Suxtïri: Diosar yupaychañatakix santonak apnaqañax walikïskiwa

¿Kunjamatsa uka kʼari yatichäwix uñstäna? “Nayrïr cristianonakax Diosar yupaychañatakix janiw santonak apnaqapxirïkänti [...]. Iglesiax kimsa pataka ukat pusi patak maranakanwa santonakampi Diosar yupaychañax wakisiskaspawa, ukat jan yatiñan jaqinakarus cristianismo sat yupaychäwin yatichäwinakapxa libronakampiki arstʼäwinakampiki yatichañat sipansa ukanakampiw jukʼamp facilak yatiqapxani sasaw sapxäna.” (Cyclopedia of Biblical, Theological, and Ecclesiastical Literature, de McClintock y Strong.)

¿Bibliax kamsisa? “Janiw kuna casta uñtan diosanaksa lurasïtati, ni alaxpachankki ukanakar uñtatsa, ni aka uraqinxa kunanakatix utjki ukanakar uñtatsa, ukhamarak quta manqha uraqinkirir uñtatsa. Janiwa uka diosanak nayraqatan altʼasïtati, janirakiw yupaychätasa.” (Éxodo 20:4, 5.) Nayra patak maranakanxa, apóstol Juanax akham sasaw cristianonakarux iwxtʼäna: “Jiskʼa wawanaka, idolonakat amuyasipxam” sasa (1 Juan 5:21, MT).

Walja religionanakaw santonakax janiw idolonakäpkiti, jan ukasti, khitirutix yupaychañ munktan ukar jakʼachasiñatakikiw sasin sapxi. Ukampis ¿ukax chiqäpachati? Mä qillqatarjamaxa, “qalltanxa santonakax inas yatichañataki ukat kʼachachtʼañatak amtampi luratächïna; ukatak luratakiwa sasaw sapxirïna. Ukampisa, jaqinakax ukanakaruw yupaychxapxäna. Chiqpachansa, Iglesia Ortodoxa Oriental sat yupaychäwin utjki uka santonakatxa ukhamäskapuniwa, santonak tuqnämwa yupaychxapxirïna” (The Encyclopedia of Religion). Ukhamasti, ¿uka santonakax yanaptʼistaspati? Janiwa, kunattix Isaías profetax akham säna: “¿Kunampirak jumanakasti Diosarusti chikayapxasmasti? ¿Kuna idolompirak Diosarusti ‘Akhamaw’ sapxasmasti?” sasa (Isaías 40:18).

Aka qillqatanakat yatxattʼam: Isaías 44:13-19; Hechos 10:25, 26; 17:29; 2 Corintios 5:7.

CHIQA YATICHÄWI:

Diosax janipuniw Jupar yupaychañatakix santonak apnaqañas munkiti.

¿KAWKÏRSA AJLLÏTA KʼARI YATICHÄWINAKTI JAN UKAX CHIQA YATICHÄWINAKCHA?

Ukhamasti, taqi ukanakat mä jukʼa yatxattʼawayasinxa ak yatiqtanxa: walja iglesianakanwa ‘aliq säwi arunakaki’, mä arunxa, kʼari yatichäwinakaki yatichasiski, uka yatichäwinakax janiw Biblian qhana ukat chuymachtʼkiri yatichäwinakapjamäkiti (2 Pedro 1:16).

Ukhamaxa, kunanaktï yatichawayapktam ukanakat sum yatxattʼas amuykiptʼañamataki ukat Biblian chiqa yatichäwinakapats amuykiptʼañamatakirakiw chʼamañchtʼanipxsma (Juan 17:17). Ukhamtï lurätaxa Biblian aka arunakapax chiqätap amuyäta: “Uñtʼapxarakïtawa kunatix chiqäki ukxa, uka chiqa kankañasti qhispiyat sarnaqasiñ churapxarakïtam” (Juan 8:32).

[9 janan fotopax khitin apsutasa]

Pictorial Archive (Near Eastern History) Est.