Perfumenakar alergianïpki uka jilat kullakanakajja, jan walinwa jikjjatasipjje. Perfumenak sapüru uchasipki ukanakar jan jakʼachasiñatakejj walsa chʼamachasipkchejja, janiw taqetpun jitheqtirjamäpkiti. Ukatwa yaqhepanakajj akham jisktʼasipjje: ‘Tantachäwinakana, jachʼa tantachäwinakana perfumenak jan uchasipjjañapatakejja, ¿jilat kullakanakar mayiñajj walikïskaspati?’ sasa.

Cheqansa, tantachäwinakaru jan jutañapatak kunatï mayniru jarktʼkaspa uk janiw mä cristianojj yatkasin lurkaspati. Taqeniw tantachäwinak toqejj chʼamañchtʼatäñ muntanjja (Heb. 10:24, 25). Perfumenakar alergianïsajj tantachäwinakar jan sarirjamäpki uka jilatanakasa jan ukajj kullakanakasa, ¿kunsa lurapjjaspa? Tamankir irpir chuymaninakampiw parltʼapjjaspa. Irpir chuymaninakajj janiw mä kamachjam apsupjjañapäkiti, ukampis inas tamankir jilat kullakanakar uka toqet yatiyañajj wakischispa, ukhamatwa uka usu toqet taqenis amuyapjjani. Ukatakejja, “tamankirinakataki ewjjtʼanaka” siski uka arstʼäwinwa Yatiyañataki Tantachäwin Bibliat apstʼat mä qellqatarjam arstʼapjjaspa, jan ukajj wali amuyumpiw tamankirinakar yatiyapjjarakispa. * Sapa kuti uka toqet amtayañajj janiw walïkaspati. ¿Kunatsa? Jichhak bautisat jilat kullakanakasa, visitirinakasa, janiw uk yatipkiti. Jupanakan sum jikjjatasipjjañapwa muntanjja. Ukhamajja, wali amuyumpi perfumenak mä jukʼa uchasiñjja janiw khitis ajjsarañapäkiti.

Irpir chuymaninakajja, perfumenakar alergianïpki uka jilat kullakanakatakejja, yaqha cheqwa qontʼasipjjañapatakejj jan ukajj uttʼasipjjañapatakejj wakichtʼapjjaspa. Sañäni, payïr salantï tantachäwejj istʼaschi ukhajja, ukanwa alergiani jilatanakasa kullakanakasa qontʼasipjjaspa. Jupanakar yanaptʼañatakejj taqe kun lurasjjchi ukhajja, utapan istʼapjjañapatakiw tantachäwinakajj grabasispa, jan ukajj teléfono toqew utanakapan istʼapjjarakispa. Kunjamtï wali usuntata, jan ukajj sinti chuymani jilat kullakanakar yanaptʼañatakejj luraski ukhama.

Kimsa uru jachʼa tantachäwinakar sarañatakejja, ‘jukʼakwa perfume uchasipjjañama’ sasaw pasïr maranakatpach Diosan markapajj chʼamañchtʼistu. Ukhamarusa, kawkhantï tantachäwejj apaski ukanjja, janiw alergiani jilat kullakanakar yaqhawjar qontʼayañatakejj mä lugarajj utjkiti, ukatwa ukham ewjjtʼasïna. Ukampis ‘uka ewjjtʼarjamaw sapa semana tantachäwin lurasiñapa’ sasajj janiw khitis amuyañapäkiti.

Akapachan taqeniw juchanïtanjja, uka jucha utjatapatwa kunaymaninakan tʼaqhestanjja. Ukatwa, mayninakajj sum jakasiñasatak kuns lurapjje ukhajj wal kusistanjja. Inas tamasan perfumenakaru alergiani mä jilatasa, jan ukajj mä kullakas utjchi. Ukhamajj perfumenak uchasiñajj gustkchistusa, jaqe masisar munasitas laykojj wakisini ukhajj janiw perfume uchasjjañäniti.

Poncio Pilato apnaqeriw Jesusar juchañchäna, jupaw jiwayatäñapatakis katuyäna sasaw Biblianjj qhanañchi (Mat. 27:1, 2, 24-26). Ukampisa, Roma apnaqeri Pilaton sutipajj janiw Biblianak uñstkiti, jan ukasti Bibliajj qellqaskäna uka tiempo libronakansa uñstarakiwa. Mä diccionariorjamajja, Roma markankir Judea apnaqerinakat sipansa, Pilatot qellqatanakaw waljajja.

Sarnaqäwinakat qellqer judío Josefo chachan qellqatanakapanwa Pilaton sutipajj jukʼamp uñsti. Jupajja, Pilatojj Judea marka apnaqkäna ukhajj kunas pasäna uka toqetwa parläna. Sarnaqäwinakat qellqeri Filón sat yaqha judío chachasa, kunas Pilatorojj mä kutin pasäna uka toqets qellqarakitaynawa. Ukatsti, Roma marka apnaqerinakjjat qellqeri Tácito sat romano qellqerejj sänwa: ‘Tiberio chachajj Roma mark apnaqkäna ukhaw Pilatojj Jesusar jiwayayäna’ sasa.

1961 maranjja, Cesarea (Israel) markanwa arqueologonakajj romanonakan nayra teatrojj utjki ukan yatjjatasipkäna, ukanwa mä qala jikjjatapjjäna, uka qalanjja Pilaton sutipaw latín arut qellqat uñsti. Kunjamtï foton uñjaskejja, qellqatajj janiw phoqatäjjeti, ukampis qalltanjja akham sispachänwa: “Poncio Pilato, Judea markan prefectopaw Tiberieum ukjja wali jachʼañchat diosanakar churi” sasa. Uka arunakajja, mä jachʼa utatwa parlaski, uka utajja, Roma marka apnaqeri Tiberio chachar jachʼañchañataki utachata mä templöpachänwa.

“Aka revista liytʼirinakan jisktʼäwinakapa” sat yatichäwin La Atalaya julio 15, 2002 revistanjja, akham sänwa: ‘Mä kullakatï mä jilat nayraqatana, jilatajj bautisatäpasa, janisa, kullakajj pʼeqep chʼoqtʼasiñapawa’ sasa. Ukampis uka yatichäwi sumpach uñakiptʼasajja, kuntï uka revistan qhanañchaskäna uk mayjtʼayañaw wakisi.

Mä kullakajja, Bibliat yateqeripan ukaru mä jilatampi yatichir sarani ukhajja, pʼeqep chʼoqtʼasiñapawa. ¿Kunatsa? Kuntï chachanakajj taman lurapjjañapäki ukwa luraski. Kullakajj pʼeq chʼoqtʼasisajja, Jehová Diosajj tama taypin chachanakar pʼeqtʼapjjañapatak uttʼayki ukar respetatapwa uñachtʼayaski (1 Cor. 11:5, 6, 10). Ukampis jilatatï wakichtʼatächi ukhajja, kullakajj juparuw yatichañapatak mayispa.

Maysa toqetjja, kullakatï jan bautisat mä jilatampi yateqeripan ukaru yatichir sarani ukat jilatajj janiraki esposopäkchi ukhajja, Bibliarjamajj pʼeqep chʼoqtʼasiñapajj janiw wakiskiti. Ukampis yaqhep kullakanakajj chʼoqtʼasiñ munapjjchi ukhajja, concienciaparjamajj chʼoqtʼasipjjaspawa.