasipkäna, jupajj Bibliat Yatjjatirïnwa ukat doctorarakïnwa. Ukat agosto 3, 1916 maranwa juchañchapjjäna, multa apsupjjäna ukat ejercitor katuyapjjäna. Edimburgo (Escocia) markanjja, ukham juiciorakiw apasiskäna. Ukampis James Frederick Scott, 25 maranakani colportor (precursor) jilatajj janiw juchañchatäkänti. Ukat gobiernojj wasitat juchañchañatakiw mayïna, ukat ukarukiw jaytjjäna. Uka lantejj Londres markan Herbert Kipps jilatar juchañchañatak juicio apasiskäna ukarukiw yanaptʼjjäna. Uka jilatajj juchañchata, multa apsuta ukat ejercitor katuyatänwa. Ukat ukarjamaw mayninakar juchañchasïna.

Septiembre 1916 maranjja, 264 jilatanakaw jan nuwasir sarañatakejj mayipjjäna. Jupanakatjja, 5 jilatarukiw iyawsapjjäna, 154 jilatanakarojj markataki wali chʼama trabajonak lurapjjañapatakiw khitapjjäna, 23 jilatanakarojj cuartelaruw khitapjjäna, ukampis janiw nuwasir sarapjjañapäkänti, 82 jilatanakajj ejercitor katuyatäpjjänwa ukat yaqhepajj jan istʼasipjjatapat guerran nuwasir soldadonakan cortepanwa uñjasipjjäna. Kunjamsa jupanakar tʼaqhesiyapjjäna uk uñjasajj jaqenakajj jan walit uk uñjapjjäna. Ukatwa gobiernojj munkir jan munkir irnaqapjjañapatak cuartelankir carcelar apayjjäna.

 Edgar Clay ukat Pryce Hughes jilatanakajj Gales markankir mä represan irnaqapjjäna. Qhepatjja Pryce jilatajj Gran Bretaña markankir sucursal sarayirëjjänwa. Herbert Senior jilatarojj Wakefield (Yorkshire, Inglaterra) carcelaruw apjjapjjäna, jupajj Francia markat kuttʼanir 8 jilatanakat maynïrïnwa. Yaqhepajj Dartmoor (Devon, Inglaterra) carcelanwa qhawqha maranakatakitï juchañchatäpkäna uk wali tʼaqhesiyata ukat munkir jan munkir irnaqayat phoqhapjjäna. Ukaruw cuartelar jan sarañ munirinakarojj jilapart jistʼantasïna.

Bibliat Yatjjatiri Frank Platt jilatajj cuartelar sarkchïnsa, janiw nuwasir sarkänti. Ukat nuwasiñatak khitapkän ukhajja, nuwasiñ jan munatapat sapa kutiw tʼaqhesiyapjjäna. Atkinson Padgett jilatajj cuartelar mantatap qhepatwa Bibliat yateqatayna, juparojj ukhamarakiw nuwasir jan sarañ munatapat wal tʼaqhesiyapjjäna.

Uka tiemponjja, jilatanakajj kunatpunsa jan nuwasipki uk janis sum amuyapkchïnjja, Jehová Diosar kusisiyañatakiw chʼamachasipjjäna. Akan sutit aytaski uka jilatanakajja, ‘yantʼanakan’ Diosat jan jitheqtasa sarnaqawayapki ukajj yateqaskayapuniwa (Apo. 3:10). (Gran Bretaña markat qellqanita.)