Payïri: Jan wali jaqinakax infiernonwa tʼaqhisisipki

¿Kunjamatsa uka kʼari yatichäwix uñstäna? “Greciankir taqi filosofonakatxa, Platón sat chachan yatichäwinakapaw jaqinakax kuntï infierno tuqit amuyxapxi ukar chʼamañchtʼawayäna.” (Historia de los infiernos, de Georges Minois, página 64.)

“Pä patak phisqa tunka maranakatxa, Greciankir filosofonokan yatichäwiparjam yatichat yaqhip cristianonakaxa, iyawsäwipat yatichañatakix uka filosofonakan yatichäwinakaparjamaw yatichañ qalltxapxäna [...]. Jupanakatakix Platón chachan yatichäwinakapaw jukʼamp askïxäna.” (The New Encyclopædia Britannica, 1988.)

“Iglesian yatichäwiparjamax infiernox utjapuniwa ukat wiñayatakirakiwa. Jucharar jaqinakax jiwxapxi ukhaxa, ukspachaw almapax infiernoru, ‘wiñay aqkir ninaru’ tʼaqhisir sarxapxi [...]. Infiernonwa wiñayataki Diosat jayarstʼat uñjasipxi.” (Catecismo de la Iglesia Católica, tercera edición revisada, página 242.)

¿Bibliax kamsisa? ‘Jakirinakaxa amuyasipxiwa jiwxañanakapa, ukampis jiwatanakaxa, janipuniw kunsa amuyasipkiti, [...] kunalaykutix janiw utjkiti irnaqañasa, amtäwinakasa, yatiqañasa, yatiñanïñasa Seol, kawkharutï sarkta ukanxa.’ (Eclesiastés 9:5, 10, NM.)

Hebreo arut jutiri Seol aruxa, jiwatanak imaña mä jachʼa sepulturäkaspas uk sañ muni, ukat yaqhip Biblianakanxa uka arux “infierno” sasin jaqukipataraki. ¿Uka qillqatax kunsa jiwatanakxat yatichistu? ¿Juchanïpxatap laykuti Seolan tʼaqhisisipki? Janiwa, kunattix uka jiskʼa tʼaqanxa ‘janipuniw kunsa amuyasipkiti’ siwa. Chiqpachansa, jiwatanakax janiw kunsa amuyasipkiti ni tʼaqhisipkisa. Ukatwa Job tatax jan wali usumpi tʼaqhiskän ukhax ‘infiernon’ imanttʼasita sasin Diosar mayisïna (Job 14:13, Biblia Americana San Jerónimo). Infiernotï almanakaru wiñayataki tʼaqhisiyañ lugarasäpan ukhaxa, ¿infiernon imanttʼasita sasin mayisisapänti? Janiwa. Bibliarjamaxa, infiernox (jan ukax Seol) jiwatanak imaña mä jachʼa sepulturäkaspas ukhamakiwa, ukanxa janiw kuna luräwis utjkiti.

Infierno tuqit uka qhanañchtʼäwix qhana ukat suma amuytʼañjamawa, ukatxa Biblian yatichäwiparjamarakiwa. Chiqpachansa, ¿kuna jachʼa jucharak maynix lurxaspasti, munasir Diosax wiñayans wiñayapataki maynir tʼaqhisiyañapatakisti? (1 Juan 4:8.) Ukhamasti, infiernon tʼaqhisiñatï mä kʼari yatichäwïchixa, ¿alaxpachan jakäwitxa kamsasirakispasa?

Aka qillqatanakat yatxattʼam: Salmo 146:3, 4; Hechos 2:25-27; Romanos 6:7, 23.

CHIQA YATICHÄWI:

Diosax janipuniw jaqinakarux infiernon tʼaqhisiykiti.

[5 janan fotopax khitin apsutasa]

Barrators—Giampolo/The Doré Illustrations For Dante’s Divine Comedy/Dover Publications Inc.