Bibliajj Diosan Arupawa. Mä munasir awkin cartapäkaspas ukhamawa (2 Timoteo 3:16). Ukanwa kunjamsa Jupar kusisiysna, kunatsa jan walinak utjayaskakpacha ukat jutïrin kunsa jaqenakatakejj lurani taqe ukanak qhanañchi. Ukampis iglesia pʼeqtʼirinakajj Biblian yatichäwinakap qʼal mayjtʼayapjje, ukatwa walja jaqenakajj Biblian yatichäwinakapajj chʼamäkaspas ukham amuyjjapjje (Hechos 20:29, 30).

Jehová Diosajj kunatï Jupat cheqäki uk yatiñaswa muni, ukatwa Biblia sum amuytʼañatak churistu. (1 Timoteo 2:3, 4 liytʼäta.)

Jehová Diosajj janiw Bibliak churkistuti jan ukasti amuytʼañasatakejj mä yanapwa churistu. Jesusaruw jiwasanakar yatichañapatakejj khithani (Lucas 4:16-21). Jesusajj Diosan Arupat qhanañchkasajj pachpa qellqatanakampiw qhanañchtʼirïna. (Lucas 24:27, 32, 45 liytʼäta.)

Jesusajj kuna luräwtï qalltawaykän uk lurasipkakiñapatakejj cristian tamwa uttʼayäna (Mateo 28: 19, 20). Jichhürunakanjja, Jesusan cheqpach arkirinakapajj taqe chuymaw jaqenakarojj kuntï Bibliajj Dios toqet parlki uk amuytʼapjjañapatakejj yanaptʼasipki. Jumatï Bibliat yatjjattʼañ munsta ukhajja, Jehová Diosan Qhanañchirinakapampiw yanaptʼayisiñama. (Hechos 8:30, 31 liytʼäta.)