1, 2. 1) ¿Kuna jan walinsa Colosas markankir cristianonakajj uñjasipjjäna? 2) ¿Pablon kawkïr ewjjtʼapas Diosat jan jitheqtañatakejj colosankirinakarojj yanaptʼäna?

COLOSAS markankir nayra cristianonakajja, jan walinwa uñjasipjjäna. Yaqhep cristianonakajj Moisesan Leyinakap phoqañasawa sasaw sapjjäna, yaqhepasti kʼuchirtʼäwinakasa yaqha ukham luräwinakas janipunis walïkaspa ukhamwa amuyapjjarakïna, ukhamatwa tʼaqanoqtañajj utjäna. Ukatwa apóstol Pablojj uka kʼari yatichäwinakampi jan apayasipjjañapatakejj akham sas uka tamankirinakarojj ewjjtʼäna: “Wal amuyasipjjam, janiraki sallqjayasipjjamti khitinakatejj kʼari amuytʼanakapampi sallqjañ munapjjtam ukanakampejja. Jupanakasti janiw [Cristor] iyawsapkiti, jan ukasti jaqenakan sarnaqäwinakaparu, amtatanakaparukiw phoqhapjje kuna toqensa” sasa (Col. 2:8).

² ‘Jaqenakan sarnaqäwinakapampitï’ uka ajllit cristianonakajj apayasipjjaspäna ukhajja, kuntï Diosajj jupanakar qhespiyañataki lurkäna ukarojj jan walitsa uñjapkaspa ukhamäspänwa (Col. 2:20-23). Jehová Diosat jan jitheqtapjjañapatakejja, Pablojj akham sasaw ewjjtʼarakïna: “Alajjpach yänakat lupʼipjjam, jan akapach yänakatjja” sasa (Col. 3:2). Cheqansa, uka cristianonakajj kunatï ‘alajjpachan jupanakataki imatäkäna’  uka toqetwa lupʼipjjañapäna (Col. 1:4, 5).

3. 1) ¿Kunsa ajllita cristianonakajj lupʼipjje? 2) ¿Kunsa aka yatichäwin yatjjataskañäni?

³ Jichha tiempo ajllit cristianonakajja, ukhamarakiw alajjpachankir Diosan Reinopata ukat ‘Cristomp chika’ apnaqañata lupʼipjjaraki (Rom. 8:14-17). Ukampis ‘yaqha uwijanakarojja’, mä arunjja, khitinakatï aka Oraqen jakañ suyasipki ukanakarojja, ¿kunjamsa Pablon arunakapajj yanaptʼaspa? ¿Kunjamsa ‘alajjpachat lupʼipjjarakispa’? (Juan 10:16.) Abrahamampi Moisesampejja, jan walinakan uñjaskasasa, alajjpachatwa lupʼipjjerïna. ¿Kunsa jupanakat yateqassna?

4. ¿Kunjamsa yaqha uwijanakajj alajjpachat lupʼipjjaspa?

⁴ Yaqha uwijanakajj janis alajjpachar sarapkchinejja, ¿kunjamsa alajjpachat lupʼipjjaspa? Jehová Diosaru ukat Reinoparu jakäwinakapan nayraru uchasina (Luc. 10:25-27). Jesucristojj ukwa lurirïna, jiwasajj jupatwa yateqasiñasa (1 Ped. 2:21). Jichhürunakanjja, nayra tiempo cristianonakjamarakiw jan walinakan uñjastanjja. Supayan apnaqat aka pachanjja, kunayman kʼari yatichäwinakaw utji, jaqenakajj sinti qollqe chuymäpjjewa, jaqenakan amuyanakaparjamakiw sarnaqapjjaraki (2 Corintios 10:5 liytʼañataki). Ukampis jiwasajj Jesusat yateqasipjjañäni: janipuni uka jan wali amuyunakampejj apayasipjjañäti, ukhamatwa Jehová Diosampejj sum apasiskakiñäni.

5. ¿Kunjamatsa akapachan amuyunakapampi apayasiskatas amuyassna?

⁵ Akapachankir jaqenakjamati qollqerusa yänakarusa muntanjja? Ukajj lupʼitasana ukat luratanakasanwa qhan amuyasispa. Jesusajj sänwa: “Jumanakan chuymanakamasti kawkinkkitejj uka suma imasitanakamajj ukankarakiniwa” sasa (Mat. 6:21). Chuymasajj kawkirus apaskistu uk amuyasiñatakejja, sapakutiw kunjamäskis chuymasajj uk uñakipasiñasa, aka jisktʼanakaw ukatakejj yanaptʼistaspa: “¿Sintti qollqe toqet lupʼtjja? Trabajo jikjjatañatsa, negocio lurañatsa ukat akapachan sum jakasiñatsa ¿sintti llakistjja? Jan ukajj ¿Diosar serviñ nayrar uchañatakich chʼamachasisktjja?” sasa (Mat. 6:22). Jiwasatï akapachan yänakaparu nayrar uchañataki chʼamachasiskañäni ukhajja, janiw Diosampejj sum apasjjsnati, ukwa Jesusajj ewjjawayäna (Mat. 6:19, 20, 24).

6. ¿Kunjamatsa munañanakasampejj jan apayasksna?

⁶ Jucharar jaqenakjamajja, awisajj munañanakasampejj apayasiksnawa (Romanos 7:21-25 liytʼañataki). Jehová Diosan qollan ajayupampi jan yanaptʼayasksna ukhajja, ‘kunatejj chʼamakan luraski’ ukanak lurañaruw purtʼassna (Rom. 13:12). Ukanakat mä qawqhajja, akanakawa: ‘Jan wali kʼuchirtʼäwinaka, machañanaka, wachoqa jucha lurañanaka, jan phenqʼani jucha lurañanaka’ (Rom. 13:13, NM). Uka juchanakampi jan atipayasiñatakejja, alajjpachatwa lupʼipjjañasa. Ukampis ukajj chʼamakïspawa. Ukatwa apóstol Pablojj akham säna: “Nayajj janchejjan munañaparojj tʼaqhesiytwa jaysayasiraktwa” sasa (1 Cor. 9:27). Ukhamajj jiwasatï Jehová Diosar kusisiyañ munstan ukhajja, Pabljamarakiw apnaqasiñasa. Jichhajja, kunsa Abrahamampi Moisesampejj Diosat jan jitheqtañatakejj lurapjjäna uk yatjjatapjjañäni (Heb. 11:6).

7, 8. 1) ¿Kuna jan waltʼäwinakansa Abrahamampi Sarampejj uñjasipjjäna? 2) ¿Kunsa Abrahamajj lupʼirïna?

⁷ Kunapachatï Diosajj Abrahamarojj familiapampi Canaán oraqer sarjjañap  maykäna ukhajja, jupajj taqe chuymaw iyaw säna. Abrahaman ukham Jupar taqe chuyma confiyatapa iyawsatapa uñjasajja, Jehová Diosajj jupampejj mä pacto luräna, akham sasa: “Wawanakamampisti mä jachʼa marka tukuyäma, bendecirakïmawa” sasa (Gén. 12:2). Ukampis walja maranakaw pasjjäna, Abrahamampi Sarampejj janïraw wawanïpkänti. Jehová Diosajj kuntï Abrahamar siskäna ukjja ¿armasjjpachänti? Ukhamarusa, Mesopotamia toqenkir Ur sat markaparu, familiaranakaparu jaytañasa wali chʼamäpachänwa. Canaán oraqer puriñkamajja, 1.600 kilometronakwa sarapjjarakïna. Ukansti, carpanakan jakasipjjäna, manqʼats awtjata jan wali jaqenakans uñisita ukhamaw sarnaqapjjarakïna (Gén. 12:5, 10; 13:18; 14:10-16). Ukhamäkchïna ukhasa, janiw Ur markar kuttʼañ amtapkänti (Hebreos 11:8-12, 15 liytʼañataki).

⁸ ‘Akapach yänak’ thaqañat sipansa, Abrahamajj ‘Jehová Diosaruw iyawsäna’ (Gén. 15:6). Jehová Diosan arsutapatwa lupʼirakïna. Ukatwa ukham confiyatapat Diosajj Abrahamar bendicïna. Ukat akham sarakïnwa: “Alajjpach sum uñtam, ukatsti taqe warawaranak jaktʼam jaktʼañjamächi ukkhajja. Jïsa, ukhamäniw juman wawanakamajja” sasa (Gén. 15:5). Uka arunakajj wal juparojj chuymachtʼpachäna. Sapa kutiw warawaranak uñtasajj Diosan uka arsutapat amtaspachäna. Qhepatjja, arsutaparjamaw Jehová Diosajj mä wawampi bendisjjäna (Gén. 21:1, 2).

9. ¿Kunjamsa Abrahaman sarnaqäwipajj jan qarjtasa Diosar serviskakiñatakejj chʼamañchtʼistu?

⁹ Jiwasajja, Abraham chachjamarakiw Jehová Diosan arsutanakap phoqasiñap suyasktanjja (2 Ped. 3:13). Janitï alajjpachat lupʼksna ukhajja, Diosan arsutanakapajj janis jankʼas phoqaskaspa ukhamwa amuysna, ukat inas Diosarus jan sum servjjaraksnati. Amuytʼañataki, inas precursorjam jan ukajj yaqha ukhamanakan serviñatak nayrajj chʼamachasirïsta, ¡walik ukham chʼamachasiwaytajja! Ukampis jichhajj ¿ukhamti luraskarakta? Amtañäni, Abrahamajj Jehová Diosarojj serviskakïnwa, “suytʼaskarakïnwa suma uttʼayata marka”, mä arunjja, kuna bencionanaktï jutïrin katoqañapakäna ukwa suytʼaskarakïna (Heb. 11:10). “Abrahamajj Diosarojj iyawsänwa ukatwa Diosajj juparojj askita katoqäna iyawsatap layku” (Rom. 4:3).

10. ¿Kunjamsa waynäkasajj Moisesajj jakasïna?

¹⁰ Moisesajj ukhamarakiw alajjpachat lupʼirïna. Kunapachatï waynäkäna ukhajja, ‘Moisesajj wali suma yatichatänwa, kawkhakamatejj egipcionakajj yatipkäna ukakama’. Ukapachajj Egiptojj wali munañani markänwa, ukat Moisesajj faraonan utapanwa jakarakïna. Niyakejjay wali suma yatichatächïnjja, Moisesajj “wali chʼamanïnwa arsüwipana, luräwipansa” (Hech. 7:22). Egipto markansa wali munañanïspänwa. Ukampis jupatakejja, egipcionakan yatichäwinakapat sipansa, Diosan munañap lurañaw jukʼamp wakiskirïnjja.

11, 12. ¿Kuna yatichäwis Moisesatakejj wali askïnjja, ukat kunjamatsa uk yattanjja?

¹¹ Moisesajj wawäskäna ukhatpachwa, Jokébed taykapajj hebreonakan Jehová Diosapat yatichäna. Taqe kunat sipansa, Moisesatakejj Jehová Diosar uñtʼañaw wali askïnjja. Faraonan utapan jakatap laykojja, wali qamirïspänwa munañanirakïspänwa. Ukampis taqe ukanakwa jaytäna (Hebreos 11:24-27 liytʼañataki).  Niyakejjay Jehová Diosar wawatpach uñtʼchïnjja, ukhamarak Diosarojj taqe chuyma iyawschïnjja, Moisesajj alajjpachatwa lupʼirakïna.

¹² Moisesajj Egipton wali yatichat jaqëkchïnsa, janiw munañanïñsa qamirïñsa thaqkänti. Kunjamtï Bibliajj siskejja, “iyawsäwi laykurakiw Moisesajj jachʼäjjäna ukhajj jan munkänti Egipto reyin phuchapan wawapaw sayasiñjja. Jan ukasti Diosan markapan uñisitäñwa munäna, mä jukʼa tiempo juchanakan kusisiñat sipansa”. Kuntï Jehová Diosat yateqawaykäna ukajja, qhepatjja Israel marka irpañatakiw yanaptʼjjäna.

13, 14. 1) Janïr israelitanakar qhespiykasajja, ¿kunsa Moisesajj yateqañapäna? 2) ¿Kunsa jiwasajj yateqañasaraki?

¹³ Moisesajj Jehová Diosarusa Israel markarusa wal munasïna. Ukapachasti israelitanakajj Egipto markanwa esclavot servipjjäna. Ukatwa Moisesajj 40 maranëjjäna ukhajj jupanakar qhespiyañatakejj wakichtʼatäkaspas ukham amuyasïna (Hech. 7:23-25). Ukampis Dios nayraqatan janïraw wakichatäkänti. Jupajj altʼat chuymanïña, paciencianïña, llampʼu chuymanïña, jupa pachpa apnaqasiñwa yateqañapäna (Pro. 15:33). ¿Kunatsa? Kunattejj qhepatjja, yantʼanakana, jan waltʼäwinakanwa uñjasiñapäna, ukatwa Moisesan jukʼamp wakichasiñapajj wakisïna. Ukatakejj 40 mara uwij awatirïñaw yanaptʼäna.

¹⁴ Ukajj wal Moisesarojj yanaptʼäna. Bibliasti siwa: “Moisesajj cheqpachansa llampʼu chuymani jaqënwa” sasa (Núm. 12:3). Israelitanakajj kunayman chuymanïpjjänwa ukat kunayman jan waltʼäwinakampiw jupan ukar jutapjjarakïna, ukatakiw altʼat chuymanïñajj Moisesar yanaptʼäna (Éxo. 18:26). ‘Jachʼa tʼaqhesiña’ pasañatakisa jutïr pachar mantañatakisa Moisesjam suma chuymanïñaw wakisiraki (Apo. 7:14). ¿Taqenimpit sum apasisktanjja? Mäki chuyma ustʼayasirinakampisa, jankʼak colerasirinakampisa ¿sumti apasisktanjja? Apóstol Pedrojj akham sänwa: “Taqenirus suman uñjapjjam, jilatanakarusti munapjjarakim” sasa (1 Ped. 2:17).

15, 16. 1) ¿Kunatsa alajjpachat lupʼiñajj wali wakiskirejja? 2) ¿Kunatsa sarnaqatasajj sumäñapa?

¹⁵ Jichhürunakanjja, ‘jan wali tiemponakanwa’ jakasktanjja (2 Tim. 3:1). Ukatwa Diosat jan jitheqtañatakejj alajjpachat lupʼiñasajja (1 Tes. 5:6-9). Kunanakansa amuyasiñasa uk jichhajj kimsa toqet uñjañäni.

¹⁶ ¿Kunjamsa sarnaqasktan? Pedrojj kunatsa sum sarnaqañajj wakisi ukwa akham sas qhanañchäna: “Diosar [jan] uñtʼir jaqenak taypinsti sum sarnaqapjjam. Jupanakajj [...] jumanakan aski luratanakam uñjasasti, Diosaruw yupaychapjjarakini” sasa (1 Ped. 2:12). Pantjasir jaqëkstansa, taqeniw utansa, trabajonsa, yateqañ utansa, yatiyäwinsa, jan ukajj yaqha lurañanakansa, sarnaqatasampi Jehová Diosar jachʼañchañataki chʼamachasiñasa (Rom. 3:23). Jiwasatï Diosar ‘iyawsäwisan’ chʼamachasiskakiñäni ukhajja, jan wali munañanakas atipañäniwa (1 Tim. 6:12).

17. ¿Kunjamatsa Criston amuyupanïsna? (28 janankir dibujo uñjjattʼam.)

¹⁷ ¿Kunjamäskis amuyusajja? Suma sarnaqerejja, suma amuyunïñaparakiwa. Apóstol Pablojj akham sänwa: “Kunjäm amuyunïkäntejj Cristojj uka pachpa amuyunïpjjarakim” sasa (Fili. 2:5). Cristojj ¿kunjam amuyunïnsa? Jupajj altʼat chuymanïnwa. Ukatwa Jehová Diosar  serviñatakejj wal chʼamachasïna. Diosan Reinopat jaqenakar yatiyañasa jupatakejj wali wakiskirïnwa (Mar. 1:38; 13:10). Jesusajja, Diosan aruparjamapuniw sarnaqerïna (Juan 7:16; 8:28). Qollan qellqatanakjja yatjjatapunirïnwa, ukhamat ukarjam arsusin arjjatañataki ukat qhanañchañataki. Jiwasatï Criston amuyupanïñ munstan ukhajja, jupjam altʼat chuymanïñasawa, taqe chuymaw Diosan Reinopat yatiyañasa Bibliatsa yatjjataskakiñasarakiwa.

18. ¿Kunjamsa yanaptʼsna?

¹⁸ ¿Kunjamsa yanaptʼasktan? “Jesusan [sutiparu] taqe jakir jaqenakasa, akapachansa, alajjpachansa” qonqortʼasipjjaspa ukwa Jehová Diosajj muni (Fili. 2:9-11). Jesusajj alajjpachan jilïrïkchisa, altʼat chuymampiw Jehová Dios Awkiparojj istʼi. ¿Kunjamsa Jesusat yateqassna? Jiwasajj ukham altʼat chuymanïñasarakiwa (1 Cor. 15:28). Jehová Diosajja, taqe akapachankir jaqenakar yatiyasiñapatakiw chʼamachaski, ukarojj taqe chuymaw yanaptʼañasa (Mat. 28:19). Ukatjja, jilat kullakanakasarusa, jaqe masisarusa kunayman toqetwa yanaptʼañasaraki (Gál. 6:10).

19. ¿Kunatakis aka yatichäwejj yanaptʼawayistu?

¹⁹ Alajjpachat lupʼiñasataki, Jehová Diosajj amtaykistu ukatjja walpun kusistanjja. Ukhamajj “chʼamachasisa” nayrar sartaskakiñäni (Heb. 12:1). ‘Kuntejj lurkañäni ukjja, lurapjjañäni taqe chuymampi, Jehová Diosatakis lurksna ukhama’. Alajjpachankir Awkisajj ukham luratasatjja, wal bendicistani (Col. 3:23, 24).