Familianakataki

Kunjams jan waltʼäwinak askichsna

Chacha: ¿Kawks imillanakax sarapxi?

Warmi: Isi alasiriw qhatu sarapxi.

Chacha: (Colerataw jachʼatjam arsu.) ¡Kamisaraki isi alir sarapxanisti! ¡Jichhakirakis machaq isinak alarasisipkixä!

Warmi: (Chuyma ustʼataw arsuraki.) Jichhax wali iraqataw siwa, ukatwa sarapxi, ukampis nayaw sarapxamsay sista.

Chacha: (Wali phiñasitaw wal tuqisi.) ¡Janiw qullq ukhamaki tukuntasipkaniti! ¿Kunatsa jan jisktʼista? ¿Kamisaraki jumaki khitätasti?

¿KUNA jan walinakansa uka chacha warmix uñjaspacha uk amuytati? Chachax wali qhurükaspas ukhamawa. Ukat wawanakar kawk khitañ tuqitsa janirakiw mä amtanikïpkiti. Janis chacha warmix sumat parltʼasirïpkaspa ukhamjamawa.

Chiqansa, taqiniw pantjasirïtanxa ukat kuna jan walinakas utjakipuniwa. Ukampis chacha warminakax kuna jiskʼa jan waltʼäwinaksa askichapxañapapuniwa. ¿Kunatsa?

Jan askichkañäni ukhaxa, jukʼamp jan waliruw tiempompix pursna, janiw sumat parltʼasiñas utjxaspati. Ukatwa Salomón sat wali yatiñan apnaqirix akham säna: “Chʼaxwañanakasti, kunjamatï mä palacion rejanakapax jan paskaya wali uchantatakixa ukhamaw jaljtayaraki” sasa (Proverbios 18:19). Ukhamax jan walinakan uñjaskasasa, ¿kunjamsa chacha warmi sum parltʼasiñatakix chʼamachasisma?

Mä jaqichäwix mä cuerpükaspas ukhamawa. Kunjamatix wilax jakaykistuxa, ukham wali askirakiw chacha warmi parltʼasiñaxa. Ukampis sum parltʼasiñatakix munasiñampi respetompiw utjañaparaki, kunjamatix chuymampi pulmunampix cuerposan wila utjañapatakix wali wakisirïkixa ukhama (Efesios 5:33). Ukhamasti jan walinakax askichasax janiw nayra jan walinak amxäsiskañax wakiskaspati, jan ukasti kunatix askichañäki uka tuqit parltʼañakiw wakisispa, ukatakiw munasiñax yanapistu (1 Corintios 13:4, 5; 1 Pedro 4:8). Ukat respetos ukham askirakiwa, khititix chachapar jan ukax warmipar respetki ukax janiw jupak parlkiti, jan ukasti maynix kun sañs muni ukxa sum amuyi.

Kunjamsa jan waltʼäwinak askichañasa

Jan waltʼäwinak askichañatakix kun lurañas wakisispa uk jichhax pusi tuqit amuytʼañäni ukat kunjamsa Bibliax jan walinakxa, munasiñampi respetompi askichañ yanaptʼistaspa uksa amuytʼarakïtawa.

1. Kunapachas jan waltʼäwi askichapxasma. “Taqi kunas horasanikiwa; [...] amuktʼañ horasa, parlañ horasa” utjarakiwa (Eclesiastés 3:1, 7).  Kunjamtï qalltan uñjktanxa, awisax chuym ustʼayasiñanakaw utjaspa. Ukampis ukhaman uñjasisax jan tuqisiskañatakiw chʼamañchasiñama. Colerampi atipayasirjamäsax ukhar suytʼañamawa, ukat mä jukʼampiruw uka tuqit parltʼañäni sasaw chachamar jan ukax warmimar sañama. Ukhamatwa jukʼamp jan walinakar jan purkätati, ukat aka arunak amtañamarakiwa, Diosan Arupax akham siwa: “Chʼaxwaña qalltañasti, umasa jilarkaspa ukhamawa; uka chʼaxwañata jithiqtañasti jukʼampi askiwa” sasa (Proverbios 17:14).

Ukampis “parlañ” horasax utjarakiwa. Jan waltʼäwinak ukhamak jaytjsna ukhaxa, qurar uñtataw jilantaspa. Ukhamasti, janiw “ukhamak pasxchinïya” sañasäkaspati. Jumatix chacha warmi tuqiskasin “ukharuki suytʼañäni, mä jukʼampiruw parltʼañäni” sista ukhaxa, respetompiw uk amtañama, ukampis janirakiw wali jayar sarayañamäkiti. Ukhamatwa Biblian aka iwxanakaparjam jankʼaki askichañxa purapat yanaptʼasipxäta, akham siwa: “Colerasiñanakamax jan jornalpachäpati” sasa (Efesios 4:26). Ukat arunakamxa phuqapxañamapuniwa.

AK LURAÑAW WAKISISPA: Familian kuna jan waltʼäwinakas utjaspa uka tuqit parltʼasiñatakix sapa semanaw tiempox utjañapa, ukwa chacha warmi amtapxañama. Inas irnaqäwit wali qarit purinkasas jan ukax manqʼasiñ horasanakas uka tuqinakat parlañax jan wakiskchispati, ukhamasti uka horanakan jan walinakat parlañax janiw walïkaspati, ukhamax kunapachas sumak jikxatasiñjamäki ukhaw parltʼañataki amtapxañama.

2. Kunjamsa jikxatasta ukxa qhanwa respetompi sañama. “Sapa maynis jaqi masinakamarux kunatix chiqäki ukak parlapxam” sasaw Efesios 4:25 jiskʼa tʼaqan saraki. Chiqpachansa chacha warmiw wali jakʼa pura jakasir masïpxixa. Ukhamasti, kunjamsa jikxatasta ukxa wali qhanwa sañama. Margaritax * niyaw pä tunka suxtani maranak jaqichatäkasinwa akham saraki: “Qalltanxa, kuna jan walin uñjasisas jankʼaki chachajax amuyaspa ukwa munirïta. Ukampis ukham lurañax janiw askikataynati, jichhax qhana arunakampiw kunjamsa jikxatasta, kunsa amuytxa ukanak sarakta” sasa.

Ukampis janiw mä uñisirir jan ukax mä chʼaxwäwin atipjañatakjam wakichasiñamäkiti, jan ukasti kunjamsa jikxatasta ukwa chachamas jan ukax warmimas yatiñapa. Nayraqatxa kuna jan walis utji uk qhan sañamawa, ukat kunapachas uka jan walix utjaraki uksa sañamarakiwa, ukatsti kunjamsa uka jan walin jumax jikxatasta ukwa qhipar sarakisma. Sañäni, inas maynix utar purisax taqi kunsa apatataschi ukat jumax colerasksta, ukhamasti respetompi akham sañaw wakisispa: “Irnaqäwit purisin ukhamaki isinak apatatasta ukhaxa, [ukhamatwa kuna jan waltʼäwis ukat kunapachas qallti ukax qhanañchasini] janis luratanakaj sum uñjkasma ukhamwa amuyasta [uka tuqit kunjamsa jikxatasta ukas qhanañchasirakiniwa]” sasa. Ukat kun lurañas wakisispa ukwa amuyumpi sañamaraki.

AK LURAÑAW WAKISISPA: Janïr chacha warmi parlkasin sum amuyañatakixa, kuna jan walis utji ukat kunjam askichasiñaps munasma uka tuqit qillqtʼasiñamaw wakisispa.

3. Maynir istʼañamarakiwa, kunjamsa jikxatasi uk amuyañamawa. Mä cristianox “jankʼakïñapaw istʼañataki, ukampis janiw jankʼaki kunsa parlañapäkiti ni colerasiñapäkarakisa” sasaw Santiagox qillqatayna (Santiago 1:19). Kunapachatï chachas jan ukax warmis jan walin uñjasi ukat janirak maynix kunjam jikxatasitapsa amuykiti ukhaxa, wali llakiwa. Ukhamasti, maynix kunjamsa jikxatasi uk amuyañataki chʼamachasiñamawa (Mateo 7:12).

Wolfganax niya kimsa tunka phisqani maranakaw jaqichatäxi, ukat akham siwa: “Jan walinakat parlañax wali chʼamaw nayatakixa, ukat kunjamsa jikxatasta uk warmijax jan amuyki ukhaxa jukʼampiwa” sasa. Dianax niya pä tunka maranakaw jaqichatäxaraki, ukat akham sarakiwa: “Jan walinak askichañataki parlapkta ukhaxa, janiw chachajax istʼkituti” sasa. ¿Kunjamsa jumax uka jan walinak atipjasma?

“Jupax uk munpacha jan ukax ak amuypacha” sasa jan sum yatxatkas amuyañax janiw walïkiti. “Jachʼa jachʼa tukuñax nuwasiñanakakwa  apani, ukampis yatiñ kankañaxa llampʼu chuymaninakampiwa” sasaw Bibliax saraki (Proverbios 13:10). Maynirux sum uñjañamawa, ukat kun sañs muni ukxa, sum istʼañamarakiwa. Ukat amuyatam uñachtʼayañatakixa, kuntï siski ukwa qhanañchtʼañamaraki. Janipuniw sawkasirjam parlañamäkiti ni jiskʼachañamäkisa. Ukat jan sum amuyksta ukhaxa, chiqachtʼayasiñamakiwa. Janirakiw jumakis jil parlañamäkiti, jan ukasti kunjamsa jikxatasipxta uk sum amuyañkam purapat parltʼasipxañama.

Awisax kunas amuyupan utji uk amuyañax chʼamäspawa, ukampis altʼat chuymampi jan ukax llampʼu chuymamapi istʼañaw wakisi. Ukampis jumatï chachamar jan ukax warmimar ukham sum uñjäta ukhaxa, ukhamarakiw jupax jumar uñjätamxa (Mateo 7:2; Romanos 12:10).

AK LURAÑAW WAKISISPA: Kunjamsa chachamas jan ukax warmimas jikxatasi uka amuyatam qhanañchasaxa janiw kunar uñtat kutin kutini pachpa arunaka arsuñamäkiti. Kunjams jikxatasi ukxa sum amuyañama, ukarjamaw kunsa arsüta (1 Pedro 3:8).

4. Mä suma amtar puripxañamawa. “Mayni sapat sipansa paniniw jukʼamp askixa, ukhamatwa jukʼamp luratas utjaraki. Maynitix jupanakat liwischi ukaxa, mayniwa wayti.” (Eclesiastés 4:9, 10.) Chiqpachansa, janiw mayni sapax chacha warmi jan waltʼayasisax askichkaspati, jan ukasti purapat yanaptʼasiñaw utjañapa.

Chachaw familia pʼiqtʼañapa sasaw Jehová Diosax yatichi (1 Corintios 11:3; Efesios 5:23). Ukampis chachax janiw taqi kunsa munañapar apnaqañapäkiti. Amuyasir chachax janiw kunsa munañaparuki lurkiti. David sat chachax niyaw pä tunka maranaka jaqichatäxi, ukat jupax akham sarakiwa: “Kunas panpachanitaki askïspa ukwa thaqta, ukat kunas panpachanitak walïspa uk lurañwa amtarakta”. Tanyax paqallq maranak jaqichatäkasaw akham saraki: “Khitis chiqanki uka tuqit jiskhisiskañax janiw wakiskiti. Awisax mä jan waltʼäwi askichañatakix may maya amtanakaw utjaspa. Ukampis mä jan waltʼäwi askichañatakix amuytʼasirïñawa, ukat janirakiw maynix munañaparuki kunsa amtañapäkiti, ukwa amuyapxta” sasa.

AK LURAÑAW WAKISISPA: Kunjamatsa mä jan waltʼäwi askichapxasma ukxa panpachaniw walja amtanak qillqtʼasipxasma, ukhamatwa sum amuytʼasipxarakisma. Ukatxa kawkïris panpachanitakix waljamäki uk lurañwa amtapxañama. Ukatsti, uka amtax phuqasiti jan ukax askiti uk amuytʼañatakirakiw mä qhawqha tiempot parltʼasipxäta, ukampis janiw sinti jayar sarayañax wakiskaspati.

Mä amtaki sarnaqaña

Jaqichäwix yukur uñtasitaw sasaw Jesusax säna (Mateo 19:6, NM). Yapu satañatakiw kʼullut khitut mä lawampi pä wakar yapthapiñ yatipxi. Ukampis uka wakanakax jan waltʼayasipkani ukhaxa, uka yukux kunkatsa usuchjxaspawa. Ukat purapat yanaptʼasipxani, mä arunxa waltʼayasipxani ukhaxa, yapsa satapxaspawa jan ukax kuna jathinaksa qatatipxaspawa, janiw ukanak lurañax chʼamäkaniti.

Ukhamasti, chacha warmitï jan yanaptʼasipkani ukhaxa, janirakiw waltʼayasipkaspati, usuchjasiñakiw utjxaspa. Ukampis yanaptʼasiñ utjani ukhaxa kuna jan walinaksa askichapxakispawa, ukatxa luratanakas walirakiw utjani. Kalala sutini mä chachaxa wali sumaw chacha warmjam sarnaqasipxi, ukat jupax akham siwa: “Aka pä tunka phisqani maranakanxa chacha warmjam kunsa qhan parltʼasisaw jan waltʼäwinakxa askichapxta, kunjamsa purapat jikxatasipxta uksa sum amuyapxarakta, Jehová Diosaruw yanap mayisipxta ukat Biblian yatichäwinakaparjamaw sarnaqapxarakta” sasa. ¿Janit jumax ukham lurkarakisma?

AMUYTʼASIÑATAKI JISKTʼAÑAKA

▪ ¿Kuna jan waltʼäwitsa chacha warmjam parltʼasiñ muniristxa?

▪ Maynix mä jan waltʼäwin kunjamsa jikxatasi, ¿uk chiqapunit amuytxa?

▪ Taqi kunsa munañajaruk lurañ munaskirist ukhaxa, ¿kuna jan walinakas utjaspa?

[Qhanañchäwi]