1, 2. ¿Kunsa Diosan Reinopajj lurani, ukat kunatsa Diosan Reinopajj jutapuniniwa sasin confiysna?

PANQARANAKAJJ 31 jichha pacha maran wal panqartʼaskäna, ukhaw Jesusajj Capernaum marka jakʼan utjkäna uka qollun akham sasin arkirinakapar mayisiñ yatichäna: ‘Reinomajj jutpan’ (Mat. 6:10, NM). Jichhürunakanjja, waljaniw Diosan Reinopan jutañapat pächasipjje. Ukampis Reinomajj jutpan sasin mayktan uk Diosajj istʼistaniwa sasaw confiytanjja.

² Jehová Diosajj uka Reinop toqew alajjpachankiri ukat aka Oraqenkiri familiapar mayachtʼani, uka amtapajj phoqasipuniniwa (Isa. 55:10, 11). Cheqansa, ¡jichhürunakan Jehová Diosajj Reyïskakiwa! Kunanakatï aka qhepa 100 maranakan pasawayki ukajj ukwa uñachtʼayi. Millón millón jaqenakajj jupamp apnaqatäpkani ukat jan jitheqtapkani ukanakatakejj walja askinakwa Diosajj luraski (Zac. 14:9; Apo. 15:3). Ukhamäkchisa, Jehová Diosajj Reyir tukutapampi ukat Reinomajj jutpan sasin mayiñ Jesusajj yatichawaykistu ukampejj janiw kikpäkiti. ¿Kunansa ukanakajj mayj mayjajja? ¿Kunjamsa yanaptʼistaspa?

3. 1) ¿Kunapachasa ukat kawkinsa Jesusajj Reyjam uttʼayatäna? 2) ¿Kunjamatsa Jesusajj 1914 maran apnaqañ qalltatap yattanjja? (Qhanañchäwi uñjjattʼäta.)

³ Khä 1800 maranak tukuyarojj kuntï Daniel profetajj 2500 nayra  maran mä profecía arsuwaykän ukaw qhanstäna. Uka profeciajj akham siwa: “Uka reyinakan apnaqañapkamasti, alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti” (Dan. 2:44). Bibliat Yatjjatirinakajja, walja maranakaw 1914 marajj wali wakiskir maräniwa sasin sapjjäna. Uka tiempon jakir walja jaqenakajj uka mara wali askit suyapjjäna. Mä qellqerejj akham siwa: “Kuna askinakatï 1914 maran pasañapäkäna uk wal suyapjjäna” sasa. Ukampis uka pachpa maran Nayrïri Jachʼa Chʼajjwäwejj qalltaskäna ukhaw Biblian uka profeciapajj phoqasïna. Qhepatsti machʼanaka, oraq khatatinaka, usunakaw utjäna. Ukat Biblian utjki uka yaqha profecianakan phoqasitapasa, Jesucristojj 1914 maran Diosan Reinopan Reyjam alajjpachan apnaqañ qalltatapwa uñachtʼayi. * Ukat Jehová Diosajj Yoqapar apnaqañapatak uttʼayasajja, yaqha toqet Reyjamätap uñachtʼayäna.

4. Jesusajj Reyjam uttʼayatäsajja, ¿kunsa jankʼak luräna, ukat ukjjarojj kunsa lurarakïna?

⁴ Diosan uttʼayat machaq Reyjamajja, Awkip contra saytʼasiri Supayampiw nayraqat nuwasïna. Ukat Jesusasa ukat angelanakapasa Supayampiru ukat sajjranakampiruw alajjpachat aka Oraqer jaqoqanipjjäna. Uk lurasitapatjja, alajjpachan kusisiñaw utjäna, ukampis aka Oraqenjja kunanakatï nayrajj jan uñjasirïkäna uka jan walinakaw utj-jjäna (Apocalipsis 12:7-9, 12 liytʼañataki). Ukjjarusti uka Reyejj khitinakatï jupampi apnaqatäpki ukanakaruw qʼomachañataki, yatichañataki ukat Diosan munañap phoqapjjañapatak wakichäna. Jesusan uka lurataparu istʼapkäna ukajj kunjamsa jichhürunakan yanaptʼistu uk jichhajj uñjañäni.

5. ¿Kuna qʼomachäwis 1914 marat 1919 mara qalltakamajj utjäna?

⁵ Jesusajj Supayana ukat sajjranakana jan wali luräwinakap alajjpachan qʼomachasajja, aka Oraqenkir arkirinakaparu qʼomachiri ukat uñjiriw Jehová Diosajj Yoqapar khitanïna. Uka qʼomachäwi toqetjja Malaquías profetaw sum qhanañchäna (Mal. 3:1-3). Kunanakatï uñjasiwayki ukajja, 1914 marat 1919 mara qalltakama qʼomachasitapwa uñachtʼayi. * Jehová Diosan jachʼa familiap taypinkañatakejj qʼoma jan ukajj qollana ukhamäskakiñasawa (1 Ped. 1:15, 16). Kʼari religionatsa jan ukajj política toqetsa jitheqtañasawa.

6. ¿Kunjamsa Bibliat apstʼat qellqatajj churasi, ukat ukajj kunatsa wali askejja?

⁶ Jesusajj Reyjam uttʼayatäsajj ‘amuyasiri cheqapa uywatwa’, (MT) uttʼayäna. Uka uywataw khitinakatï ‘mä sapa tamankapki’ ukanakar ajay toqet manqʼa churañapäna, jupanakasti Jesusamp uñjatäpjjewa (Mat. 24:45-47; Juan 10:16). Khä 1919 maratwa uka amuyasiri cheqapa uywatajj Diosar yupaychañ toqet manqʼa katoqapki taqe ukanakaru, mä arunjja, ‘utankirinakar’, (MT) manqʼa churasipki. Bibliat apstʼat qellqatanakajj uka toqe churaski ukajja, Diosar jukʼamp confiyañatakiw yanaptʼistu. Ukatjja amuyusansa, sarnaqäwisansa, jañchi toqensa, Jehová Diosar yupaychañ toqensa qʼomäñ amtktan uk phoqañatakiw yanaptʼarakistu. Bibliat apstʼat uka qellqatanakajj yatichistuwa ukat aka Oraqpachan yatiyaski ukar yanaptʼañatak wakichtʼatäñatakis yanaptʼarakistuwa. ¿Ukanakat askinak apsusktanti?

7. ¿Kun lurañsa Jesusajj aka Oraqen qalltäna, ukat ukajj kunapachkamas lurasiñapäna?

⁷ Jesusajj aka Oraqen yatiyañ qalltkäna ukhajja, akham sänwa: “Wakisirakiw nayanjja Diosan reinopat yaqha markanakaru yatiyir sarañajjajja, ukataki khitanitarakïtwa” (Luc. 4:43). Jesusatakejj yatiyañaw jakäwipan wali wakiskirïnjja, ukwa kimsa mara chikani yatiyasajj  uñachtʼayäna. Akham sasaw arkirinakapar yatichäna: “Sarkasinsti yatiyapjjarakim, Diosan reinopajj jakʼankatapata” sasa (Mat. 10:7). Jiwatat jaktjjäna uka qhepatjja, arkirinakajajj “taqe aka oraqpachana” yatiyapjjani sasaw Jesusajj arsuwayäna (Hech. 1:8). Ukat akapachan tukusiñapkamaw yanaptʼasipkäma sasaw jupajj sarakistu (Mat. 28:19, 20).

8. ¿Kunjamsa Reyejj jupamp aka Oraqen apnaqatäpki ukanakar yatiyir sarapjjañapatak chʼamañchtʼäna?

⁸ Khä 1919 maranjja, ‘Diosan Reinopat suma yatiyäwejj’ kamsañs muni ukajj mayjat amuyasjjäna (Mat. 24:14). Jesusajj alajjpachanwa apnaqjjäna ukat jupamp apnaqatäpkani ukanakat mä jukʼaniruw aka Oraqen qʼomachas tantachthapïna. Jupanakasti jankʼakirakiw kuntï Jesusajj siskäna uka arunakar istʼapjjäna. Cheqas ¡Diosan Reinopajj alajjpachan apnaqjjewa sasaw aka Oraqpachan uka suma yatiyäwinak yatiyapjjañapäna! (Hech. 10:42.) Amuytʼañataki, 1922 maran septiembre phajjsin walja markanakat jachʼa tantachäwejj Cedar Point (Ohio, Estados Unidos) markan apaskäna ukarojj Diosan Reinopar niya 20.000 yanapirinakaw tantachasipjjäna. Ukat Rutherford jilatajj “Diosan Reinopa” sat pʼeqeñchat arstʼäwipan akham sänwa: “Reyejj apnaqjjewa, jumanakaw yatiyiripäpjjtajja. Ukhamasti, Reyita ukat Apnaqäwipat yatiyapjjam, yatiyapjjam, yatiyasipkakim” sasa. Uka arunak istʼasajj ¡kunja kusisitak tantachasirinakajj jikjjatasipkäna! Uka arunakar istʼasajja, ukan tantachasirinakat 2.000 ukhaniw yatiyirejj mistupjjäna, ukat kawkhantï tantachasipkäna uka cheqat 72 jila kilometronak yatiyir sarapjjäna. Ukat mä jilatajj akham sänwa: “Diosan Reinopat yatiyir sarapjjam siskäna uksa ukat tantachasirinakan taqe chuyma istʼapjjatapsa janipuniw armkäti”. Ukat yaqhanakasti ukhamarak sapjjäna.

9, 10. 1) Diosan Reinopat yatiyirinakaru wakichtʼañatakejja, ¿kunanakas uttʼayasiwayi? 2) ¿Kunjamsa uka wakichäwinakajj jumar yanaptʼawaytamjja?

⁹ Khä 1922 maratakejja, Oraqpachan 58 markanakan Diosan Reinopat yatiyirinakajj 17.000 jilaw utj-jjäna. Ukampis janiw wakichtʼatäpkänti. Nayra patak maranakan Jesusajj arkirinakapar kuna toqetsa, kunjamsa ukat kawkinsa yatiyapjjañapa ukwa jutïr Reyjamajj yatichäna (Mat. 10:5-7; Luc. 9:1-6; 10:1-11). Jichhürunakanjja, Jesusajj ukhamarakwa Diosan Reinopat taqe yatiyirinakarojj wakichtʼi ukat kunanakampitï yatiyapjjañapäki uk churi, ukhamat sum yatiyapjjañapataki (2 Tim. 3:17). Cristiano tama toqew jupanakar yatiyir sarapjjañapatak wakichtʼi. Wakichki ukanakat mayajja, aka Oraqpachan 111.000 jila tamanakan Diosan Arunakap Yatiyañatak escuelajj apaski uka tantachäwiwa. Uka yatichäwitjja, paqallq millón jila yatiyirinakaw yatiyir sarañataki ukat yatichañataki suma wakichtʼatäpjje, ukhamat taqe kasta jaqenakar yanaptʼañataki (1 Corintios 9:20-23 liytʼañataki).

¹⁰ Ukhamarusa, irpir chuymaninakataki, precursoranakataki, soltero jilatanakataki, Cristiano matrimonionakataki, Sucursal Sarayirinakataki  ukat warminakapampitaki, tamanak tumptʼirinakataki ukat warminakapampitaki ukat misioneronakan Bibliat yatjjatapjjañapataki escuelanakaw uttʼayasiwayaraki. * Cristiano Matrimonionakan Bibliat Yatjjatapjjañapatak Escuelar saririnakajj akham sasaw yuspärapjje: “Kunanaktï uka escuelan yateqawayapkta ukajja, Jehová Diosar jukʼamp munasiñataki ukat mayninakar sum yanaptʼañatakiw wakichtʼapjjetu”.

11. Diosan Reinopata yatiyirinakajj yantʼatas uñjasiwayapkchejja, ¿kunatsa aguantapjje?

¹¹ Diosan Reinopat aka Oraqpachan yatiyañataki ukat yatichañataki chʼamachasktan uk Supayajj sumwa uñji. Jupajja Diosan Reinopat parlirinakarojj yatiyañ toqet jarktʼañatakejj amuykaña ukat jan amuykañ toqenakatwa yantʼi. Ukampis Supayan chʼamachasitapajj inamayakïniwa. Kunattejj Jehová Diosaw Yoqaparojj “taqe munañaninakjjaru [...], marka apnaqerinakjjaru, autoridadanakjjaru” uttʼayi (Efe. 1:20-22). Jesusajj Reyjamajja, arkirinakaparojj jarkʼaqewa ukat irparakiwa, ukhamat Awkipan munañap phoqasiñapataki. * Jupanakajj millón millón suma chuymani jaqenakaruw suma yatiyäwinaka ukat Jehová Diosar yupaychapjjañapatak yanaptʼasipki. Cheqas ¡uka luräwin yanaptʼañajj wali askiw jiwasatakejja!

12. Diosan Reinopajj uttʼayasiwayki ukhat aksarojj kunanakas mayjtʼayasiwayi uk qhanañchtʼam.

¹² Diosan Reinopajja, 1914 maran uttʼayasiwayki ukhatwa Diosan servirinakapajj kunjam wakichtʼatäpkänti Awkipan munañap phoqapjjañapatakejj uk jukʼamp sum waktʼayawayi (Isaías 60:17 liytʼañataki). Khä 1919 maranjja, sapa tamanwa yatiyañ toqet mä pʼeqtʼirejj uttʼayasïna. Ukat 1927 maranjja, sapa domingo urunak utat uta yatiyir sarañatakiw uttʼayasïna. 1931 maranjja, Diosan Reinopar yanapirinakapajj Jehová Diosan Qhanañchirinakapa sat sutwa katoqawayapjje, ukaw jukʼamp yatiyañatak chʼamañchtʼawayäna (Isa. 43:10-12, NM). Khä 1938 maranjja, taman pʼeqtʼañapataki mä jilatar uttʼayasiñapatak tamankirinakajj ajllipkäna ukajja, Biblian utjki uka mayitarjamaw ajllitäjjani sasaw sasïna. Ukat 1972 maranjja, tama uñjañapatakejj janiw mä irpir chuymaniruk uttʼayasjjänti, jan ukasti tamankir taqe irpir chuymaninakaw uttʼayatäjjäna. Ukat kawkïr jilatanakatï uk lurañatak wakichtʼatäpkäna ukanakarojja, Diosan ‘ovejanakapajj’ jupanakar katuyatapkäna ukanakar ‘sum awatipjjañapatakiw’ chʼamañchtʼasïna (1 Ped. 5:2). Ukat aka Oraqpachan Diosan Reinopajj yatiyaski uk uñjapjjañapatakejj sojjta uñjirinakaruw 1976 maran uttʼayasiwayi, jupanakajj Oraqpachan Jilïr Irpirinak taypinkapjjewa. Ukhamajj Jehová Diosan uttʼayat Reyejj jukʼat jukʼatwa jupamp  apnaqatäpki ukanakarojj kunjamatï Dios nayraqatan wakiski ukhamarjam wakichawayi.

13. ¿Kunjamsa Cristojj 100 maranak Reyjam apnaqki ukajj yanaptʼtamjja?

¹³ Cristojj 100 maranak Reyjam apnaqkasajj kunanaksa lurawayi uk yatjjatañäni. Jehová Diosatakjam sarnaqapjjañapatakiw Diosan markapar qʼomachawayi. Diosan Reinopat 239 markanakan yatiyasiñapatakiw pʼeqtʼawayi ukat millón millón jaqenakaruw Diosar yupaychapjjañapatak yatichawayi. Jupampi apnaqatäpki uka paqallq millón jilaniruw mayachtʼawayi, jupanakajj taqe chuymaw Awkipan munañap lurasipki (Sal. 110:3, NM). Cheqansa, kuntï Jehová Diosajj Reinop toqejj luraski ukajj wali muspharkañapuniwa. Ukat jutïrinjja, ¡jukʼampinakwa lurani!

14. 1) ‘Reinomajj jutpan’ sasin oracionan mayktan ukhajja, ¿kunsa mayisktanjja? 2) ¿Kuna arunakas 2014 maratakejj Bibliat apstʼasiwayi, ukat kunatsa uka arunakajj wali askejja?

¹⁴ Jehová Diosajj 1914 maransa Yoqaparojj reyjam apnaqañapatak uttʼaykchïnjja, kuntï ‘Reinomajj jutpan’ sasin oracionan mayktan ukajj janiw ukan phoqatpach phoqasiwaykiti (Mat. 6:10, NM). Jesusajj jupan uñisirinakaparuw ‘atipjani’ sasaw Bibliajj qhanañchäna (Sal. 110:2). Supayan apnaqat akapachankir apnaqerinakajj Diosan Reinop contrakïsipkiwa. Kunapachatï Diosan Reinop jutpan sasin mayktan ukhajja, Jesucristojj Reyjam apnaqki ukat jupamp chika apnaqanipkani jupanakajj akapachankir apnaqerinakaru ukat Reinopar uñisirinakar tukjapjjañapatakiw mayisktanjja. Ukhaw kuntï Daniel 2:44 qellqatajj siski uka arunakajj phoqasini. Ukanjja Diosan Reinopajj “taqe yaqha reinonaka[ruw] tukjani” sasaw qhanañchi. Ukarakiw Reinop contra saytʼapki uka enemigonakapar tukjani (Apo. 6:1, 2; 13:1-18; 19:11-21). Ukan phoqasiñapajj wali jakʼankjjewa. Ukhamajj kunja askisa 2014 maratak Bibliat apstʼasiwayki uka arunakajja, ukan akham siwa: ‘Reinomajj jutpan’, ukasti Mateo 6:10, (NM) qellqatat apstʼatawa. Cheqansa, Jesucristojj Diosan Reinopan 100 maranakaw apnaqjje.

15, 16. 1) ¿Kuna muspharkañ luräwinakas Waranq Maranak Apnaqäwin utjani? 2) Jesusajj Reyjam apnaqkani ukhajja, ¿kunsa qhep qhepa lurani, ukat kunjamsa Jehová Diosan apnaqäwipajj phoqasini?

¹⁵ Apnaqer Cristojj Diosan enemigonakapar tʼunjkani uka qhepatjja, Supayaru ukat sajjranakaruw mikʼayar waranqa maranakatak jaqontani (Apo. 20:1-3). Ukat jan wali lurañanakar Supayajj apkistu uk chhaqtayasajja, Diosan Reinopajj kuna bendicionanaktï Criston jiwatapat utjki ukanak churistani ukat Adanajj juchar aptʼawaykistu uksa chhaqtayarakiniwa. Jesusajj jan jaktʼkaya millón millón jiwatanakaruw jaktayani ukat Oraqpachan jupanakar Jehová Diosjjat yatichañatakejj kunatï wakiski uks waktʼayarakiniwa (Apo. 20:12, 13). Ukat Edén jardinajj kunjamäkäntï ukhamwa aka Oraqpach mä Paraisor tukuyani. Ukat Jehová Diosar jan jitheqtas yupaychapki ukanakas jan juchaniruw tukupjjarakini.

¹⁶ Criston Waranq Maranaka Apnaqäwipa tukuyarojja, Diosajj kuna amtanïkäntï aka Oraqetakejja ukajj phoqasiniwa. Ukatsti, Jesusajj Awkiparuw uka Reino katuyjjani (1 Corintios 15:24-28 liytʼañataki). Ukhajj janiw mayni taypi Jehová Diosar jakʼachasiñajj wakisjjaniti. Ukat Diosan alajjpachankir wawanakapasa ukat aka Oraqenkir wawanakapas alajjpachankir Awkip nayraqatan mä jachʼa familiarukiw tukupjjani.

17. ¿Diosan Reinopatak kun lurañsa amttanjja?

¹⁷ Diosan Reinopajj kunanaktï aka 100 maranakan lurawayki ukajja, Jehová Diosajj aka Oraqjjar munañanïskakitapwa uñachtʼayi ukat kuntï aka Oraqetak amtki uksa phoqapuniniwa. Ukhamajj Jupamp apnaqayasiskakiñäni ukat Reyitsa ukat Reinopatsa yatiyaskakiñäni. Cheqas ‘Reinomajj jutpan’ sasin mayktan uk Jehová Diosajj istʼistaniwa sasin confiyasipkakiñäni.