JESUSAN jaktäwipajj janiw nayra tiempotakik askikänti, jichhatakis askikïskiwa. Apóstol Pablojj akham sasaw qhanañchi: “Cristojj jiwatanak taypitjja jakatatawayiwa, jupajj nayraqat achükaspas ukhamarakiw taqe jiwatanakat jaktirinakatakejja. Kunjämatejj jiwañajj [...] mä sapa jaqetaki qalltejja, ukhamarakiw jiwatat jakatatañajj mä sapa jaqeta qalltaraki. Kunjämtejj Adán chachankatas laykojj taqe jaqenakajj jiwarapjjejja, ukhamarakiw Cristonkjjasinjja taqe jaqenakajj jakapjjani” sasa (1 Corintios 15:20-22).

Jesusajj khä 33 marana, nisán phajjsit 16 uru saraqataruw jiwatat jaktäna. Uka uruw judionakajj Jehová Diosan templopar granon nayrïr achunakap Jerusalenar apapjjerïna. Ukat Pablojj Jesusar ‘nayraqata’ sasinjja, uka qhepat jukʼamp jaqenakaw jaktanipjjäni sasaw amuytʼayaskäna.

Jesusan jaktäwipajja, kuna askinaksa utjayi ukwa apóstol Pablojj akham sas qhanañchäna: “Jiwañajj [...] mä sapa jaqetaki qalltejja, ukhamarakiw jiwatat jakatatañajj mä sapa jaqeta qalltaraki” sasa. Cheqas Adanan wawanakapjamajj taqeniw juchararatanjja ukat jiwaraktanjja. Ukampis Jesusajja, jan juchani qʼoma jakäwip loqtasaw jaqenakarojj juchan esclavopäñat qhespiyawayi ukat jiwatat jaktasaw jiwañatsa qhespiyarakistu. Ukjja, Romanos 6:23 qellqatanwa Pablojj akham qhanañchi: “Juchan wajjtʼasiñapasti jiwañawa, ukampis Diosan wajjtʼäwipajj wiñay jakañawa Cristo Jesús Tatitusana”.

Jesusan jiwatapasa ukat jaktatapasa jiwasanakatakejj kunja wakiskiris ukjja, jupa pachpaw akham qhanañchäna. Jiwatanak taypit jaktayatañajaw wakisi ukhamat nayar “iyawsapki ukanakajj jan chhaqañapataki, jan ukasti wiñay jakañanïñapataki. Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki” sasaw qhanañchäna (Juan 3:14-16).

Ukhamajj jan kuna llakini jan usuni ukat wiñay jakasiñajj ¡kunja kusiskañänisa! (Apocalipsis 21:3, 4.) Cheqas ukajj mä suma suytʼäwiwa. Mä yatjjatʼat chachajj akham säna “Jiwat imañanakajja, jakäwejj mä ratutakikïtapwa amtayistu ukat jiwatat jaktañajja, jiwañajj mä ratutakikïtapwa uñachtʼayarakistu” sasa. Ukhamajj Jesusan jiwatat jaktäwipajja jiwasatakejj wiñay jakañawa, ukjj janiw khitis kʼariw siskaspati.