JALLU pacha 1931 maranjja, París markan Pleyel sat utan conciertonakajj lurasirïki ukaruw 23 markanakat suma isthaptʼat jaqenakajj taxinakat puripjjäna. Uka utarojj 3.000 jaqenakaw mantapjjäna. Jupanakasti janiw music tokirinak istʼir jutapkänti, jan ukasti Oraqpachan yatiyasiñapataki pʼeqtʼäna uka Rutherford jilatan arstʼäwip istʼiriw jutapjjäna. Jilatan arstʼäwipajj francés, alemán, polaco arunakaruw jaqokipasïna.

Uka jachʼa tantachäwejja, Francia markan jukʼamp yatiyasiñapatakiw yanaptʼawayi. Rutherford jilatajja, yaqha markat jutirinakarojj Francia markan colportoranakjama, mä arunjj precursoranakjam servipjjañapatakiw invittʼäna, jukʼampis wayn tawaqonakaruw chʼamañchtʼäna. Inglaterra markankir John Cooke jilatajj aka arunakat janipuniw armaskiti: “Wayn tawaqonaka, ¡precursorjam serviñjja janipuniw kunas jarkʼañapäkiti!” sasa. *

Uka arur istʼasajj waljaniw precursorjam serviñ qalltapjjäna, John Cooke jilatas ukhamaraki, qhepatjja misionerjamaw sirvjjäna (Hech. 16:9, 10). Francianjja, 1930 maran 27 precursoranakakiw utjäna, 1931 maransti 104 ukhaniw utj-jjäna, mä maranakwa jiljjattäna. Waljanejj janiw francés aru yatipkänti. Yaqha aru yateqkasasa, wakiskäna ukampik jakasisasa, utanakapat jayankkasasa, ¿kunjamansa uñjasipjjäna?

Diosan Reinopat yatiyañatakejja, yaqha markat jutir precursoranakajj tarjetanakampiw yanaptʼasipjjäna. Alemán aru parlir mä jilatajj taqe chuymaw París markan yatiyäna, jupajj siwa: “Jehová Diosajj wali chʼamanïtap sum yatipjjayäta. Yatiykasajja, chuymanakajajj ajjsarañat wal putoqëna, janiw jaqenakar ajjsarapkayätti, jan ukasti aka arunak armañ ajjsarapjjayäta: ‘¿Voulez-vous lire cette carte, sʼil vous plaît? [¿Amp suma aka tarjeta liytʼasmati?]’. Kuntï lurapkayäta ukajj wali wakiskirïnwa uk sum amuyapjjayäta” sasa.

Edificionakarojja porteronakajj janiw mantayañ munapjjerïkiti. Mä urojja, Inglaterra markankir pä kullakaw mä qhoru porteromp jikisipjjäna, uka kullakanakajj mä jukʼak francés aru parlañ yatipjjäna. Porterojj ‘khitirus thaqhapjjta’ sasaw säna. Jan sint colerasjjañapatakejja, maynïr kullakajj mä punkunkir letrero uñkatäna. Ukanjja sänwa: “Tournez le bouton [Timbre limtʼam]” sasa. Utanin sutipäpachawa sasin amuyasajja,“‘Tournez le bouton’ sat warmimp jikisiriw jutapjjta sasin säna. Ukham kusisit chuymanïñaw precursoranakar yanaptʼäna.

1930 maranakanjja, waljanejj Francian janiw sum jakasipkänti, yaqha markat jutiri precursoranakas ukhamarakiw jakasipjjäna. Inglaterra markat jutiri M. Brzoska kullakajj kunjamsa precursor masipampejj uñjasipjjäna uk akham siwa: “Qorpachasipjjerïkta uka utanakan janiw calefaccionajj utjirïkiti, mä chʼuchʼu utanakwa jakasipjjerïta. Alwanakajja, jarisiñatakejj chhullunktʼat umwa pʼakjapjjañajäna” sasa. Ukhaman jakasajj ¿aynachtʼapjjpachänti? ¡Janiwa! Kunjamsa jikjjatasipjjäna ukjja, jupanakat maynejj akham siwa: “Janis kunas utjapkchitänjja, janiw kunas faltapkitänti” sasa (Mat. 6:33).

Precursoranakatakejja yaqha markan jakañajj chʼamakïnwa. 1930 mara qalltanakanjja, Francian niya 700 jilat kullakanakakiw utjäna. Jupanakajj taqe cheqanakanwa jakasipjjäna. Utapat jaya cheqanakar sariri precursoranakarojja ¿kunas kusisitäñatakejj yanaptʼäna? M. Brzoska kullakajj kunjamsa precursor masipampejj jikjjatasipjjäna ukjja akham siwa: “Yaqha markan jakasina jan llakisiñatakejja, panpachaniw Bibliat apstʼat qellqatanak yatjjatapjjerïta. ‘Uka tiemponakanjja, janiw revisitanakasa, Bibliat maynir yatichir sarañas utjapkitänti’, ukhamajj arumanakajj familiaru, mayni precursoranakaruw mensajenak qellqapjjerïta. Suma experiencianak awistʼasaw chʼamañchtʼasipjjerïta” sasa (1 Tes. 5:11).

Jan waltʼäwinakansa uñjasipkchïnjja, janipuniw aynachtʼapkänti. ¿Kunjamatsa uk yattanjja? Jupanakajj cartanakwa sucursalar qellqapjjäna, yaqhepajja Francian walja maranak precursorjam servisaw qellqapjjäna. Alajjpachar sarañatak ajllita Annie Cregeen kullakajja, 1931 marat 1935 marakamajj Francia markpachwa esposopampejj viajipjjäna. Jupajj akham sasaw qellqäna: “¡Wali kusisita ukhamarak wali sumapuniw jakasipjjayäta! Precursoranakajj mayakiw sarnaqasipjjerïta. Apóstol Pablojj sänwa: ‘Nayaw satantta, Apolosasti ukaruw umampi qarpjjataraki, ukampis Diosawa jiltayarakejja’ sasa. Kunjamsa uka arunakajj phoqasïna uk uñjasajja, khitinakatï uka maranakan yatiyañan yanaptʼawayapkta ukanakatakejj wali kusiskañapuniwa” sasa (1 Cor. 3:6).

Uka precursoranakajj wali yateqaskayapuniwa. Diosar jukʼamp serviñ amtirinakajj jupanakatwa jan waltʼäwinakan aguantañsa, Diosar taqe chuyma serviñsa yateqasipjjaspa. Francianjja, niya 14.000 precursor regularanakaw utji. Jupanakat waljaniw yaqha aru parlir tamanakan servipjje. * Jupanakasti, Francian precursorjam serviñ qalltapkäna jupanakjamarakiw Diosar servisipki. (Francia markat qellqanita.)